Quba, 21 iyul (AZƏRTAC, Elxan Yusifli). Prezident İlham Əliyevin tapşırıq və tövsiyəsinə əsasən, mərkəzi icra hakimiyyəti orqanların rəhbərləri bölgələrdə vətəndaşların qəbulunu keçirir, onların müxtəlif məsələlərlə bağlı müraciətlərinin, ərizə və şikayətlərinin müsbət həll olunması üçün müvafiq tədbirlər görürlər.

AZƏRTAC xəbər verir ki, əmək və əhalinin sosial müdafiəsi naziri Səlim Müslümov iyulun 21-də Quba şəhərində Qusar, Xaçmaz, Quba, Şabran və Siyəzən rayonlarından olan vətəndaşları qəbul etdi.

Qəbula gələn vətəndaşların müraciətləri minik avtomobilləri və reabilitasiya vasitələri ilə təmin olunmaq, dövlət hesabına mənzillə təmin edilmək üçün növbəyə yazılmaq, əlilliyi olan şəxslərin bərpa və müalicəsinin təşkili, sosial xidmətə cəlb edilmək, məşğulluğun təminatı, əmək hüquqlarının müdafiəsi və s. məsələlərlə bağlı idi. Əvvəlki qəbullarla müqayisədə ünvanlı dövlət sosial yardımının, eləcə də əlillik dərəcəsinin təyin olunması barədə müraciət edən vətəndaşların sayı xeyli az olub.

Müraciətlərin araşdırılaraq qanunvericilik çərçivəsində həll edilməsi ilə bağlı tapşırıq verən Səlim Müslümov dövlət hesabına mənzillə təmin olunmaq istəyənlərin rayon (şəhər) icra hakimiyyətlərində növbəyə götürüldüyünü qeyd edərək bildirdi ki, bu ilin ötən dövründə müxtəlif bölgələrdə 118 əlil və şəhid ailəsinə mənzil verilib.

Nazir jurnalistlərə müsahibəsində Prezident İlham Əliyevin 2014-cü il 20 iyun tarixli Sərəncamına əsasən, cari ilin 1 yanvarınadək mənzil növbəsinə duran 5 min 731 nəfər əlil və şəhid ailəsinin 2014-2018-ci illərdə mərhələli şəkildə mənzil, yaxud fərdi evlə təmin ediləcəyini diqqətə çatdırdı. Bildirildi ki, son 3 ay yarım ərzində artıq 1100 nəfər əlilliyi olan şəxsə minik avtomobili verilib. Bu ilin əvvəlinədək növbədə olanların hamısı gələn ayın sonunadək avtomobillə tam təmin ediləcək.

Səlim Müslümov son 6 ayda 3 min 600 nəfərdən çox əlilliyi olan şəxsin və sağlamlıq imkanları məhdud uşağın nazirliyin tabeliyindəki 14 mərkəzdə bərpa-müalicə kursu keçdiyini, belə şəxslərin, ümumilikdə, 10 mindən çox reabilitasiya vasitəsi və protez-ortopedik məmulatla təmin edildiyini bildirdi. Qeyd olundu ki, nazirliyin əlillərin bərpa mərkəzlərində müalicə almaq, həmçinin reabilitasiya avadanlıqları ilə təmin edilmək üçün tələb olunan sənədlərin siyahıları nazirliyin rəsmi internet saytında (www.mlspp.gov.az) yerləşdirilir.

Qəbul zamanı nazir müraciətlərinə uyğun olaraq, bir sıra vətəndaşların məşğulluğunun təminatına köməklik göstərilməsi, ünvanlı yardım almaq və sosial xidmətə cəlb olunmaq hüququna baxılması, əlillik vəziyyətlərinin müəyyən edilməsi üçün müayinəyə cəlb edilməsi barədə tapşırıqlar verdi.

“Açıq qapı” şəraitində keçirilən qəbulda sorğu xarakteri daşıyan bir sıra müraciətlərlə bağlı müvafiq izahatlar verildi, həmçinin nazirliyin fəaliyyət dairəsinə aid olmayan məsələlər aidiyyəti qurumlara çatdırılmaq üçün qeydiyyata alındı.