Bakı, 30 noyabr (AZƏRTAC). Hərbi attaşe, polkovnik Vladimir Çernenko başda olmaqla Rusiyanın Azərbaycandakı səfirliyinin nümayəndə heyəti Böyük Vətən müharibəsi veteranı, tam Şöhrət Ordeni kavaleri Muradəli Şəbahət oğlu Heydərovla görüşmək üçün Azərbaycanın Zərdab rayonunda olmuşdur. 

AZƏRTAC səfirliyin bu görüş barədə məlumatına istinadla xəbər verir ki, M.Heydərov 1922-ci ildə Zərdab rayonunun Məmmədqasımlı kəndində anadan olmuşdur. 1942-ci ildə 416-cı atıcı diviziyanın heyətində cəbhəyə çağırılmışdır. Böyük Vətən müharibəsi illərində göstərdiyi şücaətlərə görə M.Heydərov Şöhrət Ordeninin üç dərəcəsi ilə təltif edilmişdir. Bu, Sovet İttifaqı Qəhrəmanı adına bərabər tutulur.

M.Heydərov hazırda Azərbaycanda sağ-salamat olan yeganə tam Şöhrət Ordeni kavaleridir. Ordudan tərxis ediləndən sonra doğma kəndinə qayıtmış M.Heydərov indi də orada yaşayır.

Veteranla görüş Zərdab Rayon İcra Hakimiyyətinin binasında keçirilmişdir. Polkovnik Vladimir Çernenko giriş sözündə faşist Almaniyası üzərində Qələbənin tarixi əhəmiyyətini vurğulayaraq qeyd etmişdir ki, bu Qələbə Sovet İttifaqının bütün xalqlarının sıx birliyi sayəsində mümkün olmuşdur.

V.Çernenko Böyük Vətən müharibəsi illərində Azərbaycanın ön və arxa cəbhəyə böyük töhfələr verdiyini vurğulayaraq, bu müharibədə göstərdikləri igidliyə görə Azərbaycanın müharibə veteranlarına və şəxsən M.Heydərova dərin təşəkkürünü bildirmişdir.

Rayon icra hakimiyyətinin başçısı Lütfəli Babayev veteranların dəstəklənməsi, Böyük Vətən müharibəsi qəhrəmanlarının xatirəsinin əbədiləşdirilməsi istiqamətində rayonda və bütün ölkədə həyata keçirilən fəaliyyət barədə məlumat vermiş, gənclərin vətənpərvərlik və beynəlmiləlçilik tərbiyəsi işində M.Heydərovun fəal iştirakını qeyd etmişdir.

Səfirliyin nümayəndələri M.Heydərova maddi yardım göstərmiş, Rusiya Federasiyası Müdafiə Nazirliyi adından ona xatirə hədiyyələri təqdim etmişlər.

Nümayəndə heyətinin üzvləri, rayon rəhbərliyi, Azərbaycan Respublikası Veteranlar Şurasının nümayəndələri və digər rəsmi şəxslər Böyük Vətən müharibəsində həlak olmuş qəhrəmanların xatirə kompleksi önünə gül dəstələri qoymuşlar.