Yaponiyada İmmiqrasiya bürosunun statusu agentlik səviyyəsinə qaldırılıb
Tokio, 2 aprel, AZƏRTAC
Yaponiyada immiqrasiya nəzarəti barədə yeni qanunun qüvvəyə minməsi ilə əlaqədar İmmiqrasiya bürosunun statusu yüksəldilərək agentlik səviyyəsinə dəyişdirilib.
AZƏRTAC xəbər verir ki, bu münasibətlə keçirilən mərasimdə ədliyyə naziri Takaşi Yamaşita yeni İmmiqrasiya Xidmətləri Agentliyi lövhəsinin açılışını edib.
Bildirilib ki, agentlik immiqrasiya haqqında yeni qanunun icrasını həyata keçirəcək. Yeni qanun müəyyən əmək vərdişlərinə malik əcnəbilərin iki növ viza alaraq yaşamaq və işləmək üçün Yaponiyada qalmalarına şərait yaradacaq.
Mərasimdə çıxış edən nazir bildirib ki, yeni agentlik Yaponiyada təhlükəsizliyin təmin olunması məqsədilə ölkəyə giriş və burada yaşayış qaydalarına tam əməl edilməsinə çox ciddi nəzarət edəcək.
Agentliyin rəhbəri Syoko Sasaki isə deyib ki, hökumət əvvəllər heç vaxt yaponların əcnəbilərlə yanaşı yaşayışının təmini üçün cəmiyyətin həyatında bu qədər hərtərəfli əlaqələndirməni həyata keçirməyib. S.Sasaki bunun dəqiq cavab tələb edən ciddi çağırış olduğunu vurğulayıb.
Qeyd edilib ki, bütün ölkə üzrə səkkiz regional şöbəyə malik agentliyin işçilərinin ümumi sayı 5400 nəfərdən çox olacaq.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
