RƏSSAMIN 50 İLLİK YUBİLEYİNƏ HƏSR OLUNMUŞ SƏRGİSİ AÇILMIŞDIR
Bakı, 23 yanvar (AZƏRTAC). Azərbaycan Rəssamlar İttifaqının Vəcihə Səmədova adına Sərgi Salonunda rəssam Natiq Fərəcullazadənin anadan olmasının 50 illik yubileyinə həsr edilmiş sərgi açılmışdır.
Rəssamlar ittifaqının katibi, xalq rəssamı Ağəli İbrahimov tədbirdə yubilyarın həyat və yaradıcılığından danışaraq bildirmişdir ki, sərgidə rəssamın rəngkarlıq və qrafika janrında 100-ə yaxın əsəri nümayiş etdirilir. Natiq yaradıcılığı və gözəl insani xüsusiyyətləri ilə hər zaman fərqlənir. Əsərlərini yüksək zövqlə yaratdığından geniş marağa səbəb olur.
Əməkdar rəssam Ənvər Qarayev də yubilyarın əsərlərindəki yüksək peşəkarlıqdan söz açmış, bunu onun bütün əl işlərindən görmək mümkün olduğunu diqqətə çatdırmışdır. O bildirmişdir ki, rəssamın dünyanın bir çox ölkələrində sərgiləri açılmışdır.
N.Fərəcullazadə tədbirin təşkilatçılarına və iştirakçılarına minnətdarlığını bildirmişdir.
Sərgi yanvarın 28-dək davam edəcəkdir.
Bölmənin digər xəbərləri
