Bakı, 13 aprel (AZƏRTAC). Tələbə Qəbulu üzrə Dövlət Komissiyasından (TQDK) bildirmişlər ki, 2010/2011-ci tədris ili üçün Türkiyənin ali təhsil müəssisələrinin magistraturalarına qəbul elan edilir.

Türkiyənin ali təhsil müəssisələrinin magistraturalarına Azərbaycan Respublikası ali təhsil müəssisələrinin bakalavriat pilləsini bitirmiş və ya cari ildə bakalavriat pilləsinin sonuncu kursunda təhsil alan, 1 yanvar 2010-cu il tarixinədək yaşı 27-yə çatmamış, bakalavriat pilləsi üzrə orta balı 5 ballıq qiymət şkalasında 4-dən (100 ballıq şkalada - 70-dən) aşağı olmayan Azərbaycan vətəndaşları qəbul oluna bilərlər. Dövlət hesabına təhsil alan magistrantlar və magistrlər, həmçinin hərbi xidmətdən möhləti olmayan şəxslər bu hüquqa malik deyillər.

Türkiyənin ali təhsil müəssisələrinin magistraturalarına qəbul olunmaq istəyən bakalavrlar ölkəmizin ali təhsil müəssisələrinin magistraturalarına qəbul imtahanının birinci mərhələsini müvəffəqiyyətlə keçdikdən sonra mayın 11-dən 14-dək Tələbə Qəbulu üzrə Dövlət Komissiyasına şəxsiyyət vəsiqəsini, hərbi mükəlləfiyyəti olanlar hərbi xidmət haqqında sənədini təqdim edib qeydiyyatdan keçməlidirlər (ünvan: akademik Həsən Əliyev küçəsi, 17).

Türkiyənin ali təhsil müəssisələrinin magistraturalarına qəbul olunmaq üçün qeydiyyatdan keçən bakalavrlar ixtisaslaşma seçimi mərhələsində ölkəmizin ali məktəblərinin magistratura pilləsinə qəbul olunmaq üçün nəzərdə tutulmuş elektron ərizədə Azərbaycan Respublikası ali təhsil müəssisələrinin magistratura pilləsi üzrə ixtisaslaşmalarının kodları ilə yanaşı, Türkiyə ali təhsil müəssisələrinin magistratura pilləsi üzrə ixtisaslaşmalarının kodlarını da göstərə bilərlər.

Türkiyə ali təhsil müəssisələrinin magistratura pilləsi üzrə ixtisaslaşmalarına müsabiqə ölkəmizin ali təhsil müəssisələrinin magistratura pilləsi üzrə ixtisaslaşmalarının müsabiqəsi ilə birgə aparılacaqdır.

Türkiyə ali təhsil müəssisələrinin magistratura pilləsi üzrə qəbul aparılan ixtisaslaşmaları ölkəmizin ali təhsil müəssisələrinin bakalavriat pilləsini müvafiq istiqamət və ixtisaslar üzrə bitirən şəxslər seçə bilərlər.

Türkiyənin ali təhsil müəssisələrinin magistratura pilləsində təhsil almaq hüququ qazanan Azərbaycan vətəndaşları imtahanın nəticələri elan olunduqdan sonra üç gün ərzində ölkəmizin Təhsil Nazirliyində qeydiyyatdan keçməlidirlər.

Türkiyənin ali təhsil müəssisələrinin magistratura pilləsinə qəbul olunanlar bir tədris ili ərzində həmin ölkədə hazırlıq kursu keçdikdən sonra orada təşkil olunacaq buraxılış-qəbul imtahanlarını müvəffəqiyyətlə verdikləri təqdirdə seçdikləri ixtisaslaşmalara uyğun olaraq Türkiyə Respublikası Yüksək Öyrətim Kurulu tərəfindən ali təhsil müəssisələrinə yerləşdiriləcəklər.