Bakı, 20 yanvar (AZƏRTAC). Dövlət Sərhəd Xidmətinin (DSX) bütün hərbi hissələrində 20 Yanvar faciəsinin 20-ci ildönümü ilə əlaqədar silsilə tədbirlər keçirilir, xalqımızın qürur mənbəyinə çevrilmiş 20 Yanvar şəhid­lərinin xatirəsi ehtiramla yad edilir.

DSX-nin mətbuat xidmətindən bildirmişlər ki, bu tədbirlər çərçivəsində respublikamızın ali, orta ixtisas və orta təhsil müəssisələrinin tələbə və şagirdlərinin DSX-nin Heydər Əliyev Elmi Araşdırmalar Mər­kəzinə ekskursiyaları təşkil olunmuşdur. Tələbə və şagirdlərə ulu öndər Heydər Əliyevin milli istiqlalımızın əldə olunmasında və qorunmasındakı misilsiz xidmətləri, Qanlı Yanvar hadisələri ilə bağlı atdığı cəsarətli addımlar barədə ətraflı məlumatlar verilmişdir.

DSX-nin mərkəzi aparatında 20 Yanvar faciəsinin 20-ci ildönümü ilə əlaqədar tədbir keçi­rilmişdir.

Mərasimdə DSX rəisinin müavini gene­ral-mayor Məhəmməd Abbasquliyev, AMEA-nın müxbir üzvü, akademiyanın Tarix İnstitutunun direktoru, Milli Məclisin deputatı, professor Yaqub Mahmudov çıxış edərək 20 Yanvar faciəsi barədə ətraflı məlumat vermiş, sovet qoşunlarının Bakı şə­hərində və respublikamızın digər şəhər və bölgələrində törətdikləri vəhşiliklər, faciənin səbəb və nəticələrindən danışmışlar.

Çıxışlarda qeyd olunmuşdur ki, respublikamızın ərazi bütöv­lüyünə qarşı yönəlmiş təcavüzə etiraz səsini ucaldan, haqq-ədalətin bərqərar edilməsini istəyən, azadlıq, müstəqillik uğrunda şərəfli mübarizə aparan Azərbaycan xalqının inam və iradəsini qırmaq, milli mənliyini alçaltmaq məqsədi ilə totalitar sovet rejiminin keçirdiyi bu terror aktını xalqımız təkcə hüzn hissi ilə deyil, həm də böyük fəxarət hissi ilə qeyd edir. O qanlı faciə göstərdi ki, xalqımız milli istiqlal və dövlətçilik ideyalarına sıx bağlıdır. Bu qanlı hadisə sovet imperiyasının qaniçənliyini təsdiqləməklə yanaşı, həm də xalqımızın azadlıq əzminin sarsılmaz olduğunu sübuta yetirmişdir. Sovet ordusunun ölkəmizdə axıtdığı qanlar xalqımızın yaddaşını oyatmış, qəhrəmanlıq ənənələrini təzələmişdir.

Xüsusi vurğulanmışdır ki, o qanlı hadisəyə kəskin etiraz olaraq 1990-cı il yanvarın 21-də ümummilli liderimiz Heydər Əliyev Azərbaycanın Moskvadakı daimi nümayəndəliyinə gedərək mətbuat konfransı keçirmiş, hadisəyə siyasi qiymət vermişdir. Bu qətiyyətli mövqe respublika­mızın informasiya blokadasına alındığı ağır günlərdə totalitar rejimə sarsıdıcı zərbə idi. Ulu öndər çürü­məkdə olan kommunist rejiminin gerçək simasını açmış, xalqımızın suveren hüquqla­rına qəsd olunduğunu bildirmişdir. Görkəmli siyasi xadim çıxışında 20 Yanvar faciəsinin Ermənistanın Azərbaycana qarşı ərazi iddiaları ilə bağlı olduğunu, ermənilərin separatçı və işğalçı fəaliyyətinin üstündən iki il keçməsinə baxmayaraq, ölkə rəhbərliyinin bu sahədə heç bir iş görmədiyini xüsusi vurğulamış və bunların nəticəsində çoxlu insan qırğını ilə müşahidə olunan hərbi müdaxilənin baş verdiyini bəyan etmişdir.

Çıxış edənlər bildirmişlər ki, nə 1990-cı il yanvarın 21-də Moskvadakı Azərbaycan nümayəndəliyinə gedərək Kreml rəhbərliyinə etiraz edilməsinə, nə də 20 Yanvar hadisələrinə siyasi-hüquqi qiymət verilməsi üçün təşəbbüs göstərilməsinə Heydər Əliyevdən başqa heç bir siyasətçinin cəsarəti çata bilməzdi. Bunun üçün siyasətçidən zamanın gözünə dik baxmağı bacarmaq, siyasi müdriklik zirvəsində dayanmaq, xalqın taleyi ilə yaşamaq, millətin sabahını düşünmək, dövləti və dövlətçiliyi bütün meyarlardan üstün tutmaq keyfiyyətləri tələb olunurdu. Bütün bunlar yalnız Heydər Əliyev şəxsiyyətində cəmləşmişdi. Məhz ona görə də 20 Yanvar hadisələrinə ilk etiraz etmək, bu hadisələrə ilk dəfə siyasi qiymət vermək missiyasını da yalnız Heydər Əliyev yerinə yetirmiş və bunun nəticəsində faciələrimizin səbəblərini araşdırmaq, onlara obyektiv hüquqi-siyasi qiymət vermək, hadisələrdən düzgün nəticə çıxarmaq imkanı yaranmışdır.

Mərasimdə qeyd olunmuşdur ki, 20 Yanvar xalqımızın milli mənliyinə, azadlıq ruhuna qarşı təcavüz idi. Lakin Azərbaycan xalqı öz qürurunu itirmədi, onun iradəsi qırılmadı, əksinə daha da gücləndi. Xalqımızın qan yaddaşına yazılmış “Qara Yanvar” eyni zamanda tariximizin qəhrəmanlıq səhifəsidir. Bu səhifəni yazan şəhidlərimiz heç zaman unudulmayacaqlar.

######