TƏLİMAT
Mərkəzi Seçki Komissiyasının
30 iyun 2003-cü li tarixli
5/38 saylı Qərarı ilə
təsdiq edilmişdir
Dairə seçki komissiyasının üzvlüyünə namizədlərin irəli
sürülməsi qaydaları haqqında
TƏLİMAT
1.1 Dairə seçki komissiyaları Mərkəzi Seçki Komissiyası tərəfindən səsvermə gününə azı 90 gün qalmış təşkil olunurlar. Dairə seçki komissiyası 9 üzvdən ibarətdir. Dairə seçki komissiyasının üzləri Mərkəzi Seçki Komissiyası tərəfindən təyin edilirlər.
1.2 Dairə seçki komissiyasının 3 üzvünün namizədliyi vahid çoxmandatlı seçki dairəsi üzrə seçilmiş deputatları Milli Məclisdə çoxluq təşkil edən siyasi partiyanı Mərkəzi Seçki Komissiyasında təmsil edən komissiya üzvləri tərəfindən, 2 üzvünün namizədliyi vahid çoxmandatlı seçki dairəsi üzrə seçilmiş deputatları Milli Məclisdə azlıq təşkil edən siyasi partiyaları Mərkəzi Seçki Komissiyasında təmsil edən komissiya üzvləri tərəfindən, 2 üzvünün namizədliyi birmandatlı seçki dairələri üzrə seçilmiş deputatları Mərkəzi Seçki Komissiyasında təmsil edən komissiya üzvrəri, digər 2 üzvünün namizədliyi isə Milli Məclisdə təmsil olunmayan və vahid çoxmandatlı seçki dairəsi üzrə seçkilər zamanı ən çox səs qazanmış 4 siyasi partiyanı Mərkəzi Seçki Komissiyasında təmsil edən komissiya üzvləri tərəfindən təqdim edilir.
1.3 Dairə seçki komissiyasının üzvlüyünə namizədləri Mərkəzi Seçki Komissiyasında təmsil edən komissiyanın üzvlərinə müvafiq siyasi partiyaların yerli təşkilatları təqdim edirlər.
2. Birmandatlı seçki dairələri üzvrə seçilmiş deputatları Mərkəzi Seçki Komissiyasında təmsil edən komissiya üzvlərinə, dairə seçki komissiyası üzvlüyünə namizədlər və həlledici üzvlər aşağıdakı qaydada təqdim olunurlar.
2.1 Hər bir seçki dairəsi üzrə dairə seçki komissiyasına namizəd irəli sürmək üçün azı 15 nəfərdən ibarət seçicilərin təşəbbüs qrupu yaradılır. İclasın sədri və katibi seçildikdən sonra gündəliyə 2 məsələ daxil edilir.
- 1-ci məsələ müvafiq dairə seçki komissiyasının üzvlüyünə namizəd
irəli sürülməsi;
- 2-ci məsələ dairə seçki komissiyasına əvəzedici üzvün namizəd-
liyinin irəli sürülməsi. İclasda iştirak edən hər bir seçicinin soyadı,
adı, atasının adı, yaşadığı yerin ünvanı, şəxsiyyətini və ya onu əvəz
edən sənədin seriyası və nömrəsi, imzası və tarixi iclas
protokolunda göstərilir.
2.2 İclasda müvafiq dairə seçki komissiyasının üzvlüyünə namizədin və əvəzedici üzvünün namizədliyinin irəli sürülməsi barədə qərar qəbul edilir. Qəbul edilmiş qərar və iclasın protokolu iclasın sədri və katibi tərəfindən imza edilməklə təsdiqlənir.
2.3 Seçicilərin təşəbbüs qrupunu iclasın qərarı və protokolu, əgər iclas idarə, müəssisə, təşkilatda keçirilirsə, onların möhüründən istifadə edilməklə, iclas seçicilərin yaşayış yeri üzrə keçirilirsə, mənzil istismar sahəsinin və ya bələdiyyənin möhüründən istifadə edilməklə təsdiqlənir. Qərar və protokol notarial qaydada da təsdiq oluna bilər.
2.4 Seçicilərin təşəbbüs qrupu qərar qəbul edildikdən sonra təsdiqlənmiş qərarı, protokolu və namizədlərin razılıq ərizəsini müraciətlə birlikdə Azərbaycan Respublikasının Milli Məclisinə göndərir. Azərbaycan Respublikasının Milli Məclisində bütün dairələr üzrə irəli sürülən namizədlər ümumiləşdirilir və Mərkəzi Seçki Komissiyasına təqdim edilir.
2.5 Seçicilərin təşəbbüs qrupunun üzvləri və dairə seçki komissiyasının üzvlüyünə namizədlər bitərəf olmalıdırlar.
2.6 Məntəqə seçki komissiyalarının təşkili zamanı birmandatlı seçki dairələri üzrə seçilmiş deputatları dairə seçki komissiyasında təmsil edən komissiya üzvlərinə seçki məntəqələrinin ərazisindən bu təlimatın 2.1, 2.2, 2.3, 2.4 və 2.5 maddələrində göstərilən qaydada namizədlər irəli sürülür. Lakin məntəqə seçki komissiyalarının təşkili zamanı seçicilərin təşəbbüs qrupunun üzvlərinin sayı azı 10 nəfər olmalıdır. Seçicilərin təşəbbüs qrupu qərar qəbul edildikdən sonra təsdiqlənmiş qərarı, protokolu və namizədlərin razılıq ərizəsini müvafiq dairə seçki komissiyasına göndərir.
Bölmənin digər xəbərləri
