ŞƏKİDƏ TAXIL BİÇİNİ BAŞLANMIŞDIR
Respublikanın ən iri taxılçılıq rayonlarından olan Şəkidə taxıl biçini başlanmışdır.
Şəhər icra hakimiyyətinin aqrar məsələlər şöbəsindən AZƏRTAC-a bildirmişlər ki, son günlər havaların yağmurlu keçməsi biçin kampaniyasını bir qədər gecikdirsə də, rayonun Turan qəsəbəsinin taxıl sahələrində artıq arpa biçininə başlanılmışdır. İndiyədək 600 hektara yaxın arpa sahəsinin məhsulu yığılmışdır. Hər hektardan orta məhsuldarlıq 25,6 sentner təşkil edir ki, bu da əvvəlki illə müqayisədə 4-5 sentner çoxdur.
Ötən ilin payızında rayonda cari ilin məhsulu üçün 66,8 min hektar sahədə taxıl əkilmişdir ki, bunun 50,6 min hektarı buğda, təqribən 16 min hektarı arpadır. Fermerlər taxıl biçinini optimal müddətdə başa çatdırmaq üçün səylə çalışırlar. Biçinə 233 taxılbiçən kombayn, yük maşınları, traktor və qoşqular, küləş presləyən və digər texnika cəlb edilmişdir.
Bölmənin digər xəbərləri
