Pekin beynəlxalq film festivalında 500-ə yaxın ekran əsəri nümayiş olunacaq
Pekin, 1 aprel, AZƏRTAC
Aprelin 13-də Çinin paytaxtı Pekində ənənəvi beynəlxalq film festivalı işə başlayacaq.
AZƏRTAC xəbər verir ki, bu il 9-cu dəfə keçiriləcək festival dünya kino sənayesinin tanınmış simalarını Pekinə toplayacaq. Bir həftə davam edəcək festival günlərində Pekinin 30 kinoteatrında 500-ə yaxın film, o cümlədən son illər bir çox beynəlxalq müsabiqələrin laureatı olan filmlər, klassik ekran əsərləri nümayiş olunacaq. Bundan başqa, bir neçə filmin premyerası da Pekin beynəlxalq film festivalında həyata keçiriləcək. Festivalın proqramına forumlar, seminarlar, karnaval, ustad dərsləri də daxildir.
Tədbirin əsas hadisəsi isə 15 "Tiantan" mükafatı uğrunda müsabiqədir. Müxtəlif nominasiyalarda qalibləri tanınmış kino mütəxəssislərindən, rejissor və aktyorlardan ibarət münsiflər heyəti seçəcək.
Qeyd edək ki, son illər Çinin kino sənayesi sürətlə inkişaf edir. Ölkədə hazırda 10 mindən çox kinoteatrda təxminən 58 min kinoekran fəaliyyət göstərir ki, bu da sayca dünyada ən çoxdur. Planetin ən böyük ikinci kino bazarı olan Çində kassa yığımı ötən il 9 faiz çoxalaraq 61 milyard yuana (9,1 milyard dollar) çatıb.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
