Sumqayıtda sənaye məhsullarının istehsalı 46,2 faiz artıb
Sumqayıt, 20 aprel, Ətrabə Rzayeva, AZƏRTAC
Ötən üç ayda Sumqayıtın iqtisadiyyatı artan sürətlə inkişaf edib, bütün sahələrdə müsbət nəticələr əldə olunub. Şəhər üzrə ümumi məhsul istehsalı və xidmətlərin həcmi 424,4 milyon manat və ya 151 faiz təşkil edib, ötən ilin müvafiq dövrü ilə müqayisədə 133, 4 milyon manat və ya 51 faiz çox məhsul istehsal olunub və xidmətlər göstərilib. Sənaye məhsullarının istehsalı ötən ilin eyni dövrü ilə müqayisədə 46,2 faiz artaraq 296 milyon manat olub, məhsul istehsalı 94 milyon manatdan çox artıb. Ümumi məhsulun tərkibində qeyri-dövlət sektorunun payı 85 faizdən çox olub.
AZƏRTAC xəbər verir ki, bu rəqəmlər Sumqayıt Şəhər İcra Hakimiyyətinin 2018-ci ilin birinci rübündə sosial-iqtisadi inkişafın yekunlarına və qarşıda duran vəzifələrə həsr olunan hesabat yığıncağında səsləndirilib.
Şəhərin, həmçinin Corat və Hacı Zeynalabdin Tağıyev qəsəbələrinin inkişafına dair hesabat məruzəsini təqdim edən icra hakimiyyəti başçısının müavini Sahib Quliyev qeyd edib ki, ilin əvvəlindən bütün maliyyə mənbələri hesabına ayrı-ayrı sahələrin inkişafına 44,4 milyon manat vəsait yönəldilib. Şəhərə yatırılan investisiya keçən ilin müvafiq dövrü ilə müqayisədə 3,7 dəfə, tikinti-quraşdırma işlərinin həcmi isə 4 dəfə artıb. Əhalinin alıcılıq qabiliyyətini, real pul gəlirlərini əks etdirən göstəricilərdən sayılan pərakəndə ticarət dövriyyəsi 110 faiz olub və ya əhaliyə 215 milyon manatlıq mal satılıb. Pullu xidmət 78 milyon manat və ya 109 faiz təşkil etməklə, 7 milyon manat çox olub. Əmtəə dövriyyəsi 11 faiz, pullu xidmət isə 9 faiz artıb. Həyata keçirilən tədbirlər nəticəsində 1320 yeni iş yeri açılıb. Büdcənin gəlir hissəsi 116,5 faiz yerinə yetirilib. Yerli büdcəyə 1,5 milyon manat əlavə vəsait daxil olub.
Bildirilib ki, ilin sonuna qədər 6 müəssisə fəaliyyətə başlayacaq. Bu müəssisələrdə 2 mindən çox yeni iş yerinin açılması nəzərdə tutulur. Nəticədə Sumqayıta investisiya qoyuluşu təqribən 2,3 milyard ABŞ dolları təşkil edəcək.
Vurğulanıb ki, şəhər icra hakimiyyətinin dəstəyi ilə Məşğulluq Mərkəzi əhalinin işlə təmin olunması, sakinlərin sosial müdafiəsinin gücləndirilməsi sahəsində müvafiq tədbirlər həyata keçirib. Hesabat dövründə Mərkəzə 2758 nəfər iş axtaran müraciət edib və onlardan 1828 nəfər işlə təmin olunub. Sumqayıt şəhərində 1590 ictimai iş yeri açılıb.
Məcburi köçkün və qaçqınların yaşayış şəraitinin yaxşılaşdırılması məqsədilə yaşayış üçün yararsız olan bina və sosial obyektlərdə məskunlaşan insanların köçürülməsi üçün Prezident İlham Əliyevin göstərişi və Birinci vitse-prezident Mehriban xanım Əliyevanın tövsiyə və tapşırıqlarına əsasən Sumqayıt şəhərində yeni yaşayış binalarının tikintisi davam etdirilir. Bu binalara 936 ailənin köçürülməsi nəzərdə tutulur.
Sahib Quliyev qeyd edib ki, Sumqayıtda abadlıq-quruculuq, yaşıllaşdırma işləri, yeni sosial obyektlərin tikintisi və təmiri birinci rübdə də davam etdirilib. Yol-nəqliyyat infrastrukturunun yaxşılaşdırılması istiqamətində Metallurq küçəsi sənaye zonasından keçməklə Bakı-Quba yoluna qədər 4 kilometr uzunluqda yol yenidən qurularaq əsaslı təmir olunur. Şəhərin İsmət Qayıbov, Babək, Kamran Hüseynov küçələrinin asfalt örtüyünün dəyişdirilməsi ilə əlaqədar hazırlıq işləri aparılıb. Hazırda bir çox məhəllələrin ərazilərinə ümumilikdə 15 min kvadratmetrdən çox asfalt örtüyü salınıb.
Mənzil fondunun saxlanılması, dam örtüyünün yenidən qurulması, fasadların təmiri sahəsində 9, 10, 11, 12 və 13-cü mikrorayonlarda 50 yaşayış binasının dam örtüyü metal-kirəmitlə əvəz olunub, 50 yaşayış binasında isə işlər davam etdirilir. İstismar müddətini ötmüş 105 ədəd lift dəyişdirilərək yenilənib. 18-ci mikrorayon ərazisində 42 lift onlayn rejimdə işləyən intellektual idarəetmə sisteminə - Mərkəzləşdirilmiş Dispetçer Xidmətinə qoşulub. İlin sonuna qədər şəhər üzrə bütün liftlərin həmin sistem vasitəsilə idarə olunması işlərinin başa çatdırılması nəzərdə tutulur.
Nəqliyyat xidmətinin yaxşılaşdırılması məqsədilə Türkiyə istehsalı olan 145 ədəd müasir sərnişin avtobusu şəhərə gətirilərək marşrut xətlərinə buraxılıb, müasir tipli yeni dayanacaqlar quraşdırılır. Bu sahədə işlər davam etdirilir.
Məruzədə əhalinin həyat şəraitinin yaxşılaşdırılması, elektrik enerjisi, təbii qaz və su ilə təminatı, təhsil, səhiyyə, idman və mədəniyyət sahələrinin inkişafı istiqamətində görülən işlər təhlil olunub, uğurlarla yanaşı, problemlər də sadalanıb, onların həlli üçün təkliflər irəli sürülüb.
İclasa yekun vuran Sumqayıt Şəhər İcra Hakimiyyətinin başçısı Zakir Fərəcov cari ilin birinci rübündə həyata keçirilən layihələrin, qazanılan uğurların ili layiqincə sona çatdırmaq üçün etibarlı zəmin yaratdığını bildirib. O, 2018-ci ilin qalan dövründə də şəhərin inkişafı ilə əlaqədar abadlıq-quruculuq işlərinin həyata keçiriləcəyini deyib. Z.Fərəcov sosial obyektlərin, yaşayış binalarının dam örtüklərinin, fasadlarının əsaslı təmiri, Corat qəsəbəsi və stansiya Sumqayıt ərazisində yeni uşaq bağçalarının tikintisi, küçə və yolların, məhəllədaxili ərazilərin asfalt örtüyünün dəyişdirilməsi, “Acıdərə” kanalının yaşayış ərazilərindən keçən hissəsinin boruya alınması, yeni istehsal sahələrinin, iş yerlərinin açılması və digər sosial problemlərin həlli istiqamətində işlərin davam etdiriləcəyini diqqətə çatdırıb.
Sonda əldə olunan nailiyyətlərlə yanaşı, mövcud problemlərdən də danışılıb, onların həlli üçün lazımi tapşırıq və tövsiyələr verilib.
Bölmənin digər xəbərləri
