YENİ AZƏRBAYCAN PARTİYASININ ÜZVLƏRİNİN SAYI 450 MİN NƏFƏR OLDU
AZƏRTAC xəbər verir ki, Yeni Azərbaycan Partiyası üzvlərinin sayı 450 min nəfərə çatmışdır.
Beləliklə, Yeni Azərbaycan Partiyası nəinki ölkəmizin, eyni zamanda bölgənin ən böyük siyasi təşkilatı olduğunu, geniş ümumxalq etimadı qazandığını təsdiq edən göstəricilərdən biri kimi partiya üzvlərinin artımında növbəti zirvəni fəth etmişdir. Təkcə 2008-ci ilin 5 ayı ərzində partiya sıralarına 16 mindən artıq yeni üzv qəbul olunmuşdur.
Yeni Azərbaycan Partiyası üzvlərinin sayının 450 minə çatması faktı xüsusilə, prezident seçkiləri ərəfəsində ölkənin həyatında çox mühüm siyasi əhəmiyyətə malik faktdır.
Bu fakt bir daha sübut edir ki, YAP sıralarına qoşulan hər bir vətəndaş, eyni zamanda bir seçici kimi qarşıdan gələn prezident seçkilərində artıq öz seçimini etmişdir. YAP üzvlərinin sayının belə bir templə artımı ilk növbədə partiyanın banisi və qurucusu ümummilli lider Heydər Əliyevin ideyalarına və bu siyasi xəttin layiqli davamçısı Azərbaycan Prezidenti və Yeni Azərbaycan Pariyasının sədri İlham Əliyevə ümumxalq etimadın parlaq nümunəsidir.
Yeni Azərbaycan Partiyasına getdikcə daha çox marağın yaranmasını şərtləndirən ən başlıca amillərdən biri Prezident İlham Əliyevin davam etdirdiyi siyasi xəttin uğurlu nəticələri və bunun məntiqi davamı olaraq Azərbaycanın nail olduğu yüksək iqtisadi yüksəlişdir. Yeni Azərbaycan Partiyasının sıralarına xüsusilə gənclərin axınının güclənməsi isə Prezident İlham Əliyevin rəhbərliyi ilə həyata keçirilən siyasətə və iqtisadi islahatlara gəncliyin inamının göstəricisidir.
Bölmənin digər xəbərləri
