İmişlidə kanallar beton üzlüyə alınır VİDEO
İmişli, 31 yanvar, Aydın Yavərzadə, AZƏRTAC
İmişli rayonunda əkin sahələrində suvarma işlərinin daha da yaxşılaşdırılması üçün son illər görülən işlərin həcmi artırılıb.
AZƏRTAC-ın bölgə müxbiri xəbər verir ki, rayon ərazisində əsasən torpaq üzlüklü kanallar beton üzlüyə alınır. Bu, sahələrə suyun itkisiz çatması ilə yanaşı, həm də torpaq qatının şoranlaşmasının qarşısını alır.
İmişli Su Meliorasiya Sistemlərinin İstismarı İdarəsinin baş mühəndisi Asim Bədirov bildirib ki, idarə rayon ərazisində 54 min 200 hektar əkin sahəsinə 1140 kilometr uzunluqda suvarma kanalları vasitəsilə xidmət göstərir. Kanalların 430 kilometri beton üzlüklüdür. Hazırda rayonda əkin sahələrinə suyun optimal müddətdə və itkisiz çatdırılması üçün torpaq üzlüklü kanallar beton üzlüyə alınır.
Rayonun Qaralar və Muradallı kəndləri ərazilərində 280 hektar sahəyə xidmət göstərən və uzunluğu 5600 metr olan 4MK su kanalında 4800 metr hissədə betonlanma aparılıb, işlər davam etdirilir. Kanal üzərində 7 ədəd su buraxıcı və 7 ədəd səviyyə qaldıran qurğu var. Kanal saniyədə 3,5 kubmetr suburaxma gücündədir. Bundan başqa, Çaxırlı kəndi ərazisində ümumi uzunluğu 1750 metr olan Künc arx kanalının 750 metr hissəsində novlar quraşdırılıb. Rayon ərazisində əkin sahələrinin suvarılmasına xidmət göstərən ən böyük kanallar 42,7 kilometr uzunluqda olan Boztəpə və uzunluğu 29,5 kilometr olan Qızılarx kanalları da 2023-2024-cü illər ərzində beton üzlüyə alınıb. Ümumiyyətlə, tədbirlər planına əsasən, işlərin digər torpaq üzlüklü kanallarda da yerinə yetirilməsi nəzərdə tutulub.
Uzun illərdir əkinçiliklə məşğul olan Məzrəli kənd sakini Toğrul Alışov deyib ki, kanalların beton üzlüyə alınması məhsuldarlığa da müsbət təsir edib. “Məzrəli kənd ilə bərabər, daha 20 kəndin sakinləri bu kanaldan istifadə edir. Əvvəlki illərə nisbətən daha çox məhsul götürürük. Ötən il pambıq sahəsindən hər hektara 45 sentner məhsul yığdıq. Çünki sahələrə bol su verildi. Kanalların beton üzlüyə alınması həm də su itkisinin qarşısını alır və torpaq qatına su sızmaları baş vermir. Bu da sahələrin şoranlaşmasının qarşısını alır. Kanalların beton üzlüyə alınmasının digər müsbət tərəfi isə əkin sahələrində suvarma işlərinin vaxtında aparılmasına imkan yaratmasıdır”, - deyə o bildirib.
Qeyd edək ki, rayon ərazisində əsaslı təmir işlərindən başqa cari təmir işləri də yerinə yetirilir. Suvarma kanallarının lildən təmizlənməsi daim diqqət mərkəzində saxlanılır. Həmçinin mütəmadi olaraq suvarma işlərinin keyfiyyətli və vaxtında həyata keçirilməsi üçün hidroqurğularda cari təmir və yeniləmə işləri aparılır.
Bölmənin digər xəbərləri
