Rusiya və Türkiyə İctimaiyyətinin İkinci Forumu Sankt-Peterburqda keçiriləcək

31.01.2019 [18:34]
Çap et
A⁺ A^-

Moskva, 31 yanvar, AZƏRTAC

Rusiya və Türkiyə İctimaiyyətinin İkinci Forumu (İkinci RTİF) Sankt-Peterburqda keçiriləcək.

AZƏRTAC xəbər verir ki, RTİF-in baş katibi Sergey Markov bu barədə “Moskva-Bakı-Ankara geosiyasi oxu” mövzusunda dəyirmi masada məlumat verib. S. Markov qeyd edib ki, birinci forum Antalyada keçirilmişdi. O deyib: “İndi biz böyük bir foruma hazırlaşırıq. Həmin tədbir bu il iyul ayında Rusiyada, çox ehtimal ki, Sankt-Peterburq şəhərində keçiriləcək”. Onun sözlərinə görə, bu forumun keçirilməsi ilə bağlı hazırlıq işləri aparılır. Müstəqil Dövlətlər Birliyinin, xaricdə yaşayan həmvətənlərin işləri və beynəlxalq humanitar əməkdaşlıq üzrə Federal Agentlik (Rossotrudniçestvo) işə fəal qoşulub.

Xatırladaq ki, Rusiya və Türkiyə İctimaiyyətinin Birinci Forumu keçən il noyabr ayında Türkiyənin Antalya şəhərində keçirilib. Həmin forumda rusiyalı və türkiyəli ekspertlər hər iki ölkəni maraqlandıran ümdə problemləri müzakirə ediblər.

Fəridə Abdullayeva

AZƏRTAC -ın xüsusi müxbiri

Moskva