XARİCİ İŞLƏR NAZİRLİYİNİN MƏTBUAT MƏRKƏZİ XƏBƏR VERİR
Məlum olduğu kimi, Azərbaycan Respublikasının xarici işlər naziri Vilayət Quliyev Azərbaycanın erməni separatçı rejimi tərəfindən işğal edilmiş Dağlıq Qarabağ bölgəsində ermənilər tərəfindən keçirilməsi nəzərdə tutulan “prezident seçkiləri” ilə əlaqədar Avropa Şurasının Baş Katibi Valter Şvimmerə məktub ünvanlamışdır.
Bununla əlaqədar olaraq, Avropa Şurasının Baş Katibi Valter Şvimmer Azərbaycan Respublikasının xarici işlər naziri Vilayət Quliyevin ünvanına cavab məktubu göndərmişdir. Məktubda qeyd edilmişdir ki, Ermənistan və Azərbaycan Avropa Şurasına daxil olan zaman Dağlıq Qarabağ münaqişəsinin beynəlxalq hüquq prinsiplərinə uyğun həll edilməsi və qonşu ölkələrə qarşı güc tətbiq olunmasından qətiyyətlə imtina edilməsi ilə bağlı üzərlərinə öhdəlik götürmüşdülər.
Erməni separatçı rejimi tərəfindən keçirilməsi nəzərdə tutulan “seçkilərə” münasibət bildirən Valter Şvimmer beynəlxalq ictimaiyyət tərəfindən tanınmamış de fakto hakimiyyətin təşkil etdiyi seçkilərin Avropa Şurası tərəfindən də tanınmayacağını və bu beynəlxalq qurumun Dağlıq Qarabağ münaqişəsi ilə bağlı mövqeyini dəyişdirməyəcəyini məktubda xüsusilə qeyd etmişdir.
Məktubda daha sonra Avropa Şurası tərəfindən ATƏT-in Minsk Qrupu çərçivəsində gedən danışıqlar prosesinin dəstəkləndiyi və münaqişənin həlli üçün Venesiya komissiyasının yardımının təklif edildiyi bildirilmişdir.
Bölmənin digər xəbərləri
