Aprelin 30-da Trabzondakı “Zorlu Qrand” mehmanxanasının “Authentinq” salonunda Azərbaycan Respublikasının Prezidenti Heydər Əliyevin, Türkiyə Respublikasının Prezidenti Əhməd Necdət Sezərin, Gürcüstan Prezidenti Eduard Şevardnadzenin iştirakı ilə “Terrorizmə, mütəşəkkil cinayətkarlığa və digər ağır cinayətlərə qarşı mübarizə haqqında Azərbaycan Respublikası, Gürcüstan və Türkiyə Respublikası arasında saziş”in imzalanma mərasimi oldu. 

Sənədi Azərbaycanın daxili işlər naziri Ramil Usubov, Türkiyənin daxili işlər naziri Rüştü Kazım Yucelen, Gürcüstanın daxili işlər naziri Koba Narçemaşvili imzaladılar.

Sonda prezidentlər və daxili işlər nazirləri birlikdə xatirə şəkli çəkdirdilər.

X X X

İmzalanma mərasimindən sonra elə həmin salonda Azərbaycanın, Türkiyənin və Gürcüstanın dövlət başçılarının birgə mətbuat konfransı oldu. Türkiyə Respublikasının Prezidenti Əhməd Necdət Sezər, Azərbaycan Respublikasının Prezidenti Heydər Əliyev və Gürcüstan Prezidenti Eduard Şevardnadze bəyanatla çıxış etdilər.

Sonra prezidentlər jurnalistlərin suallarına cavab verdilər.

X X X

Aprelin 30-da Prezident Heydər Əliyev, Prezident Əhməd Necdət Sezər, Prezident Eduard Şevardnadze böyük öndər Mustafa Kamal Atatürkün Trabzondakı köşkünü və muzeyini ziyarət etdilər.

X X X

Elə həmin gün dövlət başçıları Trabzondakı dövlət su işləri təsislərinə gedərək, bu müəssisənin işi ilə tanış oldular. Sonra Türkiyə Respublikasının Prezidenti Əhməd Necdət Sezərin adından Azərbaycan Respublikasının Prezidenti Heydər Əliyevin və Gürcüstan Prezidenti Eduard Şevardnadzenin şərəfinə rəsmi qəbul təşkil edildi.

SƏFƏR BAŞA ÇATDI

Rəsmi qəbuldan sonra Azərbaycan Prezidenti Heydər Əliyev və Gürcüstan Prezidenti Eduard Şevardnadze hava limanına gəldilər. Ali qonaqları burada Türkiyə dövlətinin başçısı qarşıladı. Prezidentlər hava limanında birgə görüş keçirdilər.

Görüşdən sonra respublikamızın rəhbəri Bakıya yola düşdü. Trabzon hava limanında dövlətimizin başçısının şərəfinə fəxri qarovul dəstəsi düzülmüşdü. Prezident Heydər Əliyev və Prezident Əhməd Necdət Sezər Türkiyə və Azərbaycan nümayəndə heyətlərinin üzvləri ilə səmimiyyətlə görüşdülər. Prezidentlər fəxri qarovul dəstəsinin önündən keçdilər.

Azərbaycan Respublikasının Prezidenti Heydər Əliyev və Türkiyə Respublikasının Prezidenti Əhməd Necdət Sezər təyyarənin pilləkəni yanında mehribanlıqla görüşüb sağollaşdılar.

Azərbaycan Prezidenti Heydər Əliyev elə həmin gün Bakıya gəldi.

X X X

X X X

Prezident HEYDƏR ƏLİYEV Binə hava limanında jurnalistlərə müsahibə verdi:

- Trabzon zirvə görüşünün gedişi və yekunları, güman edirəm ki, sizə məlumdur. Çünki televiziya vasitəsilə hamısı verilibdir. Ona görə də bu barədə sizə əlavə məlumat verməyə ehtiyac yoxdur. Ancaq onu qeyd etmək istəyirəm ki, bu, çox əhəmiyyətli görüş idi. Üç ölkənin - Türkiyə, Gürcüstan və Azərbaycan prezidentlərinin zirvə görüşünün məqsədi bizim bölgədə bir neçə əsas sahələrdə əməkdaşlığı gücləndirməkdən ibarətdir. Bunlar beynəlxalq terrorizmlə mübarizədir, bölgənin təhlükəsizliyinin təmin olunmasıdır və Şərq-Qərb enerji dəhlizinin, yəni Bakı-Tbilisi-Ceyhan, Bakı-Tbilisi-Ərzurum neft və qaz kəmərlərinin mühafizəsi, təhlükəsizliyinin təmin edilməsidir. Əsasən bu məsələlər bizim toplaşmağımıza, belə bir regional əməkdaşlıq etməyimizə səbəb olmuşdur. Bu təşəbbüsü Türkiyə Cümhuriyyətinin Prezidenti hörmətli Əhməd Necdət Sezər irəli sürmüşdü. Orada bəyan etdim, bu gün bir daha deyirəm ki, bu, çox dəyərli təşəbbüsdür və mən görülən işlərdən də çox məmnunam.

SUAL: Cənab Prezident, təkbətək görüşlərdə hansı məsələlər müzakirə olundu?

CAVAB: Təkbətək görüşlərdə, təbiidir ki, birinci növbədə iki ölkə arasında olan münasibətlər, bütün sahələrdə - həm iqtisadi, həm də başqa sahələrdə əməkdaşlığın inkişaf etdirilməsi barədə söhbət getdi, habelə yenə bölgəmizdə olan vəziyyəti təhlil edib fikir mübadiləsi apardıq.

SUAL: Dağlıq Qarabağ məsələsinə toxunuldumu?

CAVAB: Bəli, Dağlıq Qarabağ məsələsinə toxunuldu. Həm Əhməd Necdət Sezərlə, həm də Eduard Şevardnadze ilə mənim görüşlərimdə Ermənistan-Azərbaycan, Dağlıq Qarabağ münaqişəsi haqqında söhbət getdi və xüsusən Türkiyə Cümhuriyyətinin Prezidenti Əhməd Necdət Sezərlə bu barədə çox ətraflı danışdıq. Çünki, bilirsiniz ki, Türkiyə Minsk qrupunun üzvüdür və bu qrupun həmsədrləri axırıncı dəfə bölgədə olandan sonra Ankaraya getmişdilər, Türkiyənin Prezidenti və başqa şəxslərlə də görüşmüşdülər. Aparılan işlər, vəziyyət haqqında məlumatlar vermişdilər.

Bundan əlavə, Ermənistan-Azərbaycan münaqişəsi baş verəndən Azərbaycanı birmənalı dəstəkləyən bir ölkədir. Tək dəstək vermək deyil, o, bəyan edib, bu gün də bu bəyanatında qalır və Türkiyənin Prezidenti bunu yenə də təkrar etdi ki, Ermənistan-Azərbaycan münaqişəsi sona çatmayana qədər, Ermənistan silahlı qüvvələri Azərbaycan torpaqlarından çıxmayana qədər, bu torpaqlar işğaldan azad olunmayana qədər Türkiyə Ermənistanla sərhədlərini açmayacaq və heç bir əməkdaşlığa getməyəcəkdir.

SUAL: Cənab Prezident, Reykyavikdə Türkiyə, Azərbaycan və Ermənistan görüşünü keçirməkdə məqsəd nədir?

CAVAB: Reykyavik görüşü Türkiyə tərəfinin, onların təşəbbüsü ilə olacaqdır. Biz də ona etiraz etməmişik. Ola bilər ki, hər bir görüşün əhəmiyyəti olsun.

SUAL: İmzalanan sənəddə narkotiklərin qanunsuz dövriyyəsi ilə bağlı məsələ öz əksini tapdı. Son vaxtlar Dağlıq Qarabağın adı bu məsələdə çox tez-tez hallanır. Bununla bağlı Dağlıq Qarabağda fəaliyyət necə tənzimlənəcək?

CAVAB: Bilirsiniz, bu, çox mürəkkəb məsələdir. Bu barədə bir şey demək olmaz.

SUAL: Neft kəmərlərinin mühafizəsində hər bir ölkə öz ərazisindən keçən hissəyə cavabdehdir. Ola bilərmi ki, hansısa ölkə məsələn, Gürcüstan çətinlik çəksə, Azərbaycan və Türkiyə ona kömək göstərsinlər?

CAVAB: Siz niyə qabağa qaçırsız? Biz orada razılaşmışıq ki, hər ölkə öz ərazisində kəmərlərin təhlükəsizliyini təmin edəcəkdir. Mən güman edirəm ki, hər bir ölkə bu təhlükəsizliyi təmin etməyə qadirdir. Biz əməkdaşlıq edirik, əgər, şayət, nə vaxt, nə isə olsa, onda bu məsələləri həll edəcəyik. İndidən bu məsələni ortaya atmağa ehtiyac yoxdur.

SUAL: Cənab Prezident, Rusiyanın ATƏT-in Minsk qrupundakı keçmiş həmsədri Vladimir Kazimirov bildirib ki, Ermənistan və Azərbaycan prezidentlərinin xüsusi nümayəndələrinin Praqada keçiriləcək görüşləri kifayət qədər əhəmiyyətlidir. Buna münasibətiniz necədir?

CAVAB: O, öz fikrini bildiribdir. Biz isə başqa fikirdəyik.

SUAL: Cənab Prezident, Yunanıstan Azərbaycan qazının Türkiyə ərazisindən öz ölkəsinə və oradan da Avropaya nəql edilməsini təklif etmişdi. Siz cənab Sezərlə görüşünüzdə bu məsələyə toxundunuzmu?

CAVAB: Ay qızım, bunların hamısı, gələcəyin işləridir. Gəlin, əvvəlcə biz Azərbaycan qazını Türkiyəyə aparıb çatdıraq, Türkiyəni istənilən qədər təmin edək, Türkiyəyə qaz nəql etmək imkanlarımız artsın, sonra, əlbəttə, bizim fikrimiz gələcəkdə Avropaya çıxmaqdır. Ola bilər ki, Yunanıstan da bu sırada olsun. Amma bu, çox uzaq gələcəyin işidir. Başınızı belə şeylərlə ağrıtmayın.

SUAL: Cənab Prezident, Ankarada Azərbaycan səfirliyinin yeni binasının açılışı nə vaxt olacaq?

CAVAB: İnşallah, bu yaxınlarda olacaq.

Hörmətli jurnalistlər, görürəm, sizin əməlli suallarınız yoxdur. Sual naminə sual vermək lazım deyildir. Mən, sadəcə, sizə məsləhət görürəm ki, belə görüşlərə gələndə əvvəldən hazırlaşın, hərəniz bir yaxşı sual hazırlayın. Onda doğrudan da məzmunlu, günün tələbinə çox aid olan sual verən jurnalist kimi görünərsiniz. Bu da o məsələ barədə sizə geniş məlumat verməyə imkan yaradacaqdır. Amma elə suallar verirsiniz ki, bunlara aldığınız cavabı da görürsünüz. Ona görə də siz bundan o qədər faydalana bilmirsiniz. Sağ olun.

X X X

Azərbaycan Prezidenti Heydər Əliyevi Binə hava limanında Milli Məclisin sədri Murtuz Ələsgərov, baş nazir Artur Rasizadə, Prezidentin İcra Aparatının rəhbəri Ramiz Mehdiyev və digər rəsmi şəxslər qarşıladılar.

AZƏRTAC

Foto Y.Xəlilovundur