Lənkəran, 9 mart (AZƏRTAC). Martın 9-da Lənkəran Şəhər İcra Hakimiyyətində Yaponiya hökumətinin “Ot kökləri və insan təhlükəsizliyi” qrant yardımı proqramı çərçivəsində həyata keçiriləcək iki layihə üzrə qrant müqavilələrinin imzalanması mərasimi olmuşdur.

AZƏRTAC xəbər verir ki, “Lənkəran rayonunun Xarxatan kəndinin su təchizatı sisteminin qurulması” layihəsinə əsasən kənddə yeni artezian quyusu qazılacaq, su anbarı inşa ediləcək, 2 kilometr uzunluğunda kənddaxili su xətləri çəkiləcək və müxtəlif yerlərdə su kranları quraşdırılacaqdır.

Bu layihə üçün Yaponiya hökumətinin ayırdığı qrant yardımının ümumi məbləği 100 min 493 ABŞ dolları təşkil edir.

“Lerik rayonunun Şingədulan kəndində tibb məntəqəsinin tikintisi” ilə bağlı ikinci layihənin ümumi məbləği isə 102 min 696 ABŞ dolları təşkil edir.

Hər iki qrant sazişini imzalamaq məqsədi ilə Yaponiyanın Azərbaycandakı səfiri Şusuke Vatanabe Lənkəran rayonuna gəlmişdir.

Qrant müqavilələrinin imzalanma mərasimində çıxış edən Lənkəran Şəhər İcra Hakimiyyətinin başçısı Tofiq İbrahimov səfir Şusuke Vatanabeni Lənkəran torpağında salamlamış, rayonun coğrafi mövqeyi, əhalinin məşğulluğu, sosial-iqtisadi inkişafı barədə qonağa məlumat vermişdir.

Azərbaycanda bütün sahələrdə olduğu kimi, sosial sahələrdə də böyük uğurların qazanıldığını vurğulayan T.İbrahimov bildirmişdir ki, regionların sosial-iqtisadi inkişafına dair ikinci Dövlət Proqramında nəzərdə tutulan tədbirlərə müvafiq olaraq Lənkəran rayonunda smeta dəyəri 170 milyon ABŞ dolları təşkil edən su və kanalizasiya sisteminin yenidən qurulmasına başlanılmışdır.

Mərasimdə çıxış edən Yaponiyanın Azərbaycandakı səfiri Şusuke Vatanabe Lənkəran rayonuna ikinci dəfə gəlişindən məmnun olduğunu bildirmişdir.

Yaponiya hökumətinin “Ot kökləri və İnsan təhlükəsizliyi” qrant yardımı proqramı çərçivəsində 2002-ci ildə Lənkəran rayonunun Ləj kəndində orta məktəb üçün yeni binanın tikintisi, 2006-cı ildə rayonda “quş qripi” əleyhinə laboratoriyanın təkmilləşdirilməsi layihələrinin həyata keçirildiyini diqqətə çatdıran yaponiyalı diplomat Lənkəranda həyata keçiriləcək üçüncü layihənin 4 ay müddətində başa çatdırılacağını bildirmişdir.

Ötən il Yaponiyada baş vermiş təbii fəlakət zamanı göstərilən dəstəyə görə Azərbaycan xalqına və Prezident İlham Əliyevə minnətdarlığını bildirən səfir Şusuke Vatanabe ölkəsinin Azərbaycan ilə iqtisadi sahədə əməkdaşlığı daha da genişləndirmək niyyətində olduğunu vurğulamışdır.

Qrant layihələrinin icraçıları Azərbaycan Demokratik Tələbə Gənclər Təşkilatının sədri Asif Əsgərli və Yerli İdarəetməyə Yardım İctimai Birliyinin sədri Vüsal Mirzəyev çıxışlarında Yaponiya hökumətinin “Ot kökləri və insan təhlükəsizliyi” qrant yardımı proqramı çərçivəsində ölkəmizdə, o cümlədən cənub bölgəsində həyata keçirilən layihələr barədə məlumat vermişlər.

Sonra qrant müqavilələri imzalanmışdır.

Qrant sazişlərini Yaponiya hökuməti tərəfindən bu ölkənin Azərbaycandakı səfiri Şusuke Vatanabe, Azərbaycan Demokratik Tələbə Gənclər Təşkilatının sədri Asif Əsgərli və Yerli İdarəetməyə Yardım İctimai Birliyinin sədri Vüsal Mirzəyev imzalamışlar.

Mərasimin sonunda Lənkəran Şəhər İcra Hakimiyyətinin başçısı Tofiq İbrahimov yaponiyalı qonağa Lənkəran rayonu haqqında videodisk və kitablar hədiyyə etmişdir.