NAZİRLƏR KABİNETİNİN MƏTBUAT MƏRKƏZİNİN MƏLUMATI
İyulun 1-də Azərbaycan Respublikasının Baş naziri Artur Rasizadə ölkəmizdə səfərdə olan Dünya Bankı Qrupunun Sərəncamçı Direktoru cənab Şenqman Syanı qəbul etmişdir.
Azərbaycanla Dünya Bankı arasında mövcud əlaqələri yüksək qiymətləndirən qonaq bu əməkdaşlığın hər iki tərəf üçün faydalı əsaslarla daha da dərinləşdirilməsinin zəruriliyini vurğulamışdır. O, respublikamıza səfərinin əsas məqsədi barədə məlumat verərək Saatlı və Biləsuvar rayonlarında məskunlaşan məcburi köçkünlərlə görüşlərindən, Lənkəran rayonunda Dünya Bankının maliyyə dəstəyilə yaradılan fermer təsərrüfatı ilə tanışlığından ətraflı danışdı. Sonra Yoxsulluğun Azaldılması Proqramına toxunan Şenqman Syan ölkənin inkişafı üçün önəmli olan məsələlərdən söz açdı və bu məqsədlə əsas etibarilə qeyri-neft sektorunun, xüsusən də kənd təsərrüfatının və infrastrukturun inkişafına, özəl bölmənin genişləndirilməsinə nail olmağın vacibliyini qeyd etdi.
Qonağı salamlayan baş nazir Artur Rasizadə respublikamızın Dünya Bankı ilə əməkdaşlığa xüsusi diqqət yetirdiyini və işgüzar əlaqələrimizin indiki səviyyəsindən məmnun qaldığını vurğuladı. Son illər ölkəmizdə demokratiya və insan hüquqlarının qorunması, struktur islahatlarının aparılması və yoxsulluğun aradan qaldırılması istiqamətində mühüm addımlar atıldığını vurğulayan baş nazir, ümumən sosial-iqtisadi vəziyyətə ciddi təsir göstərən ən böyük problem kimi Ermənistanın Azərbaycana hərbi təcavüzünün ağır nəticələrini qonağın diqqətinə çatdırdı. Sonra o, yeni iş yerlərinin yaradılması, orta və kiçik müəssislərin inkişafı, normal infrastrukturun qurulması məqsədilə Dünya Bankı tərəfindən gələcəkdə də ölkəmizə yardım göstərilməsinin zəruri olduğunu vurğuladı.
Söhbət zamanı qarşılıqlı maraq doğuran bir sıra məsələlər ətrafında da fikir mübadiləsi aparıldı.
Bölmənin digər xəbərləri
