Bütün dövlətlərin daxili işlərinə qarışan Fransa təhlükəsizlik yastığını daha makro hesab edir - ŞƏRH
Bakı, 17 may, AZƏRTAC
Fransa bar-bar bağırırdı ki, demokratiya, insan hüquq və azadlıqları ilə bağlı problemlər dövlətlərin daxili işi deyil, ümumbəşəri məsələlərdir. Bu ölkə car çəkirdi ki, xalqların öz müqəddəratını təyin etmək kimi toxunulmaz və müqəddəs hüquqları var, ona toxunmaq olmaz.
Makron Fransası və demokratiya, insan hüquq və azadlıqları, xalq və dövlət kimi anlayışlar barədə elə Emmanuel fransızcasında düşünən Qərb dövlətləri nə fikirləşirlər? Şərqi Avropanı sovetlərin boyunduruğundan çıxarıb xoşbəxt və müstəqil etmədiniz, elə öz boyunduruğunuzun altına saldınız. Çünki sizin üçün nə şərqi, nə qərbi, nə cənubi, nə də şimali Avropa yoxdur, sizin üçün bir Avropa var, o da yalnız özünüzsünüz. Digərlərinin hamısı - Moldovası da, Gürcüstanı da, Ukraynası da, Şərqi Avropa ölkələri də, sadəcə, təhlükəsizlik yastığı rolunu oynayır. Siz istənilən qanunu, qaydanı və hüququ poza bilərsiniz, bütün bunların nəticəsində nə olursa olsun, müharibə, pandemiya, hətta zəlzələ belə olsa, onlar sizi qorumalıdır. Fransanın yürütdüyü siyasət bizə bunu deməyə əsas verir.
Bu fikirləri AZƏRTAC-a açıqlamasında Siyasi və Hüquqi Araşdırmalar Mərkəzinin (SHAM) sədri Xəyal Bəşirov deyib.
Politoloq bildirib ki, Makron Fransası özü üçün təhlükəsizlik yastığını siyasətinə uyğun “mikro” deyil, soyadına uyğun olaraq daha “makro” hesab edir - Napoleon Bonapartın arzularından da böyük, elə yer kürəsinin özü boyda. Ona görə də demək olar bütün dövlətlərin daxili işlərinə burnunu soxur, ona dünyanın istənilən nöqtəsində bir söz deyəndə isə bildirir ki, daxili işimizdir, qarışmayın. Deyir ki, Atlantik okeanının Cənubi Amerika sahillərindəki Qviana, Şimali Amerika tərəfdə Karib dənizində Martinika, Qvadelupa da mənimdir. Hətta Sakit okeanda, Avstraliya sahillərində, Fransadan 15 min kilometr uzaqda yerləşən Yeni Kaledoniyanın da əbədi onun olacağını deyir. Bu məntiqlə belə çıxır ki, istənilən okeanda bir quruya daş atılsa, Fransa deyəcək mənim daxili işimdir, qarışmayın.
“Coğrafi olaraq anladıq, zor, dəyənək və silah gücünə, hətta Əlcəzairdə yüz minlərlə ərəbin və Ruandada on minlərlə husinin başını kəsmək kimi cinayətlərin gücünə də olsa, bunu edib. Bəs demokratiya, hüquq və azadlıqlar, xalqların öz müqəddəratını təyin etmək kimi özünə yad anlayışlardan dəm vuran Makron Fransası kanakların bütün hüquqlarını polis atlarının ayaqları altına ataraq tapdalayanda bu dünyanın və bəşəriyyətin deyil, Fransanın daxili işi olur? Təbii ki, bunun da cavabı var - ikiüzlülük, riyakarlıq, saxtakarlıq və elə bunların hamısını özündə birləşdirən makronluq.
Bütün bunların fonunda özünü dünyanın daxili işlərinin naziri hesab edən nazir Jeral Darmanən Azərbaycana qarşı riyakarcasına iftira ataraq deyir ki, Azərbaycan Yeni Kaledoniyada Fransanın daxili işlərinə qarışır, müstəqillik uğrunda mübarizə aparanlarla sövdələşib. İkiüzlü dünya, üçüzlü dövlətlər və çoxüzlü “Amnesty International”, “Human Rights Watch” və “Reporters Without Borders” kimi təşkilatlar da ağzına su alaraq bu hadisələrə susur. Ötən ilin sonunda Yeni Kaledoniyada baş verən iğtişaşlarla bağlı baş verənləri işıqlandırmaq üçün bütün lazımi icazələrə sahib olan Azərbaycan Dövlət İnformasiya Agentliyinin (AZƏRTAC) əməkdaşını əsassız şəkildə deportasiya edəndə də bu təşkilatlar lal, kar və kor olmuşdular”, - deyə X.Bəşirov qeyd edib.
Politoloq vurğulayıb ki, Azərbaycanın keçmiş Qarabağ münaqişəsinin ədalətli həlli ilə bağlı addımlarının nümunəsində bu güclər münaqişə həll etmək deyil, münaqişə istehsal etmək siyasətini yürüdürlər. Dünyada hegemonluq edən və maraqlarına uyğun gələndə danışan, gəlməyəndə isə bütün hissetmə duyğularını itirən dünya diplomatiyanın dilini kəsib, onu lal edib. Bu gün silahlar danışır. Elə bir vəziyyət yaradılıb ki, Avropa Sülh Fondu adı altında yaradılan qurum müharibə edən və ya etmək istəyən dövlətlərə silah paylayır.
Onun sözlərinə görə, bu siyasətin ortaya qoyduğu vəziyyət XXI əsrin üçüncü onilliyində Avropanın mərkəzində hər gün minlərlə, on minlərlə insanın həyatına son qoyan, evlərin və şəhərlərin yerlə-yeksan edilməsinə səbəb olan, on milyonlarla insanın doğma yerlərindən yüzlərlə km uzaq dövlətlərə qaçqın və məcburi köçkün kimi qaçmasına səbəb olan dəhşətli müharibənin iki ildən çoxdur ki, bitməsinə hər vəchlə maneə yaradır.
“Dünya güclərinin “uğurlu siyasəti”nin məntiqi sonluğudur ki, 70 ildən çoxdur başladılan, nə fələstinlilərin, nə də yəhudilərin maraqlarına zərrə qədər də xidmət etməyən və ən böyük zərbəni elə o iki xalqa vuran qanlı olaylar bu gün də davam edir.
Bu siyasətin nəticəsidir ki, ilin-günün bu vaxtında Avropanın mərkəzində Avropa İttifaqının və NATO-nun “ağsaqqal”larının sözünün qarşısında söz deyən bir dövlətin Baş naziri güllələnir. Bu yolla, əslində, daha böyük müharibəni və daha çox qanın tökülməsini qarşısına məqsəd qoyanlar özlərini baş verəcək növbəti dünya müharibəsinin təlatümlərindən nəinki Avropa üçün, bütün bəşəriyyət üçün üzqarası olan miqrantlarla bağlı pakt imzalamaqla qoruyacaqlarını düşünürlər. Özünüz deyirsiniz ki, kütlənin qarşısında heç bir güc duruş gətirə bilməz. İmzaladığınız o mürtəce pakt sizi qoruyacaqsa, buyurun, imzalayın və qorunun”, - deyə Xəyal Bəşirov fikirlərini yekunlaşdırıb.
Bölmənin digər xəbərləri
