YAPONİYALI QONAQLAR “ŞİMAL” DRES-DƏ OLMUŞLAR
“Böyük İpək Yolu” enerji missiyasının rəhbəri, Yaponiya xarici işlər nazirinin birinci müavini Seyken Suqiuranın başçılığı ilə ölkəmizə səfərə gəlmiş nümayəndə heyətinin üzvləri iyulun 18-də “Şimal” DRES-də olmuşlar. Burada qonaqları respublika baş nazirinin müavini Abid Şərifov, yanacaq və energetika naziri Məcid Kərimov, “Azərenerji” və “Azəriqaz” SC-lərinin rəhbərləri qarşılamışlar.
Qonaqlara məlumat verilmişdir ki, gələn həftə stansiyanın yeni qurğusu aşağı təzyiqli qazı qəbul etməyə hazır olacaq və bundan sonra sazlama-buraxılış işlərinə başlanacaqdır. Qurğunun sınaqdan keçirilməsi üçün isə avqust ayında yüksək təzyiqli qaz veriləcək və bu proses noyabrın sonunadək başa çatmalıdır.
“Azərenerji” SC-nin prezidenti Etibar Pirverdiyev nümayəndə heyətini Abşeron yarımadasında elektrik enerjisi hasilatının artırılması ilə bağlı layihələrlə tanış etmişdir. O, ümidvar olduğunu bildirmişdir ki, Azərbaycan Prezidenti Heydər Əliyevin Yaponiyaya rəsmi səfəri zamanı əsası qoyulmuş səmərəli əməkdaşlıq bundan sonra da genişlənəcəkdir.
Cənab Seyken Suqiura stansiyada görülən işlərdən razı qaldığını bildirərək demişdir: Biz əminik ki, Yaponiyanın “Mitsui” şirkəti tərəfindən “Şimal” DRES-də 400 meqavat gücündə yeni buxar-qaz qurğusunun tikintisi Azərbaycanın elektroenergetika sahəsində sonuncu layihə olmayacaq, əksinə, Yaponiya-Azərbaycan münasibətlərinin daha da möhkəmlənməsinin davamı olacaqdır.
“Azərenerji”nin mətbuat xidmətindən bildirmişlər ki, “Şimal DRES-də 2000-ci ilin iyulunda başlanmış tikinti işləri nəzərdə tutulmuş cədvəl üzrə gedir. Hazırda yeni stansiyada çalışacaq mütəxəssislər üçün təkmilləşdirmə kursları da keçirilir. Obyekt bu ilin noyabrında istifadəyə veriləcəkdir.
Bölmənin digər xəbərləri
