Azərbaycanın uğurlarının əsasında Ulu Öndər Heydər Əliyevin siyasəti dayanır - ŞƏRH
Bakı, 3 oktyabr, AZƏRTAC
Şərqdə ilk demokratik respublikanı — Azərbaycan Xalq Cümhuriyyətini elan edən babalarımızın dövlətçilik ənənələri 1991-ci ildə Azərbaycan xalqının dövlət müstəqilliyini yenidən bərpa etməsi ilə davam etdirildi. O zaman Azərbaycan kifayət qədər mürəkkəb bir vəziyyətlə qarşılaşdı. Bir tərəfdən SSRİ-nin süquta uğraması ilə iqtisadi-siyasi münasibətlərin qırılması, digər bir tərəfdən Azərbaycanın ərazilərinin Ermənistan tərəfindən işğalı vəziyyəti çətinləşdirdi.
Bu sözləri AZƏRTAC-a açıqlamasında Milli Məclisin deputatı Məzahir Əfəndiyev deyib.
O xatırladıb ki, bu müstəqilliyin qorunması əldə olunmasından daha çətin olduğundan xalqımızın müdrik və dahi bir şəxsiyyətə ehtiyacı vardı. Bu məqamda haqlı olaraq qədirbilən Azərbaycan xalqı qanı və canı bahasına əldə etdiyi müstəqilliyin qorunması üçün müdrik siyasətçi, dahi şəxsiyyət Heydər Əliyevi siyasi hakimiyyətə dəvət etdi.
“Həmin dəvəti qəbul edərkən Ümummilli Lider Azərbaycan xalqını tək qoymayacağına və ölkənin tüğyan edən xaosdan çıxması üçün əlindən gələni edəcəyinə söz verdi. Ümummilli Lider problemlərin həlli üçün, ilk növbədə, bütün səylərini ölkədə vətəndaş həmrəyliyinin, sabitliyin təmin olunmasına yönəltdi və buna nail oldu.
Ulu Öndər 1993-cü il iyunun 15-də Azərbaycan Ali Sovetinin sədri seçildi və iyunun 24-də Milli Şuranın qərarı ilə Azərbaycan Prezidentinin səlahiyyətlərini icra etməyə başladı. Daha sonra, 1993-cü il oktyabrın 3-nə təyin edilmiş prezident seçkiləri Azərbaycan xalqı üçün mühüm tarixi hadisə, müstəqil Azərbaycan dövləti üçün isə Zəfərə gedən yolun ilk pilləsi oldu. Azərbaycan xalqı böyük səs çoxluğu ilə Heydər Əliyevi Prezident seçdi. 33 il bundan öncə müdrik xalqımız düzgün seçim etdi, ölkədə sabitliyin qorunmasına qərar verdi və öz seçimi ilə bugünkü qüdrətli, müstəqil Azərbaycan Respublikasının təməli qoyuldu.
Ulu Öndər 1993-cü il oktyabrın 10-da dövlətə və xalqa sədaqət andı içərək Prezident səlahiyyətlərinin icrasına başladı. O öz andına, sözünə daim sadiq qaldığını nəinki bütün Azərbaycan xalqına, həmçinin bütün dünyaya nümayiş etdirdi. Ümummilli Lider dövlət başçısı seçildikdən sonra müstəqil Azərbaycanın hüquqi və siyasi-iqtisadi suverenliyinin təmin olunması prosesi əsaslı şəkildə sürətləndi. Ölkədə uzun illər davam edən gərginlik və qarşıdurma səngidi, respublikamız vətəndaş müharibəsindən və parçalanma təhlükəsindən xilas oldu. İlk dəfə Ümummilli Lider tərəfindən dövlətçiliyin əsasları qoyuldu. Beləliklə, Azərbaycanın tarixində yeni dövrün – faktiki müstəqilliyin, demokratiya və inkişaf mərhələsinin başlanğıcı qoyuldu”, - deyə deputat qeyd edib.
O bildirib ki, Heydər Əliyev demokratiya, sərbəst iqtisadiyyat prinsiplərinin bərqərar olması, bazar iqtisadiyyatı və sahibkarlığın inkişafı kimi meyarların inkişafına hər zaman sadiqlik göstərib, milli tərəqqi naminə bu yolun alternativsizliyi fikrinin ictimai rəyə aşılanmasına nail oldu. Ulu Öndər dövlət idarəçiliyinin elmi əsaslarla inkişafına öz fəaliyyəti ilə əvəzsiz töhfələr verdi.
Məzahir Əfəndiyev vurğulayıb ki, milli ideologiyanın yaradılması Ulu Öndər Heydər Əliyevin rəhbərliyi ilə həyata keçirilən dövlət quruculuğu siyasətinin mühüm tərkib hissəsi oldu. Azərbaycançılıq ideologiyası təkcə bu dövlətin ərazisində yaşayan şəxsləri yox, eyni zamanda, bütün dünyada məskunlaşan azərbaycanlıları əhatə edən, dünya azərbaycanlılarını vahid ideologiya ətrafında birləşdirən milli məfkurəyə çevrildi.
“Nümayiş olunan düzgün və ardıcıl dövlət idarəçiliyi öz nəticəsini verməyə başladı, 2003-cü ildən sonra isə Ulu Öndərin layiqli davamçısı Prezident İlham Əliyev tərəfindən yeni müstəvidə inkişaf etdirildi. Məhz həmin vaxtdan keçən müddət ərzində Ümummilli Liderin “Mən ona özüm qədər inanıram” sözlərini əməlləri ilə təsdiq edən Prezident İlham Əliyev Azərbaycanda yeni bir dövrün başlanğıcının əsasını qoydu.
Beləliklə, bu gün Azərbaycanın hər bir platformada əldə etdiyi iqtisadi uğurlarının əsasında Ulu Öndər Heydər Əliyevin düzgün gələcəyə hədəflənmiş siyasəti dayanır”, - deyə deputat əlavə edib.
Bölmənin digər xəbərləri
