ABŞ-ın ölkəmizdəki səfiri Rino Harniş martın 10-da Şəki şəhərinə gəlmişdir. AZƏRTAC-ın müxbiri xəbər verir ki, səfir burada 13 saylı körpələr evi-uşaq bağçasının əsaslı təmirdən sonra açılış mərasimində iştirak etmiş, daha sonra Azərbaycan Gənclərinin Nailiyyəti (AGN) təşkilatının şəhərdəki 18 saylı məktəbdə keçirdiyi iqtisadiyyat dərsində olmuşdur.

Şəhər təhsil şöbəsinin müdiri Firədun İbrahimov dəyərli hədiyyəyə görə ABŞ səfirinə Şəkinin təhsil işçiləri dərin adından minnətdarlığını bildirmişdir.

Mərasimdə çıxış edən səfir Rino Harniş ABŞ səfirliyi, ABŞ Avropa Komandanlığı və ABŞ Hərbi Əməkdaşlıq Şöbəsi adından belə bir tədbirdə iştirak etməsindən böyük məmnunluq duyduğunu bildirmiş, əsaslı təmirdən sonra açılış mərasiminin keçirildiyi bu binanın ABŞ səfirliyinin, Müdafiə Əməkdaşlığı İdarəsinin və “Dünya Ümid Beynəlxalq Azərbaycan Humanitar Təşkilatı”nın əməkdaşlığı vasitəsilə ABŞ xalqının Azərbaycan xalqına hədiyyəsi kimi qiymətləndirmişdir. Şəhərdəki internat məktəbin binasında da əsaslı təmir işlərinin başa çatdırıldığını diqqətə çatdıran diplomat qeyd etmişdir ki, son iki ildə ABŞ səfirliyinin xətti ilə Azərbaycanda artıq 7 körpələr evi əsaslı təmir olunmuşdur. Şəkinin ABŞ səfirliyinin yaddaşında xüsusi yeri olduğunu diqqətə çatdıran Rino Harniş hazırda burada ABŞ-ın “Sülh Korpusu” könüllülərinin çalışdıqlarını, Şəki ilə iqtisadiyyat, biznes və digər sahələrdə əməkdaşlığın gələcəkdə də mümkünlüyünü bildirmişdir.

Təhsil nazirinin müavini İsgəndər İsgəndərov, Nazirlər Kabineti aparatının məsul işçisi Ramin Talıblı, Şəki Şəhər İcra Hakimiyyətinin başçısı Nazim İbrahimov belə tədbirlərin gələcəkdə də davam etdiriləcəyinə əminliklərini ifadə etmişlər.

Körpələr evinin müdiri İradə Abbasova uşaqlar adından hörmətli qonağa xatirə hədiyyələri, o cümlədən təkəlduzla işlənmiş milli buta naxışı təqdim etmişdir.

Binanın açılışını bildirən rəmzi qırmızı lent kəsildikdən sonra mərasim iştirakçıları burada yaradılan şəraitlə yaxından tanış olmuşlar. Uşaq bağçasının və şəhərdəki internat məktəbin əsaslı təmirinə ABŞ-ın humanitar təşkilatları tərəfindən 380 min dollar məbləğində vəsait xərclənmişdir. Körpələr evində 285 nəfərə yaxın uşaq tərbiyə alacaqdır.

X X X

Səfərin proqramına uyğun olaraq, ABŞ səfiri Rino Harniş daha sonra AGN təşkilatının Azərbaycanda yaratdığı məktəblər şəbəkəsinə daxil olan 18 saylı məktəbin qonağı olmuşdur. Səfir məktəbdə ABŞ-ın Beynəlxalq İnkişaf Agentliyinin (USAİD) maliyyələşdirdiyi “Azərbaycan məktəblərində iqtisadiyyatın tədrisi” proqramına əsasən keçirilən iqtisadiyyat dərsində iştirak etmiş, interaktiv təlimin tədris metodologiyası ilə tanış olmuş, şagirdlərə əmək məhsuldarlığına dair mühazirə oxumuşdur.