Avstriya-Azərbaycan Ticarət Palatasının prezidenti təltif olunub
Vyana, 6 iyun, AZƏRTAC
Vyanadakı Azərbaycan Mədəniyyət Mərkəzində Azərbaycan–Avstriya münasibətlərinin inkişafına və Azərbaycan diasporunun fəaliyyətinə verdiyi töhfəyə görə Avstriya-Azərbaycan Ticarət Palatasının (ATAZ) prezidenti Harald Qerstbauerin mükafatlandırılması mərasimi keçirilib.
AZƏRTAC xəbər verir ki, Azərbaycan Respublikası Diasporla İş üzrə Dövlət Komitəsi və Azərbaycanın Avstriyadakı səfirliyinin birgə təşkilatçılığı, Azərbaycan Mədəniyyət Mərkəzinin dəstəyi ilə baş tutan tədbirdə Dövlət Komitəsinin sədri Fuad Muradov, Avstriya–Azərbaycan Ticarət Palatasının (ATAZ) üzvləri, diplomatik korpusun nümayəndələri, diaspor fəalları və ictimaiyyət nümayəndələri iştirak ediblər.
Çıxış edən Azərbaycan Mədəniyyət Mərkəzinin rəhbəri Leyla Qasımova Azərbaycan ilə Avstriya arasında dostluq və əməkdaşlıq münasibətlərinin son illərdə dinamik inkişaf etdiyini bildirib. O qeyd edib ki, bu münasibətlərin möhkəmlənməsində təkcə dövlət qurumlarının deyil, həm də iş adamlarının, elm xadimlərinin, diaspor nümayəndələrinin və Azərbaycanın dostlarının mühüm rolu var. Leyla Qasımova H.Qerstbauerin uzun illər ərzində Azərbaycanın Avstriyada tanıdılması, iki ölkə arasında mədəni və iqtisadi əlaqələrin genişləndirilməsi istiqamətində göstərdiyi xidmətləri yüksək qiymətləndirib.
Azərbaycanın Avstriyadakı səfiri Rövşən Sadıqbəyli çıxışında iki ölkə arasında iqtisadi əməkdaşlığın son illərdə dinamik inkişaf etdiyini vurğulayıb və bildirib ki, Avstriya şirkətləri Azərbaycanın qeyri-neft sektorunda, o cümlədən tikinti, kənd təsərrüfatı, mühəndislik, nəqliyyat, tibbi texnologiyalar, bankçılıq, bərpaolunan enerji və turizm sahələrində fəal iştirak edirlər. Diqqətə çatdırılıb ki, Avstriya–Azərbaycan Ticarət Palatası da bu əməkdaşlığın inkişafında mühüm rol oynayaraq, iki ölkənin işgüzar dairələri arasında etibarlı körpü funksiyasını yerinə yetirir.
Səfir həmçinin vurğulayıb ki, Azərbaycan ilə Avstriya arasında ticarət dövriyyəsinin və investisiya əməkdaşlığının daha da genişləndirilməsi üçün böyük potensial mövcuddur və bu istiqamətdə yeni təşəbbüslər hər iki ölkənin maraqlarına xidmət edir.
Çıxış edən Diasporla İş üzrə Dövlət Komitəsinin sədri Fuad Muradov bildirib ki, Prezident İlham Əliyevin rəhbərliyi ilə Azərbaycan diasporunun inkişafı dövlət siyasətinin prioritet istiqamətlərindən birinə çevrilib və bu sahəyə xüsusi diqqət və qayğı göstərilir. O vurğulayıb ki, xaricdə yaşayan soydaşlarımızın təşkilatlanması, Azərbaycan həqiqətlərinin beynəlxalq ictimaiyyətə çatdırılması və ölkəmizin maraqlarının müdafiəsi istiqamətində əldə olunan uğurlar təqdirəlayiqdir. O, həmçinin beynəlxalq münasibətlərin inkişafında xalq diplomatiyası və ictimai təşəbbüslərin xüsusi rol oynadığını diqqətə çatdırıb. Qeyd edilib ki, bu baxımdan Azərbaycanın dostlarının və tərəfdaşlarının fəaliyyəti yüksək dəyərləndirilir.
Çıxışlarda Diasporla İş üzrə Dövlət Komitəsi tərəfindən “Diaspor fəaliyyətində xidmətə görə” medalı ilə təltif edilmiş Avstriya–Azərbaycan Ticarət Palatasının prezidenti Harald Qerstbauerin fəaliyyətindən ətraflı bəhs olunub.
Qeyd edilib ki, o, 2013-cü ildən etibarən Avstriya–Azərbaycan Ticarət Palatasına rəhbərlik edir. Onun rəhbərliyi altında çoxsaylı biznes missiyaları təşkil olunub, Avstriya və Azərbaycan şirkətləri arasında davamlı tərəfdaşlıqlar qurulub, iqtisadi əməkdaşlığın genişləndirilməsinə mühüm töhfələr verilib. H.Qerstbauer, eyni zamanda, Azərbaycan diasporunun təşəbbüslərini daim dəstəkləyərək ölkəmizin Avropada tanıdılması istiqamətində fəal iştirak edib.
Mərasimdə Fuad Muradov Harald Qerstbauera “Diaspor fəaliyyətində xidmətə görə” medalını təqdim edib.
Tədbirin bədii hissəsində tanınmış pianoçu və bəstəkar Abuzər Manafzadə musiqi proqramı ilə çıxış edib. Azərbaycan və dünya musiqisindən ibarət proqram iştirakçılar tərəfindən böyük maraqla qarşılanıb.
Bölmənin digər xəbərləri
