SİYASƏT
Qırğızıstan parlamentində Ulu Öndər Heydər Əliyevin anadan olmasının 100 illiyi ilə bağlı konfrans keçirilib
Bakı, 25 aprel, AZƏRTAC
Aprel ayının 20-də Qırğız Respublikası (QR) Joqorku Keneşinin (parlamentinin) böyük salonunda Azərbaycan səfirliyinin təşkilatçılığı, Qırğızıstan hökumətinin, Xarici İşlər Nazirliyi və parlamentinin dəstəyi ilə Azərbaycan xalqının Ümummilli Lideri Heydər Əliyevin 100 illik yubileyinə həsr olunmuş konfrans keçirilib.
Səfirlikdən AZƏRTAC-a bildiriblər ki, konfransda Qırğızıstan parlamentinin sədr müavini Nurbek Sıdıqaliev, dövlət katibi Süyünbek Kasmambetov, Nazirlər Kabineti sədrinin müavini, iqtisadi və humanitar sahələrdə əməkdaşlıq üzrə Hökumətlərarası Birgə Komissiyasının Qırğızıstan tərəfdən həmsədri Bakıt Torobayev, Təhlükəsizlik Şurasının katibi Marat İmankulov, Parlamentin Qırğızıstan-Azərbaycan parlamentlərarası dostluq qrupunun rəhbəri İskender Matraimov, Azərbaycan diasporunun, yerli ictimaiyyətin, KİV-lərin nümayəndələri və digər şəxslər iştirak ediblər.
Konfransı giriş sözü ilə açan Joqorku Keneşin sədr müavini Nurbek Sıdıqaliev Ulu Öndər Heydər Əliyevin zəngin həyat yolundan danışıb, onun Qırğızıstan-Azərbaycan əlaqələrinin möhkəmlənməsi istiqamətində xidmətlərini qeyd edib.
Konfransın moderatoru, Azərbaycanın Qırğızıstandakı səfiri Lətif Qəndilov ölkəmizdə 2023-cü ilin “Heydər Əliyev İli” elan edildiyini xatırladıb, Ulu Öndərin həyat və fəaliyyəti barədə iştirakçılara ətraflı məlumat verib.
Sonra Qırğızıstanın dövlət katibi S.Kasmambetov Prezident Sadır Japarovun təbrik məktubunu oxuyub.
Digər çıxış edənlər - Nazirlər Kabineti sədrinin müavini Bakıt Torobayev, xarici işlər nazirinin müavini Aybek Moldoqaziyev, Təhlükəsizlik Şurasının katibi Marat İmankulov, Qırğızıstan-Azərbaycan parlamentlərarası dostluq qrupunun rəhbəri İsgəndər Matraimov Ümummilli Lider Heydər Əliyevin çoxşaxəli siyasi fəaliyyətindən, SSRİ dönəmində gördüyü işlərdən söz açıb, böyük dövlət xadiminin Qırğızıstana və Türk dünyasına töhfələri diqqətə çatdırıblar.
Rusiyanın Qırğızıstandakı səfiri Nikolay Udoviçenko Heydər Əliyevin Sovet İttifaqı Kommunist Partiyası Mərkəzi Komitəsinin Siyasi Bürosunun üzvü, eyni zamanda, SSRİ Nazirlər Soveti sədrinin birinci müavini vəzifələrində işlədiyi zaman SSRİ-nin iqtisadi, sosial və mədəni həyatının ən mühüm sahələrinə rəhbərlik etdiyini , ittifaq məkanında bir neçə mühüm layihənin həyata keçirilməsinin məhz onun adı ilə bağlı olduğunu vurğulayıb. Səfir Ulu Öndər Heydər Əliyevin dövlət siyasətinin həm Azərbaycan, həm də bütün region üçün sülhün təmin olunmasında rolunu qeyd edib.
Qırğızıstan Joqorku Keneşinin sabiq sədri Mədətxan Şerimkulov Ulu Öndər haqqında xatirələrini bölüşüb, konfransın keçirildiyi bu salonda 1994-cü il mayın 5-də onun sədrliyi ilə imzalanan "Bişkek protokolu" ilə bağlı maraqlı məqamları yada salıb.
Milli Məclisin deputatları Musa Quliyev və Cavanşir Feyziyev tədbirdə çıxış edərək Azərbaycanın böyük oğlu Ulu Öndər Heydər Əliyev şəxsiyyətinə göstərdikləri diqqətə və ehtirama görə Qırğızıstan hökumətinə minnətdarlıqlarını bildiriblər.
Səfir Lətif Qəndilov çıxışında qeyd edib ki, Heydər Əliyevin xalq qarşısında ən böyük xidmətlərindən biri xalqa özünəinamı geri qaytarması, gələcəyə inamla baxmağı aşılaması olub. Heydər Əliyevin ölkədə sabitliyi, iqtisadi artımı, sosial inkişafı təmin etdiyini diqqətə çatdıran səfir dahi şəxsiyyətin ölkənin uzunmüddətli perspektivi üçün iqtisadi və siyasi inkişaf strategiyasını müəyyən etdiyini diqqətə çatdırıb. “Heydər Əliyevin müdrikliyinin mahiyyəti ondan ibarətdir ki, o öz xalqının milli maraqlarını başqa xalqların milli prinsipləri ilə qarşı-qarşıya qoymurdu. Məhz buna görə Heydər Əliyev həm Azərbaycanda, həm də xaricdə sevirlər və xatırlayırlar”, - deyə diplomat qeyd edib.
Səfir çıxışını “Başqa xalqın dəyərlərinə diqqət yetirə bilən xalq hörmətə layiqdir” sözləri ilə bitirib və Heydər Əliyevin xatirəsinə göstərilən yüksək ehtirama görə qırğız xalqına, şəxsən Prezident Sadır Japarova, hökumətə və parlamentə minnətdarlığını bildirib.
Konfransda, həmçinin Ulu Öndərin həyatının müxtəlif dönəmlərini əks etdirən film nümayiş olunub.
Tədbirdən sonra qonaqların şərəfinə səfirlik adından ziyafət verilib.
Konfrans yerli mətbuatda və televiziya kanallarında geniş işıqlandırılıb.