Azərbaycan xalqı gecə-gündüz şaxtalı-qarlı havada orada öz haqlarını tələb edən gənclərlə fəxr edir

Bakı, 14 yanvar, Məmməd İsayev, AZƏRTAC

Artıq 34 gündür ki, Laçın-Xankəndi yolunda Azərbaycan könüllülərinin iştirakı ilə torpaqlarımızda ekoloji cinayətə son qoyulması tələbi ilə fasiləsiz dinc aksiyanı davam etdiririk. Havanın çox şaxtalı və soyuq olmasına baxmayaraq, Azərbaycan könüllülərinin əhval-ruhiyyəsi yaxşıdır. Bizim ilk gündən indiyədək tələblərimiz eynidir. Əsas tələbimiz ekoloji terrora son qoyulmasıdır. Bizim tələblərimiz ekoloji tarazlığı qorumaqdır. Eləcə də Xankəndidə olan təbii sərvətlərimizin qanunsuz talanmasının qarşısını tezliklə almaqdır. Biz sülhməramlıları vəzifələrini öz missiyalarına uyğun yerinə yetirmələrini israr edirik. Gün keçdikcə daha çox könüllülərimiz aksiyaya qoşulurlar.

Bunu Azərbaycan Könüllü Təşkilatları İttifaqının (AKTİ) sədri Yusif Vəliyev AZƏRTAC-a məxsusi müsahibəsində aksiya ilə bağlı təəssüratlarını bölüşərkən deyib.

“Biz yolu bağlamamışıq və biz istəyirik ki, ekoloji monitorinq qrupu müvafiq ərazilərə daxil olsun. Azərbaycan könüllüləri hər zaman milli maraqlar, dövlətimizin qüdrəti, Vətənimizin bütövlüyü naminə həmrəy olub. Qeyd edim ki, 2023-cü ili də mübariz Azərbaycan gəncliyinin və müzəffər xalqın nümayəndəsi kimi Şuşada qarşıladıq və bununla fəxr edirik”, - deyə o vurğulayıb.

Yusif Vəliyev bildirib ki, xüsusilə də yaxın günlərdə Prezident İlham Əliyevin yerli televiziya kanallarına müsahibəsi zamanı aksiya iştirakçılarına dəstək olaraq dediyi - “İlk növbədə, o gənclərə “Eşq olsun!” demək istəyirəm, onlar bizim fəxrimizdir. Qeyd etdiyiniz kimi, gecə-gündüz şaxtalı-qarlı havada oradadırlar, öz haqlarını tələb edirlər və bir daha Azərbaycan gəncinin nə qədər yüksək keyfiyyətlərə malik olmasını bütün dünyaya göstərirlər” sözləri məhz Azərbaycan könüllülərinə böyük motivasiya verib, qürur və fəxr hissi yaşadıb. Azərbaycan xalqı gecə-gündüz şaxtalı-qarlı havada orada öz haqlarını tələb edən gənclərlə fəxr edir. Biz bir daha bildirmək istəyirik ki, diplomatik tələblərimizə müsbət cavab alınadək biz dinc aksiyamızı böyük ruh yüksəkliyi ilə davam etdirəcəyik. Tələblərimiz yerinə yetirilənədək buradayıq və mövqeyimiz də qətidir.

AKTİ sədri bildirib ki, dünyadakı bəzi kütləvi informasiya vasitələri saxta məlumatlar yayaraq, dinc ekoloji aksiyamıza müəyyən don geyindirməyə çalışırlar. Amma hər şey göz önündədir. Aksiyanı izləyən bütün yerli və xarici media şahidi oldu ki, məhz sülhməramlılar keçdiyi zaman könüllülərimiz və gənclərimiz etik formada kənara çəkilərək onlara humanitar yardımlar üçün şərait yaradırlar. Sülhməramlılara məxsus avtomobillər bu yolla sərbəst hərəkət edirlər. Belə ki, bu yolda heç bir maneə yoxdur. Çünki bu sırf dinc və ekoloji aksiyadır.

Qeyd edək ki, ittifaq özündə ölkənin 24 aparıcı könüllü təşkilatından on minlərlə gənci birləşdirir. Azərbaycan könüllüsü hər zaman öz həmrəyliyi, mehribanlığı, qayğı və sevgi dolu fəaliyyəti ilə fərqlənməyi bacarıb. Artıq Azərbaycanda könüllülük bir çox fəaliyyət sferalarına nüfuz etməklə ümummilli hərəkata və gənclərimizin həyat tərzinə çevrilib.