“UBS AG” BANKI ARTIQ ÇEMPİONU MÜƏYYƏNLƏŞDİRMİŞDİR
AZƏRTAC xarici KİV-lərə istinadla xəbər verir ki, İsveçrənin iri “UBS AG” bankı futbol üzrə XIII Avropa çempionatının final mərhələsində iştirak edəcək 16 yığma komandanın qələbəyə şansları ilə bağlı ənənəvi araşdırmasını aparmışdır.
Tədqiqata əsasən, final görüşündə İtaliya komandası üzərində qələbə qazanacaq Çexiya yığması qitə çempionu olacaqdır. Bankın ekspertləri öz proqnozlarında komandaların FİFA-nın reytinq siyahısında yerlərinə, yığmaların əvvəlki illərdə bir-biri ilə keçirdikləri oyunların nəticələrinə, hətta oyunçuların transfer qiymətinə əsaslanmışlar.
Mütəxəssislərin fikrinə əsasən, dörddəbir finala “A” qrupundan Çexiya və İsveçrə, “B” qrupundan Almaniya və Polşa, “C” qrupundan İtaliya və Hollandiya, “D” qrupundan isə İspaniya və Yunanıstan komandaları çıxacaqlar. Bu mərhələdə isə İspaniya Hollandiyaya, Yunanıstan İtaliyaya, Almaniya İsveçrəyə, Polşa isə Çexiyaya uduzacaqdır. Yarımfinalda isə italyanlar hollandları, çexlər isveçrəliləri məğlub edəcəklər.
Maraqlıdır ki, bankın futbol üzrə 2006-cı il dünya çempionatı ərəfəsində turnirin qalibi barədə verdiyi proqnoz özünü doğrultmuşdu.
Bölmənin digər xəbərləri
