Bakı, 6 avqust (AZƏRTAC). Avqustun 6-sı tarixə Azərbaycanda söz və mətbuat üzərindən senzuranın götürülməsi günü kimi daxil olmuşdur.

Söz və mətbuat azadlığı demokratik cəmiyyətin əsas dəyərlərindəndir. Zəngin tarixi və mütərəqqi ənənələri olan Azərbaycan mətbuatı hüquqi dövlət və vətəndaş cəmiyyəti quruculuğunda demokratiyanın mühüm vasitəsi kimi çıxış edir. Cəmiyyətdə aşkarlığın və şəffaflığın təmin edilməsində, aktual ictimai problemlərin ümumxalq müzakirəsinə çıxarılmasında, sosial ədalət prinsiplərinin müdafiəsində mətbuatın xüsusi rolu vardır. Bu baxımdan ümummilli lider Heydər Əliyevin 1998-ci il avqustun 6-da imzaladığı “Azərbaycan Respublikasında söz, fikir və mətbuat azadlığının təmin edilməsi sahəsində əlavə tədbirlər haqqında” Fərman xüsusilə qiymətlidir. Həmin Fərmanla Azərbaycanda milli mətbuatın demokratik inkişafına dövlət qayğısı modeli təqdim edilmişdir. Ümummilli Lider Azərbaycana rəhbərlik dövrdə nəinki senzuranı ləğv etmiş, həm də azad mətbuatın qarantı olmuş, milli mətbuatımızın peşəkarlığının artırılmasına təkan vermişdir. Senzuranın ləğvindən sonra kütləvi informasiya vasitələri üzərindən əlavə dəyər vergisi götürülmüş, ölkəyə gətirilən qəzet kağızına tətbiq olunan gömrük rüsumu tamamilə azaldılmışdır.

1999-cu ildə “Kütləvi informasiya vasitələri haqqında” Azərbaycan Respublikası Qanununa əlavə və dəyişikliklər edilməsi qəzet, jurnal təsis etmək işini xeyli asanlaşdırmışdır. 2001-ci ildə ölkədə kütləvi informasiya vasitələrinə dövlət qayğısının artırılması haqqında verilən fərman və sərəncamlar mətbuata göstərilən qayğının həcmini daha da artırmışdır. Bunun nəticəsi olaraq 2002-ci ildə ümummilli lider Heydər Əliyev “Jurnalistlərin dostu” elan edilmişdir.

Ulu Öndərin mətbuata dövlət qayğısı istiqamətində həyata keçirdiyi siyasəti bu gün onun layiqli varisi Prezident İlham Əliyev uğurla davam etdirir. 2005-ci ildə mətbuatın 130 illik yubileyi ərəfəsində mətbu orqanlara güzəştli kreditlərin ayrılması dövlətin mətbuatın inkişafında maraqlı olduğunu bir daha təsdiqləmişdir. Həmin il qəzetlərin Azərbaycan nəşriyyatına olan borcları silinmiş, 30-dək kütləvi informasiya vasitəsinə maddi yardım edilmiş, 140-dək jurnalistə təqaüdlər, fəxri adlar, ordenlər və medallar təqdim olunmuşdur. 2008-ci ildə 38 mətbuat orqanının hər birinə 5000 manat, 2009-cu ildə 39 qəzet redaksiyasına ayrılıqda 10000 manat bir dəfəlik maliyyə yardımı ayrılmışdır.

Azərbaycanda söz və mətbuat azadlığının hüquqi təminatını təşkil edən mükəmməl qanunvericilik bazası yaradılmışdır. Dövlətimizin başçısı İlham Əliyevin mətbuatın 135 illik yubileyinin keçirilməsi, kütləvi informasiya vasitələrinə birdəfəlik maliyyə yardımlarının göstərilməsi, jurnalistlərin təltif olunmaları haqqında imzaladığı sərəncamlar bir daha göstərmişdir ki, dövlət bundan sonra da milli mətbuatın inkişafında maraqlıdır və bunun üçün bütün zəruri addımları atır.

Milli mətbuatın 135 illik yubileyi ərəfəsində jurnalistlərin daha bir hədiyyəsi isə Prezidentin müvafiq Sərəncamına əsasən, müasir tələblər səviyyəsində inşa edilən Mətbuat Şurasının yeni inzibati binasının açılışı olmuşdur. Açılış mərasimində iştirak edən Prezident İlham Əliyevin milli mətbuatın durumu və inkişaf perspektivləri, qarşıda duran vəzifələrə dair geniş və dolğun nitqində jurnalistika tədrisinin səviyyəsinin yüksəldilməsi, jurnalistlərin peşəkarlığının artırılması, kütləvi informasiya vasitələrinin reklam bazarının inkişaf etdirilməsi və digər məsələlərlə bağlı addımlar atılacağını bildirmişdir.

Ölkədə güclü, müstəqil, obyektiv informasiya daşıyıcısı olan, dövlətçilik prinsiplərinə sədaqət nümayiş etdirən, milli maraqların təəssübkeşi olan mətbuatın formalaşması və inkişafı dövlətin bu sahədəki siyasətinin əsas xəttini təşkil edir. Dövlətimizin başçısı digər peşə sahibləri kimi, jurnalistlərin də sosial vəziyyətinin, həyat şəraitlərinin yaxşılaşdırılmasını daim diqqətdə saxlayır.

Azərbaycan Prezidentinin “Azərbaycan mətbuat işçilərinin sosial müdafiəsinin gücləndirilməsi tədbirləri haqqında” 2010-cu il 22 iyul tarixli Sərəncamına uyğun olaraq mətbuat işçilərinin mənzil-məişət şəraitinin yaxşılaşdırılması istiqamətində mühüm addım atılmışdır. Həmin Sərəncama əsasən, jurnalistlər üçün Səbail rayonunun Bibiheybət qəsəbəsində 156 mənzildən ibarət 17 mərtəbəli bina inşa olunaraq bu il iyulun 22-də istifadəyə verilmişdir. Prezident İlham Əliyevin kütləvi informasiya işçilərinə mənzillərin verilməsi mərasimində iştirakı media təmsilçilərinə ikiqat bayram sevinci yaşatmışdır. Bununla da jurnalistlərə mənzil verilməsi təcrübəsi ilk dəfə Azərbaycanda tətbiq edilmişdir.

Mənzil alan jurnalistlər arasında müxtəlif siyasi baxışlara malik insanların olması isə bir daha təsdiqləmişdir ki, ölkəmizdə cəmiyyətin inkişafında, Azərbaycanın uğurlarının və həqiqətlərinin dünyaya yayılmasında xüsusi rolu olan jurnalistlər arasında ayrı-seçkiliyə yol verilmir. Elə həmin gün Azərbaycan Prezidenti tərəfindən jurnalistlər üçün inşa ediləcək növbəti binanın təməlinin qoyulması bir daha əminlik yaratmışdır ki, kütləvi informasiya vasitələri nümayəndələrinə dəstək və onların sosial məsələlərinin həlli istiqamətində işlər bundan sonra da davam etdiriləcəkdir.

Çətin və şərəfli yol keçən Azərbaycan mətbuatı bu gün özünün yeni inkişaf mərhələsini yaşayır. Hazırda ölkədə 4200-dən artıq mətbuat orqanı Ədliyyə Nazirliyində qeydə alınmışdır. Çoxsaylı gündəlik, həftəlik və aylıq qəzetlər nəşr olunur. Azərbaycan postsovet məkanında yeganə ölkədir ki, qəzet təsis etmək, yazılı media ilə məşğul olmaq üçün heç bir dövlət orqanından icazə almağa ehtiyac yoxdur. Bütün bunlar Azərbaycan Prezidentinin kütləvi informasiya vasitələrinə, jurnalist peşəsinə və əməyinə verdiyi yüksək qiymətin göstəricisidir.