Azərbaycan Respublikasının ədliyyə naziri Fikrət Məmmədovun başçılıq etdiyi nümayəndə heyəti Niderland Krallığının ədliyyə naziri cənab Benk Kortalsın dəvəti ilə fevralın 4-6-da bu ölkədə rəsmi səfərdə olmuşdur.

Azərbaycan nümayəndə heyəti səfər çərçivəsində ədliyyə və xarici işlər nazirliklərində, penitensiar təşkilatlar üzrə milli agentlikdə, ədliyyə şurasında və Haaqa Beynəlxalq Məhkəməsində görüşlər keçirmiş, Haaqadakı “Şeveningen” penitensiar kompleksinə gedərək məhbusların saxlanması şəraiti ilə tanış olmuşdur.

İki ölkənin ədliyyə nazirlərinin arasında aparılan danışıqlar və digər görüşlər zamanı Azərbaycan və Niderlandın müvafiq dövlət qurumları arasında əlaqələr yaradılması, təcrübə və informasiya mübadiləsi, ümumən ölkələrimizin münasibətlərinin perspektivləri və qarşılıqlı maraq doğuran digər məsələlər diqqət mərkəzində olmuşdur. Fikrət Məmmədov Azərbaycan Prezidenti Heydər Əliyevin rəhbərliyi altında ölkəmizdə hüquqi dövlət quruculuğu istiqamətində həyata keçirilən islahatlar və əldə edilən nailiyyətlər barədə geniş məlumat vermişdir. Səfər çərçivəsində “Azərbaycan Respublikasının Ədliyyə Nazirliyi ilə Niderland Krallığının Ədliyyə Nazirliyi arasında əməkdaşlıq üzrə qarşılıqlı anlaşma haqqinda memorandum” imzalanmışdır. Bu sənəd nazirliklər arasında təcrübə və informasiya mübadiləsini, ədliyyə orqanları əməkdaşlarının qarşılıqlı təlimini və hər iki ölkə vətəndaşlarının bir-birinin ərazisində olmaları ilə bağlı məsələlər üzrə əməkdaşlığı nəzərdə tutur.

Nazir Fikrət Məmmədov Helsinki Vətəndaş Assambleyasının siyasi direktoru cənab Faber və Niderland parlamentinin deputatı cənab Yürqens ilə də görüşmüş, respublikada hüquqi-demokratik dövlət quruculuğu sahəsində görülən işlərdən danışmışdır.

Azərbaycan nümayəndə heyəti Haaqada fəaliyyət göstərən “Azərbaycan-Türk Mədəniyyət Cəmiyyətləri”nin sədri C.Qaragöz və cəmiyyətin bir qrup üzvü ilə də görüşmüşdür. Nümayəndə heyətinin başçısı bu ölkədə yaşayan soydaşlarımızın problemləri ilə maraqlanmış, dünya azərbaycanlılarının I qurultayının qərarlarında irəli sürülmüş vəzifələrin yerinə yetirilməsi ilə bağlı məsələlər ətrafında fikir mübadiləsi aparmışdır.

Yusif Xəlilov

AZƏRTAC-ın xüsusi müxbiri

Berlin