RƏSMİ XRONİKA
XALQIMIZIN DOSTLUĞUNU VƏ ƏMƏKDAŞLIĞINI İNKİŞAF ETDİRMƏK NAMİNƏ
AZƏRBAYCAN PREZİDENTİ HEYDƏR ƏLİYEVİN İRANA RƏSMİ SƏFƏRİ BAŞLANDI
Heydər Əliyev yola düşməzdən qabaq iki qonşu və dost ölkənin münasibətlərinin perspektivləri barədə jurnalistlərin suallarına cavab verərək demişdir ki, İran Prezidenti Əli Əkbər Haşimi-Rəfsəncani altı ay bundan qabaq Azərbaycanda rəsmi səfərdə olmuşdur. İki dövlət arasında bir sıra sahələrdə əməkdaşlıq haqqında uzunmüddətli müqavilələr bağlanmışdır. Hazırda həmin müqavilələr həyata keçirilir. İran Prezidenti məni bu ölkəyə rəsmi səfərə dəvət etmişdir. Mən bu dəvətdən istifadə edərək bizim üçün dost və qardaş ölkəni ziyarət edəcəyimdən çox məmnunam. İrana səfərim ayrı-ayrı sahələr üzrə müqavilələr bağlanması ilə tamamlanmayacaqdır. Aparılacaq danışıqlar, keçiriləcək görüşlər xalqlarımız arasında əlaqələrin inkişafına kömək edəcəkdir.
Binə hava limanında Azərbaycan Prezidentini respublika Ali Sovetinin sədri Rəsul Quliyev, Baş nazir Surət Hüseynov və digər rəsmi şəxslər yola salmışlar.
Səfərdə Azərbaycan Prezidentini dövlət müşavirləri Arif Rəhimzadə, Nurəddin Sadıqov, Qabil Hüseynli, Hidayət Orucov, xarici işlər naziri Həsən Həsənov, Baş nazirin müavinləri Səməd Sadıqov, Elçin Əfəndiyev, Əsgər Məmmədov, Qafqaz Müsəlmanları İdarəsinin sədri şeyxülislam Hacı Allahşükür Paşazadə, Milli Məclisin bir qrup üzvü, bir sıra nazirliklərin rəhbərləri, elm, ədəbiyyat, mədəniyyət xadimləri, jurnalistlər müşayiət edirlər.
Hava limanında Azərbaycan Respublikasının və İran İslam Respublikasının dövlət bayraqları qaldırılmışdı. Azərbaycan Prezidentinin şərəfinə fəxri qarovul dəstəsi düzülmüşdü. Prezidentlər fəxri qarovul dəstəsinin önündən keçərək onlar üçün nəzərdə tutulan tribunaya qalxdılar. Azərbaycan Respublikasının və İran İslam Respublikasının dövlət himnləri çalındı. Fəxri qarovul dəstəsinin rəisi prezidentlərə raport verdi.
Hava limanında hər iki prezident Azərbaycan, İran və xarici ölkə jurnalistləri üçün qısa bəyanat verdilər.
Rəsmi qarşılanma mərasimindən sonra Azərbaycan Prezidenti onun üçün ayrılmış iqamətgaha gəldi.
Günün ikinci yarısında Heydər Əliyev və onu müşayiət edən şəxslər İmam Xomeyninin məqbərəsini ziyarət etməyə yola düşdülər. Ölkəmizin Prezidenti möhtəşəm məqbərəyə daxil olarkən Azərbaycan Respublikasının və İran İslam Respublikasının dövlət himnləri səsləndi. Heydər Əliyev İmam Xomeyninin qəbrini ziyarət etdi və oraya əklil qoydu.
Ziyarətdən sonra Azərbaycan dövlətinin başçısı İran İslam Respublikası Prezidentinin iqamətgahına gəldi. Burada Heydər Əliyev İran Prezidenti Haşimi-Rəfsəncani ilə görüşdü. Azərbaycan Prezidenti İrana rəsmi dəvət edildiyi üçün minnətdarlığını bildirərək dedi ki, dost və qardaş xalqlarımız arasında əlaqələrin daha da möhkəmlənməsində bu səfərin də mühüm rolu olacaqdır.
Heydər Əliyev İran İslam İnqilabı rəhbərinin məqbərəsini ziyarət etməsindən söhbət açaraq dedi ki, Həzrət İmam Xomeyninin İran xalqı qarşısında və islam dünyasında böyük xidmətləri vardır. Azərbaycan nümayəndə heyəti məqbərəni böyük hörmət və ehtiramla ziyarət etdi. Mən çox məmnun qaldım ki, İran xalqı öz rəhbəri üçün belə əzəmətli məqbərə ucaltmışdır. Həzrət İmam Xomeyninin məqbərəsi öz möhtəşəmliyi ilə diqqəti cəlb edir.
Prezident daha sonra bildirdi ki, Azərbaycanın görkəmli rəssamı Kamil Əliyev üzərində İmam Xomeyninin təsviri olan sənət əsəri – xalça hazırlamışdır. Həmin xalça İranda beynəlxalq sərgidə göstərilmiş və İran xalqı bu əsərə böyük rəğbətlə tamaşa etmişdir. Heydər Əliyev həmin xalçanı hədiyyə olaraq İran İslam Respublikasının Prezidenti Əli Əkbər Haşimi-Rəfsəncaniyə təqdim etdi. İran rəhbəri xalçanı yüksək qiymətləndirərək bildirdi ki, bu, həqiqətən tərifəlayiq, çox qiymətli bir əsərdir.
Görüşdən sonra Azərbaycan Respublikası və İran İslam Respublikası arasında rəsmi danışıqlar başlandı. Heydər Əliyevin və Haşimi-Rəfsəncaninin başçılıq etdikləri nümayəndə heyətlərinin danışıqlarında Azərbaycan Respublikası ilə İran İslam Respublikası arasında bir sıra sahələrdə əməkdaşlığın daha da möhkəmləndirilməsi məsələləri geniş müzakirə olundu.
Elə həmin gün Azərbaycan Respublikasının xarici işlər naziri Həsən Həsənov ilə İran İslam Respublikasının xarici işlər naziri Əli Əkbər Vilayəti arasında görüş keçirildi. Görüşdə hər iki ölkəni maraqlandıran bir sıra məsələlər müzakirə olundu, əməkdaşlığın perspektivləri barədə geniş fikir mübadiləsi aparıldı.
Axşam İran İslam Respublikasının Prezidenti Əli Əkbər Haşimi-Rəfsəncani Azərbaycan Respublikasının Prezidenti Heydər Əliyevin şərəfinə rəsmi ziyafət verdi.
Aslan Aslanov
AZƏRTAC–ın xüsusi müxbiri
Tehran
