SİYASƏT
Səbail rayonunda keçirilən tədbirdə Milli Qurtuluş Günü Azərbaycan tarixinin parlaq, unudulmaz səhifəsi kimi səciyyələndirilmişdir
Bakı, 13 iyun (AZƏRTAC). Tariximizə Milli Qurtuluş Günü kimi daxil olmuş 1993-cü ilin 15 iyun günü onu qiymətləndirənlər, mənasını dərk edənlər üçün çox əzizdir. Həmin çətin, ağrılı günlərin həyəcanını yaşayan, hadisələri gözləri ilə görən insanlar üçün 15 iyun Azərbaycan tarixinin parlaq, unudulmaz bir səhifəsidir. 20 il öncə bu tarixi yaradan isə Azərbaycanın inkişafında, müstəqilliyinin qorunub saxlanmasında müstəsna rol oynayan, daim xalqına arxalanan və xalqa arxa, dayaq olan ulu öndər Heydər Əliyevdir.
AZƏRTAC xəbər verir ki, bu fikirlər Səbail rayonunda 15 İyun - Milli Qurtuluş günü münasibətilə keçirilmiş tədbirdə səslənmişdir. Səbail Rayon İcra Hakimiyyətinin başçısı Asif Əsgərov öz çıxışında qeyd etmişdir ki, Azərbaycanın yeni tarixinin bütöv bir mərhələsi dünya səviyyəli siyasətçi və dövlət xadimi, zəmanəmizin bənzərsiz şəxsiyyəti Heydər Əliyevin adı ilə bağlıdır. Ulu öndər Heydər Əliyev zamanın və taleyin mütləq mənada ehtiyac duyduğu, tarixin yeni mərhələsində, yeni sosial-siyasi və iqtisadi şəraitdə özünün çox böyük fitri lider potensialını reallaşdıra bilmiş müdrik bir şəxsiyyətdir. Ümummilli Liderin müasir Azərbaycan dövlətinin ideoloji-siyasi əsaslarını milli irs və müasir düşüncə əsasında yaradaraq, praktik surətdə gerçəkləşdirmiş strateq kimi hər zaman böyük rəğbət və ehtiramla xatırlanır.
Natiq vurğulamışdır ki, Heydər Əliyev zamanın və xalqının ona, onun zəkasına və iradəsinə, zəngin təcrübəsinə və vətən sevgisinə güvənərək etibar etdiyi missiyanı layiqincə yerinə yetirməyə müvəffəq olmuş, Azərbaycanı təhlükələrdən xilas etmiş, bütövlüyünü qoruyub saxlaya bilmişdir. Ümummilli Liderin 1993-cü il iyunun 15-də Azərbaycan rəhbərliyinə qayıdışı ilə ölkənin ictimai-siyasi, sosial-iqtisadi, elmi-mədəni həyatında, beynəlxalq əlaqələrdə dönüş yaranmış, elmi əsaslara, beynəlxalq norma və prinsiplərə uyğun müstəqil dövlət quruculuğu prosesi başlanmış və uğurla başa çatdırılmışdır. Heydər Əliyevin xarici siyasət məsələlərinə müstəsna əhəmiyyət verməsi Azərbaycan dövlətçiliyinin bu günü və gələcəyi baxımından son dərəcə əhəmiyyətli olmuşdur. Bütün bu illər ərzində məhz Heydər Əliyev Azərbaycanı səbir və inadla, bəzən hətta təkbaşına bütün dünyaya tanıda bilmişdir.
A.Əsgərov qeyd etmişdir ki, Ulu Öndərin təlatümlərdən çıxararaq yaşatdığı Azərbaycan indi Prezident İlham Əliyevin rəhbərliyi altında bütün dünyaya möhtəşəm yüksəliş dinamikası nümayiş etdirir. Heydər Əliyevin ölkədə yaratdığı quruculuq ab-havası yeni, müasir Azərbaycanın siyasi və iqtisadi gerçəkliklərində təzahür edir.
Natiq bir məqamı da xüsusi vurğulayaraq demişdir ki, Ulu Öndərin miras qoyduğu dövlətçilik irsi bu gün də yaşayır, bu irsin daşıyıcısı olan Prezident İlham Əliyevin timsalında xalqımızın inkişaf yoluna daim işıq saçır.
Rəsmi hissədən sonra tədbir iştirakçıları və qonaqlar S.Vurğun adına Dövlət Rus Dram Teatrı truppasının ifasında Ulu Öndərin çox xoşladığı və dönə-dönə baxdığı M.F.Axundovun “Müsyo Jordan və Dərviş Məstəli şah” komediyasına tamaşa etmişlər. Xalq Artisti Aleksandr Şarovskinin quruluş verdiyi tamaşada rol alan Xalq Artisti Məbud Məhərrəmov, əməkdar artistlər Fuad Osmanov, Natalya Şarovskaya, Mələk Abbaszadə, artistlər Murad Məmmədov, Milana Mərdəxanova, Salman Bayramov və başqalarının ifaları alqışlarla qarşılanmışdır.