Türk bəstəkar Esin Aydıngöz “Grammy” mükafatına namizəd göstərilib
Bakı, 2 fevral, AZƏRTAC
Fevralın 4-də Los-Ancelesdəki “Crypto.com Arena”da təqdimatı olacaq 66-cı “Grammy” mükafatına namizədlərin adları açıqlanıb.
AZƏRTAC xarici mediaya istinadla xəbər verir ki, təqdimat mərasiminin aparıcısı yenə də afrikalı komediyaçı və yazıçı Trevor Nuh olacaq. Builki namizədlər arasında Birləşmiş Ştatlarda yaşayan türk bəstəkar Esin Aydıngöz də var. O, “Çərşənbə günü” çoxseriyalı filminə bəstələdiyi musiqiyə görə bu nüfuzlu mükafata namizəd göstərilib.
Namizədlər arasında Teylor Svift, Olivia Rodriqo, Boygenius, Miley Sayrus, Con Batista, Viktoriya Mone və Billi Eyiliş kimi məşhurların adları var. Mərasimdə, həmçinin Billi Coel, Coni Mitçel, Dua Lipa, Lyuk Kombs, Travis Skott və U2 qrupu səhnədə çıxış edəcəklər.
Bu il ilk dəfə “Afrika musiqisinin ifası” nominasiyasında “Grammy” mükafatı da təqdim ediləcək.
Bölmənin digər xəbərləri
