AMEA-nın Gəncə Bölməsinin institutlarında ötən il 30 elmi-tədqiqat işi aparılıb
Bakı, 15 yanvar. AZƏRTAC
AMEA-nın Gəncə Bölməsinin institutlarında 2021-ci ildə on üç problemə aid iyirmi üç mövzu üzrə otuz elmi-tədqiqat işi aparılıb, on dörd iş və qırx bir mərhələ tamamlanıb, bir patent və yeddi mühüm nəticə alınıb.
AMEA-dan AZƏRTAC-a bildirilib ki, bunu Rəyasət Heyətinin növbəti iclasına onlayn qatılan Gəncə Bölməsinin sədri akademik Fuad Əliyev söyləyib.
Bölmənin mühüm nəticələrini təqdim edən Fuad Əliyev Naftalan nefti və tullantılarını kanserogen birləşmələrdən təmizləmək məqsədilə yerli materiallar - bentonit-seolit əsasında yeni tərkibli adsorbentlərin hazırlandığını, onların adsorbsiya xüsusiyyətlərinin tədqiq edildiyini diqqətə çatdırıb. O, həmçinin texniki məqsədlər üçün istifadəsi mümkün olan polietilen tullantısından və Yuxarı Ağcakənd yatağı gipsindən optimal nisbətdə keyfiyyətli kompozisiya materialının alındığını vurğulayıb. Akademik, eyni zamanda, qərb bölgəsi bitkilərindən boyaq maddəsinin ayrılması xüsusiyyətlərinin tədqiq edildiyini, Korçay Dövlət Təbiət Qoruğunda isə 15 fəsil və 30 cinsə dахil оlаn 56 növ mаmırın yаyılmasının müəyyənləşdirildiyini bildirib.
Bölmənin digər xəbərləri
