İQTİSADİYYAT
“Teleradio” İstehsalat Birliyi telekanallar üzərində nəzarəti gücləndirmişdir
Bakı, 2 yanvar (AZƏRTAC). Rabitə və İnformasiya Texnologiyaları Nazirliyinin “Teleradio” İstehsalat Birliyi (İB) respublikada analoq və rəqəmsal formatda yayımlanan telekanallar üzərində nəzarəti gücləndirmişdir. Bu, yeni dispetçer sisteminin istismara verilməsindən sonra mümkün olmuşdur. İB tərəfindən dispetçer xidmətinin teleqüllədən “Teleradio”nun inzibati binasına köçürülməsi üzrə işlər həyata keçirilmişdir.
Nazirlikdən AZƏRTAC-a bildirmişlər ki, yeni dispetçer xidmətində 24 və 46 diaqonal televizorlarından istifadə edilir. Onlar həm analoq, həm də yerüstü rəqəmli formatda siqnal qəbul edirlər. Bir televizorda bir neçə rəqəmsal telekanala nəzarət etmək mümkündür. Həmçinin peyk sistemlərindən siqnalların qəbulu təmin edilmişdir. Bu, Bakı və Abşeron yarımadasında, həmçinin respublikanın digər bölgələrində yayımlanan kanallara nəzarəti yaxşılaşdırmağa imkan vermişdir.
Peyk siqnallarının qəbulu üçün “Dexing” şirkətinin istehsalı olan peyk qəbuledicilərindən istifadə edilir.