TÜRKİYƏ YAZIÇISININ ƏSƏRİ BAKIDA RUS DİLİNDƏ ÇAP OLUNMUŞDUR
AZƏRTAC xəbər verir ki, “Mütərcim” nəşriyyatı müasir Türkiyə ədəbiyyatının tanınmış nümayəndələrindən biri, yazıçı-dramaturq Həsən Erkəyin “Eşik” adlı ikihissəli pyesini rus dilində (Xasan Erkek. Poroq. Baku) çap etmişdir.
Ədibin bu əsəri 1997-ci ildə İstanbulda Yunus Əmrə mükafatına layiq görülmüş, fransız və ingilis dillərinə tərcümə olunmuşdur. Nəşr olunduğu gündən bu əsərin həm Türkiyədə, həm də xaricdə böyük oxucu marağı ilə qarşılandığını nəzərə alan “Mütərcim” Tərcümə Mərkəzi onu rus dilinə çevirərək çap etmişdir.
Həsən Erkək gənc olmasına baxmayaraq, ondan artıq pyesin müəllifidir. Əsərləri bir sıra xarici ölkələrdə işıq üzü görən müəllif 10-na yaxın ədəbi müsabiqənin mükafatını almışdır. Hazırda Türkiyədə yaşayan və teatr sahəsində fəaliyyət göstərən dramaturq “Eşik” pyesini ötən əsrin 90-cı illərində qələmə almışdır.
Xalq nəğmələrindən geniş istifadə olunmuş pyes real türk kəndinin həyatını, onun adət-ənənələrini və müasir durumunu əks etdirməklə bir ailənin taleyindən danışır. Bütün detalların düşünüldüyü, ümumiləşdirildiyi əsərdə öz doğma kəndini tərk edərək texnikanın daha çox inkişaf etdiyi şəhərə axışan kəndli ailələlərinin rastlaşdıqları çətinliklərdən, keçirdikləri sarsıntılardan bəhs olunur.
Bölmənin digər xəbərləri
