Xaçmaz, 23 fevral, Elxan Yusifli, AZƏRTAC

Azərbaycan Respublikası Prezidentinin tapşırıqlarına uyğun olaraq, fevralın 23-də Əmlak Məsələləri Dövlət Komitəsinin sədri Kərəm Həsənov Xaçmaz şəhərində şimal bölgəsindən olan vətəndaşların müraciətlərini dinləyib.

AZƏRTAC-ın bölgə müxbiri xəbər verir ki, qəbuldan əvvəl ulu öndər Heydər Əliyevin Xaçmaz şəhərinin mərkəzində ucaldılmış abidəsinin qarşısına gül dəstələri düzülüb.

Heydər Əliyev Mərkəzində keçirilən qəbulda Xaçmaz, Quba, Qusar və Şabran rayonları sakinlərinin daşınmaz əmlak və torpaq idarəçiliyi sahəsində müraciətlərinin operativ həll edilməsi və yaranan sualların cavablandırılması istiqamətində tapşırıqlar verilib.

Səsləndirilən müraciətlər əsasən daşınmaz əmlakın qeydiyyatı, o cümlədən fərdi həyət evi, bələdiyyə tərəfindən müxtəlif məqsədlərlə ayrılmış torpaqlar, pay torpaqları, mənzillər, sovet dövründə kolxoz və ya sovxozlar tərəfindən verilmiş həyətyanı torpaq sahələrinin sənədləşməsi ilə əlaqədar olub. Eyni zamanda, torpaq sahələrinin sərhədlərinin dəqiqləşdirilməsi, vaxtı ilə verilmiş pay torpaqları ilə bağlı faktiki və sənəd uyğunsuzluqlarının aradan qaldırılması, torpaqların təyinatına uyğun istifadəsi, kateqoriyasının dəyişdirilməsi prosedurları istiqamətində də müraciətlər qeydə alınıb. Bəzi müraciətlər isə dövlət əmlakının özəlləşdirilməsi sahəsinə aid olub.

Komitə sədri hər bir vətəndaşın müraciətini diqqətlə dinləyərək, onların qanunvericiliklə həlli istiqamətində müvafiq tapşırıqlarını verib. Bir sıra vətəndaş müraciətləri verilən tapşırıqlara əsasən dərhal müsbət həllini tapıb. Araşdırılması tələb olunan müraciətlər qeydə alınaraq, qanunvericiliyə əsasən həlli istiqamətində göstərişlər verilib. Həmçinin Komitənin vəzifə və funksiyalarına aid olmayan məsələlər aidiyyəti qurumlara çatdırılması üçün qeydiyyata alınıb. Qəbul günü birbaşa müraciət edən vətəndaşlar da komitə sədri tərəfindən qəbul edilərək müraciətləri dinlənib.

Qəbul zamanı komitə sədri vurğulayıb ki, daşınmaz əmlak və torpaq idarəçiliyi sahəsində xidmətlərə olan əlçatanlıq artırılır, bu sahədə şəffaflıq və vətəndaş məmnunluğunun təmin edilməsi ön planda saxlanılır. Belə ki, tətbiq edilən innovativ tədbirlər, xidmətlərin geniş şəkildə elektron müstəviyə keçməsi, o cümlədən qeydiyyat müddətinin azaldılması, prosedurların sadələşdirilməsi vətəndaş məmnunluğunun təmin edilməsinə yönəlib. Bu sahədə görülən işlərin nəticəsidir ki, 2017-ci ildə daşınmaz əmlakın qeydiyyatı 200 minə yaxın olub. 2016-cı ilin eyni dövrü ilə müqayisədə bu rəqəm 14,5 faiz artıb. Göstəricinin 60 minə yaxını ilkin, 137 mindən çoxu isə təkrar qeydiyyata aid olub.

Vətəndaş məmnunluğunu təmin edən elektron çıxarışın tətbiqi də bu istiqamətdə həyata keçirilən yeniliklərdəndir. Bildirilib ki, artıq vətəndaşlar Elektron Hökumət Portalında yaradılacaq şəxsi kabinetə daxil olmaqla, elektron formada çıxarışlarını ala bilirlər.

Qəbula gələnlərin diqqətinə çatdırılıb ki, mülkiyyət münasibətlərinin tənzimlənməsində vahid idarəçiliyin təmin olunması məqsədilə “bir pəncərə” prinsipi tətbiq edilir. Həm çıxarışların verilməsi, texniki sənədlərin tərtibi, həm də torpaqların istifadəsi, icarəsi, mülkiyyətə verilməsi, koordinatların uyğunluğu kimi torpaq məsələlərində rəylərin alınması “bir pəncərə”də həll olunur.

Qeydiyyat xidmətlərini bilavasitə ünvanlarda çatdıran “Kütləvi çıxarış” kampaniyası və mobil ofis xidmətləri əhaliyə göstərilən qayğının bariz nümunəsidir. Kampaniya minimum vaxt itkisi ilə xidmətlərdən maksimum yararlanmağa, vətəndaşların yerindəcə çıxarış əldə etməsinə şərait yaradır.

Torpaqların Elektron Kadastr Uçotu İnformasiya Sisteminin yaradılması ilə bağlı məsələlərə toxunan komitə sədri Kərəm Həsənov qeyd edib ki, bu istiqamətdə işlər uğurla həyata keçirilir. Görülən işlərin nəticəsidir ki, kadastr məlumatlarına istinad etməklə Xaçmaz rayonunun Müqtədir qəsəbəsi və Vələmir kəndindən olan 604 ailənin uzun illərdən bəri mövcud olan torpaqla bağlı problemli məsələləri öz müsbət həllini tapıb. Torpaq payı almaq hüququna malik olan, ancaq indiyədək bu hüquqdan yararlana bilməyən 2 min 315 subyektin hər birinə 0,18 hektar pay torpaq sahəsi ayrılıb. Pay torpaqları almış vətəndaşlara isə mülkiyyət hüququnu təsdiq edən sənədlər təqdim olunub.

Qəbul çərçivəsində komitə sədri fəaliyyət sahələri üzrə göstərilən xidmətlərdə maksimum məmnunluğun, çevikliyin, əlçatanlığın, şəffaflığın təmin olunması məqsədilə bütün zəruri tədbirlərin görülməsi barədə tapşırıqlarını verib. Kərəm Həsənov bildirib ki, əhalinin müraciətləri operativ həll olunmalı, qeydiyyatla bağlı işlər daha da təkmilləşdirilməli, qanunvericilik çərçivəsində vətəndaş maraqları təmin olunmalıdır.

Komitə sədri tərəfindən qəbul olunan vətəndaşlar yaradılan şəraitə görə razılıqlarını ifadə ediblər.