Nəzarət məhkəməsi Silvio Berluskonini reabilitasiya edib
Bakı, 12 may, AZƏRTAC
Milanın Nəzarət məhkəməsi İtaliyanın sabiq Baş naziri Silvio Berluskoninin onun “Mediaset” kompaniyasının dələduzluğu ilə bağlı ittiham hökmünün bütün nəticələrini ləğv edərək reabilitasiyasına qərar verib.
AZƏRTAC xəbər verir ki, Corriere della Sera qəzetinin yaydığı məlumata görə, mayın 11-də axşam saatlarında məhkəmə komissiyasının iclasından sonra qəbul edilən qərar 81 yaşlı siyasətçiyə, “İrəli, İtaliya” partiyasının liderinə yenidən seçkilərdə iştirak etmək hüququ qazandırır. Məhkum olunmuş şəxslərin dövlət idarəçiliyində iştirakının qadağan olunması barədə 2012-ci ildə çıxarılan qərara əsasən o, seçkilərdə iştirak edə bilmirdi.
2013-cü ilin avqustunda Berluskoni vergidən yayınmaq məqsədilə dələduzluq ittihamı üzrə 4 il müddətinə (amnistiya ilə bir il) azadlıqdan məhrum edilmişdi. Yaşının çox olması ilə əlaqədar siyasətçinin həbs cəzası ictimai-faydalı işlərlə əvəz olunmuşdu. Berluskoni bir il ərzində qocalar evlərinin birində yaşlılara və Alsgeymer xəstəliyinə tutulmuş insanlara qulluq etmişdi.
Bölmənin digər xəbərləri
