TANINMIŞ BƏSTƏKAR VƏ PİANOÇU ƏMİNƏ FİQAROVA VYANADA KONSERT PROQRAMI İLƏ ÇIXIŞ ETMİŞDİR
AZƏRTAC-ın xüsusi müxbiri xəbər verir ki, iyunun 4-də tanınmış caz bəstəkarı və pianoçu, həmyerlimiz Əminə Fiqarova 2008-ci il dünya turu çərçivəsində Vyanada “Porgy & Bess” caz klubunda konsert proqramı ilə çıxış etmişdir. Konsertdə Ə.Fiqarovanın “Sentyabr suitası”, “Gəl, mənimlə qurtul”, “Başqa bir mən”, “Gecə qatarı” və digər musiqi disklərindən ifa edilən kompozisiyalar caz pərəstişkarları tərəfindən böyük alqışlarla qarşılanmışdır.
Ə.Fiqarova 1966-cı ildə Bakıda doğulmuş, 1987-ci ildə Bakı Musiqi Akademiyasını bitirərək, həmin ali təhsil ocağında müəllimlik fəaliyyətinə başlamış və sonra Bostonda (ABŞ) Berkley Musiqi Kollecində musiqi təhsilini davam etdirmişdir. Hazırda Hollandiyada yaşayan və yaradıcılıqla məşğul olan musiqiçinin bəstələdiyi əsərlərdən ibarət ondan artıq musiqi diski işıq üzü görmüşdür. Onun rəhbərlik etdiyi “Əminə Fiqarova seksteti” 2008-ci il dünya turu çərçivəsində Danimarka, Almaniya, ABŞ, Kanada, Hollandiya, Lüksemburq, Xorvatiya, Cənubi Afrika Respublikası və Böyük Britaniyada konsert proqramları ilə çıxış edəcəkdir.
######
Bölmənin digər xəbərləri
