Yeni nəqliyyat magistralı - Macarıstan-Serbiya-Rumıniya
Budapeşt, 1 may, AZƏRTAC
Macarıstan hökuməti ölkənin cənub və qərb sərhədləri boyunca şəhərlərini qonşu Serbiya və Rumıniya ilə birləşdirəcək 500 kilometr uzunluqda dəmir yolu xəttinin tikintisinə 800 milyard forint (təqribən 2,5 milyard avro) ayırmaq niyyətindədir.
AZƏRTAC Macarıstanın “Délmagyarország” qəzetinə istinadla xəbər verir ki, bu layihənin həyata keçməsinə 8-10 il vaxt tələb olunur.
Dəmir yolu Peç (Budapeştdən 200 kilometr cənub-qərbə), Seqed (173 kilometr cənub-şərqə) və Debresen (230 kilometr şərqə) şəhərlərini, həmçinin Voyevodina (Serbiya) muxtar əyalətində Subotisa və Rumıniyada Oradya şəhərlərini birləşdirəcək.
Bildirilir ki, Baş nazir Viktor Orban bu təklifi qəbul edib. Dəmir yolu xəttinin tikintisi bu yaxınlarda Serbiya və Macarıstan hökumətlərinin Nazirlər Kabinetinin birgə iclasında müzakirə edilib.
Pərvanə Qarayeva
AZƏRTAC-ın xüsusi müxbiri
Budapeşt
Bölmənin digər xəbərləri
