RƏSMİ XRONİKA


AZƏRBAYCAN RESPUBLİKASININ PREZİDENTİ HEYDƏR ƏLİYEV BÖYÜK BRİTANİYANIN BAŞ NAZİRİ CON MEYCOR İLƏ GÖRÜŞMÜŞDÜR

Azərbaycan Respublikasının Prezidenti Heydər Əliyev mayın 6-da Londonda Böyük Britaniyanın Baş naziri Con Meycor ilə görüşmüşdür.

Con Meycor dövlətimizin başçısını səmimi salamladı, onun dəvətini qəbul edərək qələbənin 50 illiyinə həsr olunmuş şənliklərdə iştirak etmək üçün Londona gəldiyinə görə minnətdarlığını bildirdi. Heydər Əliyev bu dəvətə görə cənab Meycora bir daha təşəkkür etdi və onunla görüşməkdən məmnun olduğunu söylədi.

Baş nazir Con Meycor Azərbaycan Prezidenti ilə əvvəlki görüşlərini yaxşı xatırladığını vurğuladı və dövlətlərimiz arasında əlaqələrin inkişaf etdirilməsi barədə keçən ilin fevralında Londonda bağlanan sazişin böyük əhəmiyyətini qeyd etdi. İngiltərə hökuməti başçısının fikrincə, artıq Azərbaycanla Böyük Britaniya uzunmüddətli tərəfdaşa çevrilirlər.

Əməkdaşlığımızın inkişaf etdirilməsi üçün hər iki tərəfdən atılan addımların böyük əhəmiyyətə malik olduğunu söyləyən Heydər Əliyev Xəzərin Azərbaycana aid hissəsindəki neft yataqlarının birgə işlənməsi barədə respublikamızla Böyük Britaniya arasında imzalanmış müqavilənin həyata keçirilməsi sahəsində vəziyyətdən bəhs etdi. O dedi ki, Azərbaycan Böyük Britaniyanın bir sıra neft şirkətləri ilə sıx əməkdaşlıq edir. 30 il müddətinə “Britiş Petroleum”un 17 faiz paya malik olduğu bir müqavilə imzalanmışdır. Heydər Əliyev ölkələrimiz arasında münasibətlərin daha da inkişaf etdirilməsinə tərəfdar olduğunu söylədi.

Dövlətimizin başçısı Ermənistanla Azərbaycan arasındakı müharibədə vəziyyət barədə İngiltərənin Baş nazirinə geniş söhbət açdı və dedi ki, bir ilə yaxın müddətdə atəşkəsə əməl olunsa da, ölkəmizin bir sıra torpaqları Ermənistanın işğalı altında qalmaqdadır, bu ərazidən qaçqın düşmüş bir milyondan çox vətəndaşımız ağır vəziyyətdə yaşayır. Heydər Əliyev müharibənin sülh yolu ilə başa çatmasında Azərbaycanın Böyük Britaniyanın dəstəyinə ciddi ehtiyacı olduğunu vurğuladı, ölkəmizin ərazi bütövlüyünün təmin olunmasına kömək göstərməyi İngiltərə hökumətindən xahiş etdi. Prezidentin fikrincə, Böyük Britaniya ATƏT çərçivəsində öz fəaliyyətini daha da genişləndirə bilər. O, Budapeşt zirvə toplantısında ölkəmiz üçün əhəmiyyətli olan qətnamənin qəbul edilməsinə İngiltərənin köməyini yüksək qiymətləndirdi.

Respublikamızın rəhbəri ölkəmizdəki hazırkı ictimai-siyasi vəziyyətdən də bəhs etdi. Azərbaycanın müstəqilliyinin qorunması, hüquqi dövlət qurulması istiqamətində görülən işlərdən danışdı. Heydər Əliyev respublikamızın bazar iqtisadiyyatı yolunu seçdiyini söylədi və dedi ki, ölkəmiz beynəlxalq maliyyə orqanları ilə sıx əlaqələr qurmuş, artıq bir sıra kreditlərin alınmasına başlanmışdır.

Son il yarım ərzində Avropada Azərbaycanın imicinin yüksək sürətlə artmasından razılıqla söhbət açan Con Meycor qeyd etdi ki, indi Sizin ölkənizə sərmayə qoymaq üçün etibarlı tərəfdaş kimi baxırlar. O dedi ki, Böyük Britaniya Azərbaycanın güclü bir dövlət olmasında maraqlıdır. Baş nazir bildirdi ki, onun hökuməti Azərbaycanda bazar iqtisadiyyatının inkişafına yaxından kömək edəcəkdir.

Heydər Əliyev hələ əsrin əvvəlində İngiltərənin Azərbaycanda böyük marağı olduğunu vurğuladı və qeyd etdi ki, bu tarixi əlaqələr daha da genişləndirilməlidir. O dedi ki, Azərbaycan Böyük Britaniya kimi nüfuzlu bir dövlətlə müttəfiq olmağa, onun simasında yaxın dost tapmağa ciddi ehtiyac duyur.

Con Meycor bütün bunlar üçün, xüsusən müharibənin beynəlxalq təşkilatlar çərçivəsində sülh yolu ilə başa çatması üçün İngiltərənin Azərbaycana hər cür dəstək verəcəyini bildirdi.

Respublika Prezidenti Heydər Əliyev Xəzər dənizinin statusu məsələləri ətrafında yaranan söhbətlərlə də əlaqədar Böyük Britaniyanın Azərbaycanın mövqeyini dəstəkləməsini xahiş etdi. Baş nazir Con Meycor bu işlə ciddi məşğul olacağını söylədi.

Səmimilik və mehribanlıq şəraitində keçən söhbət zamanı Azərbaycan Prezidenti Heydər Əliyev İngiltərənin Baş naziri Con Meycora onu ölkəmizə rəsmi səfərə dəvət etdiyini xatırlatdı və dedi ki, respublikamızda Con Meycoru qonaq kimi qəbul etməkdən çox məmnun olarlar. Baş nazir dəvəti razılıqla qəbul etdi və mütləq vaxt tapıb bu səfəri həyata keçirəcəyini söylədi.  

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin