Praqada Ümummilli Liderin yubileyinə həsr edilmiş şahmat turniri və rəsmi qəbul keçirilib VİDEO
Praqa, 11 may, AZƏRTAC
Xalqımızın Ümummilli Lideri Heydər Əliyevin anadan olmasının 100-cü ildönümü münasibətilə Azərbaycanın Çex Respublikasındakı səfirliyinin təşkilatçılığı və bu ölkənin Şahmat Federasiyasının dəstəyi ilə qrosmeysterlər və həvəskarlar arasında beynəlxalq şahmat turniri keçirilib.
AZƏRTAC xəbər verir ki, turnirdə Çexiya, Slovakiya, Ukrayna, Azərbaycan və digər ölkələrdən 30-dan çox şahmatçı iştirak edib.
Tədbirin rəsmi hissəsində çıxış edən ölkəmizin Çexiyadakı səfiri Adış Məmmədov Azərbaycan xalqının Ümummilli Lideri Heydər Əliyevin xalqımız və dövlətimiz qarşısındakı xidmətlərindən danışıb. Tarixdə liderlik arzusu ilə yaşayanların, liderlik etməyə cəhd edənlərın çox olduğunu, lakin məhz böyük fenomenal şəxsiyyətlərin həqiqi liderlik missiyasını axıra qədər daşıya bildiklərini vurğulayan diplomat Ulu Öndərin belə bir fenomenal şəxsiyyət olduğunu, müstəqil Azərbaycanın memarı kimi ölkəmizin dövlətçilik tarixində xüsusi yer tutduğunu diqqətə çatdırıb.
Səfir Ümummilli Lider Heydər Əliyevin siyasi hakimiyyətə qayıdarkən dövlətin ən çətin anlarında, ölkənin parçalanmaq təhlükəsində olduğu bir zaman Azərbaycanı öz siyasi müdrikliyi və dövlətçilik zəkası sayəsində xilas edərək, beynəlxalq münasibətlər sistemində özünəməxsus yeri olan, inkişaf etmiş ölkəyə çevirdiyini vurğulayıb.
Çex Respublikasının Şahmat Federasiyasının sədr müavini Yan Mazux Heydər Əliyevin anadan olmasının 100-cü ildönümünə həsr edilmiş şahmat turniri haqqında danışıb, turnirə yüksək reytinqli oyunçuların qatıldıqlarını diqqətə çatdırıb. Qaliblərə kubok və pul mükafatları, bütün iştirakçılara rəmzi hədiyyələr təqdim olunub.
Tədbir caz konserti ilə davam edib. Azərbaycandan dəvət edilmiş caz ifaçıları - Əməkdar artistlər Rain Sultanov və Şahin Növrəsli tərəfindən ifa edilən musiqi nömrələrinin sədaları altında Azərbaycan milli mətbəxinin nemətləri qonaqlara təqdim olunub.
Vüqar Seyidov
AZƏRTAC-ın xüsusi müxbiri
Praqa
Bölmənin digər xəbərləri
