SİYASƏT
“ERMƏNİ MİLLƏTÇİLƏRİNİN NAXÇIVANA İDDİALARI VƏ TARİXİ GERÇƏKLİK” MÖVZUSUNDA DƏYİRMİ MASA KEÇİRİLMIŞDİR
İnstitutun direktoru, Milli Məclisin deputatı, professor Yaqub Mahmudov bildirmişdir ki, bu tədbirlə yeni bir hərəkat başlanır. İndən belə ayda bir dəfə alimlərin, təhsil işçilərinin, ziyalıların, ictimaiyyət nümayəndələrinin iştirakı ilə tariximizin bu və ya digər konkret probleminə həsr olunmuş belə toplantılar keçiriləcək, müzakirələr aparılacaqdır.
Direktor əmin olduğunu bildirmişdir ki, bu məclislərdə müzakirə olunacaq elmi mülahizələr, ortaya çıxarılacaq arqumentlər və faktlar kütləvi informasiya vasitələri nümayəndələrinin köməyi ilə daha geniş auditoriyaya, o cümlədən digər ölkələrə yayılacaqdır. Ermənilərin bu işi çoxdan başladığını deyən alim, vurğulamışdır ki, biz onlardan fərqli olaraq, tarixi faktların dili ilə danışacaq, arqumentlərə, arxeoloqların obyektiv nəticələrinə arxalanacağıq.
Yaqub Mahmudov ermənilərin əsrlər boyu tarixi saxtalaşdırmaq yolu ilə torpaqlarımıza, maddi-mədəni abidələrimizə iddiasından danışmış, indiki Ermənistan ərazisində türk toponimlərini erməniləşdirdiklərini, tarixi abidələrə qarşı vandalizm faktlarını xatırlatmışdır.
“Təhsil” Cəmiyyətinin sədri Nuğay Əliyev də tədbirin əhəmiyyətini, burada söyləniləcək faktların erməni iddialarına tutarlı cavab olacağına inandığını bildirmişdir.
Tarix elmləri doktoru Abbas Seyidov Naxçıvan Muxtar Respublikasının yarandığı tarixi şəraiti təhlil etmiş, XX əsrin əvvəllərində bağlanmış Gümrü, Moskva, Qars müqavilələrini, bu il martın 16-da ermənilərin Qars müqaviləsinin ləğvinə nail olmaq üçün Rusiya Prezidentinə, parlamentinə ünvanladıqları tarixi saxtakarlıqla dolu müraciətini xatırlatmışdır.
Qədim və orta əsrlər üzrə mütəxəssislər - AMEA-nın müxbir üzvü Nailə Vəlixanlı və tarix elmləri namizədi Solmaz Qaşqayın çıxışları ərəb və obyektivliyi şübhə doğurmayan digər mənbələrdən götürülmüş faktlara əsaslanmışdı. Bu mənbələrdə isə eramızdan da bir neçə min il əvvəldən eramızın XV əsrinədək Naxçıvan türk yurdu, Azərbaycanın tərkib hissəsi kimi göstərilmişdir. Culfa qəbiristanlığındakı “xaçkarlara” gəldikdə isə, onlar alban abidələridir və bu daşların ilk nümunələri hələ sovet dövründə Ermənistana aparılmışdır. Ümumiyyətlə, bu qəbiristanlığın “indiki” xristianlara aidiyyəti yoxdur. Natiqlər diqqəti “erməni” (“ər məni”) anlayışına da cəlb etmiş, yeri gəlmişkən, Qarabağdan danışarkən “erməni məlikləri” əvəzinə “alban məlikləri” ifadəsinin elmi cəhətdən doğru olduğunu bildirmişlər. Mütəxəssislər bir incəliyə də toxunmuşlar. Məsələ burasındadır ki, ərəb tarixçilərinin əsərlərində fərqli yazılmış yer adlarını ermənilər çox ustalıqla öz xeyirlərinə yozur və dünya ictimaiyyətini çaşdırırlar. Belə faktlara dair konkret misallar gətirilmişdir.
Dəyirmi masada AMEA-nın müxbir üzvü Məşədixanım Nemətin, tarix elmləri doktoru Vaqif Piriyevin, filologiya elmləri doktorları Elməddin Əlibəyzadənin, İsmayıl Vəliyevin, ekspertlər Əhməd Qəşəmoğlunun, Rövşən Novruzoğlunun və başqalarının da çıxışları, təklifləri maraqla qarşılanmışdır.
Belə müzakirələrə gənclərin və iş adamlarının da cəlb edilməsi barədə təkliflər səslənmişdir.
Yaqub Mahmudov müzakirələri yekunlaşdırmış, növbəti dəyirmi masanın mövzusu və yeri haqqında mətbuatda məlumat veriləcəyini diqqətə çatdırmışdır.