Norveçdə bıçaq və silah gəzdirməyə görə cəzalar sərtləşdiriləcək
Stokholm, 14 oktyabr, Nərgiz Cəfərli, AZƏRTAC
Norveçin ədliyyə naziri Astri Os-Hansen bildirib ki, Milad bayramına qədər ictimai yerlərdə üzərində bıçaq və silah gəzdirməyə görə cəzanın artırılmasını nəzərdə tutan qanun layihəsini təqdim edəcək. Onun sözlərinə görə, cəza müddətinin iki dəfə artırılması da mümkündür.
AZƏRTAC xəbər verir ki, hazırda bu qayda pozuntusuna görə cərimə və ya bir ilədək həbs, ağır hallarda isə üç ilədək azadlıqdan məhrumetmə cəzası nəzərdə tutulur.
Bu qərar silahlı cinayətlərin artması ilə bağlı qəbul edilib. Hökumət, həmçinin, uşaqların cinayət fəaliyyətinə cəlb edilməsinə görə cinayət məsuliyyəti tətbiq etməyi və yeniyetmələrin iştirakı ilə baş verən işlərə baxılma prosedurunu sürətləndirməyi planlaşdırır.
Eyni zamanda, uşaq və ailə məsələləri üzrə nazir Lene Voqslid uşaqların müdafiə sistemində əlavə tədbirlərin görüləcəyini açıqlayıb. Buna səbəb son vaxtlar Oslo və Sarpsborqda 15 yaşdan kiçik yeniyetmələrin silahlı hücumlarda iştirak şübhəsi ilə saxlanılmalarıdır. Onların çoxu uşaq müdafiə orqanlarının himayəsində idi.
Hakimiyyət uşaqların müdafiəsi üzrə müəssisələrin səlahiyyətlərini genişləndirməyi planlaşdırır ki, bu qurumlar müvəqqəti olaraq uşaqların təmaslarını, telefon və internetə çıxışlarını məhdudlaşdıra, həmçinin onların yazışmalarına nəzarət edə bilsin. Tədbirlərin gələn ilin əvvəlində qüvvəyə minməsi gözlənilir.
“Vicdansız cinayətkarlar sosial şəbəkələrdə həssas uşaqları məqsədyönlü şəkildə axtarırlar. Biz onları təhlükədən və cəlb edilmədən qorumağa borcluyuq”, – deyə Voqslid vurğulayıb.
Bölmənin digər xəbərləri
