Üçüncü Respublika Xalq Teatrları Festivalının ilk seçim mərhələsi Kürdəmirdə keçirilib
Bakı, 4 aprel, AZƏRTAC
Azərbaycanda xalq yaradıcılığının inkişafı, qorunması və təbliğinə dəstək məqsədilə nazirlikdə “Azərbaycan Xalq Yaradıcılığının 2019-2023-cü illər üzrə inkişafına dair Strateji Fəaliyyət Planı” hazırlanaraq təsdiq edilib. Həmin fəaliyyət planında xalq teatrlarının əhalinin estetik zövqünün formalaşdırılması və asudə vaxtının səmərəli təşkilində rolunun artırılması üçün sistemli işlərin, o cümlədən festival, müsabiqə, forum və digər tədbirlərin təşkili nəzərdə tutulur.
“Azərbaycan Xalq Yaradıcılığının 2019-cu 2023-cü illər üzrə İnkişafına dair Strateji Fəaliyyət Planı”na müvafiq olaraq Kürdəmir rayonunda III Respublika Xalq Teatrları Festivalının ilk seçim mərhələsi keçirilib.
Mədəniyyət Nazirliyindən AZƏRTAC-a bildirilib ki, festivalın seçim mərhələsində Kürdəmir, Bərdə və Sabirabad regional mədəniyyət idarələrinin tabeliyində fəaliyyət göstərən mədəniyyət mərkəzləri, evləri və klublarında fəaliyyət göstərən xalq teatrı kollektivləri iştirak edib.
Hazırda respublikanın paytaxt və regionlarında, o cümlədən Naxçıvan Muxtar Respublikasında 37 xalq teatrı fəaliyyət göstərir. Bu teatrlarda milli dramaturgiyanın parlaq əsərləri ilə yanaşı xarici müəlliflərin də bir sıra əsərləri hazırlanıb tamaşaçılara təqdim edilir. Teatrların repertuarında vətənpərvərlik, Qarabağ mövzuları xüsusi yer tutur.
Kürdəmir rayon Mədəniyyət Mərkəzində təşkil edilən tədbirdə ilk olaraq Füzuli rayon Mədəniyyət evinin Xalq teatrı “Xocalı” kompozisiyası ilə çıxış edib. Kompozisiyanın mövzusu vətənpərvərlik hissləri, xalqımıza qarşı törədilmiş vandalizmin ictimaiyyətə bir daha xatırladılması, eyni zamanda, tezliklə vətən torpağının işğaldan azad olmasına köklənmiş qələbə ruhu idi.
Beyləqan rayon Mədəniyyət Mərkəzinin Xalq teatrı iki tamaşa nümayiş etdirib. Azərbaycanın qədim nağıllarından olan Göyçək Fatmanın nağılı əsasında qurulan “Ağıllı Fatma” tamaşasının yeni, müasir baxış tərzində səhnələşdirilməsi xalq teatrlarında zamanın tələblərinə uyğun tamaşaların hazırlanması barədə əvvəlki festivallarda verilmiş tövsiyələrin nəticəsi idi. Tamaşa münsiflər heyəti tərəfindən yüksək qiymətləndirilib. Daha sonra milli vətənpərvərlik hisslərini daşıyan “O yurda bayrağı biz taxacağıq” kompozisiyası göstərilib. Məlumat verilib ki, həmin kompozisiya mütəmadi olaraq hərbi hissələrdə, məktəblərdə və s. yerlərdə gənc nəslə milli ruhun aşılanması məqsədilə nümayiş etdirilir.
Seçim mərhələsi çərçivəsində Bərdə Mədəniyyət Mərkəzinin Xalq teatrı Süleyman Rüstəmin “Çimnaz xanım yuxudadır” tamaşasını yüksək professionallıqla nümayiş etdirib. Komediya janrında hazırlanmış tamaşa münsiflər heyəti tərəfindən yüksək qiymətləndirilib.
Yevlax şəhər Yaradıcılıq evinin Xalq teatrı ikipərdəli “Qadınlar” tamaşası müasir dramaturgiyanın məhsulu olaraq peşəkar səviyyədə quruluş verilmiş formatda hazırlanıb. Personajları ifa edən həvəskar aktyorlar münsiflər heyəti tərəfindən rəğbətlə qarşılanıb. Daha sonra həmin xalq teatrı kollektivi tərəfindən Lev Qraçın “Cırtqoz” pyesi səhnələşdirilib. Komediya janrında hazırlanan tamaşa xüsusi diqqət çəkib.
Sabirabad Mədəniyyət Mərkəzinin Adil İsgəndərov adına Xalq Teatrı tərəfindən Üzeyir Hacıbəylinin “Ər-arvad” komediyası nümayiş edilib. Klassik dramaturgiyanın məşhur əsərlərindən biri kimi tamaşa münsiflər heyətinin rəğbətini qazanıb. Bununla yanaşı həmin xalq teatrı tərəfindən milli vətənpərvərlik ruhunda “Haradan başlayır vətən” tamaşasından fraqmentlər nümayiş etdirilib.
Daha sonra Yevlax Mədəniyyət Mərkəzinin Kukla Xalq teatrı tərəfindən “Dəli Keçi” tamaşası nümayiş etdirilib. Bildirilib ki, mədəniyyət mərkəzində mütəmadi olaraq uşaqlar üçün təşkil edilən tamaşalar böyük həvəslə baxılır və qiymətləndirilir.
Qeyd edirik ki, Mədəniyyət Nazirliyinin müvafiq əmri ilə festivalın seçim mərhələsində fərqlənən kollektivlərin Bakı şəhərində təşkil olunması planlaşdırılan final mərhələsinə dəvət edilməsi məqsədilə münsiflər heyəti təyin edilib.
III Respublika Xalq Teatrının Kürdəmirdə keçirilmiş seçim mərhələsi çərçivəsində peşəkar rejissor, aktyorlar tərəfindən xalq teatrlarına ustad dərsləri keçirilib.
Bölmənin digər xəbərləri
