REGİONLAR
Əsaslı təmir olunan Lənkəran-Lerik yolunda işlər yekunlaşır VİDEO
Lerik, 1 oktyabr, İsmayıl Cəfərli, AZƏRTAC
Uzunluğu 55 kilometr olan respublika əhəmiyyətli Lənkəran-Lerik avtomobil yolunda əsaslı təmir işləri davam etdirilir. Tez-tez sürüşmə və uçqunların baş verdiyi yolun dayanıqlığını, yük və sərnişin daşınmasının təhlükəsizliyini təmin etmək məqsədilə təmir-tikinti işləri bu ilin sonuna kimi başa çatdırılacaq. İşlər Prezident İlham Əliyevin imzaladığı Sərəncama əsasən həyata keçirilir.
AZƏRTAC xəbər verir ki, Lənkəran-Lerik avtomobil yolu 2 hərəkət zolaqlı olmaqla, III texniki dərəcəyə uyğun yenidən qurulur. Hərəkət zolaqlarının eni 3,5 metr, çiyinlərin eni isə 2,5 metrdir. Yolun ümumi eni 12 metr təşkil edir.
Günəşli kənd sakini Kamal Rəhmanov deyir ki, əvvəllər Lerikdən Lənkərana 2 saata gedirdilər. Sürüşmə və uçqunlar yolu yararsız hala salmışdı. “Dövlətimizin başçısının Lerikə hər səfəri biz sakinlər üçün də əlamətdar olur. Hər səfərdən sonra yenidənqurma və quruculuq işləri geniş vüsət alır. Bu yol da bizim üçün bir hədiyyədir. Çox razıyıq ki, belə bir yol çəkilib”.
Rayon sakini Cavid Kişiyev də yolun əsaslı təmirinə görə razılıq edir: “Lerik ucqar dağ rayonu olduğuna görə uçqunlar olur, yollarımız dağılır. Amma şükürlər olsun, indi yollarımız abadlaşıb. Lənkəran-Lerik yolu yüksək keyfiyyətlə təmir olunur. Mən bütün Lerik sakinləri adından Prezidentimizə minnətdarlığımı bildirirəm”.
Hazırda yolda olan mövcud körpülərin təmir edilir və genişləndirilir. Körpülərin ətrafında əlavə bərkitmə işləri aparılaraq dəmir-beton svaylar vurulur. Torpaq işləri yekunlaşan ərazilərdə asfaltlanma işləri görülür.
Lerik-Lənkəran avtomobil yolunun bir neçə nöqtəsində sürüşmə əraziləri mövcud olduğu üçün burada yol yatağının əlavə bərkidilməsi işləri aparılır, dəmir-beton küvetlər inşa edilir. Bundan başqa, ehtiyac duyulan yerlərdə istinad divarı inşa edilir, dəmir-beton svaylar vurulur, drenaj xətləri çəkilir və yeni suötürücü borular quraşdırılır.
48 saylı “Yol İstismarı” MMC-nin direktoru Çingiz Əkbərov ikiqat asfalt vurulan yolda tez-tez uçqunlar olduğunu bildirərək deyib: “Uçqunların qarşısını almaq üçün 5630 metr istinad divarı çəkilib. Eyni zamanda, 7130 metr uzunluqda beton küvetlər qoyulub. Hazırda beton küvetlərin inşası davam edir. Yolun tikintisinin başa çatdırılması bu ilin sonuna nəzərdə tutulur”.
Lənkəran-Lerik yolunun yenidən qurulmasına və genişləndirilməsinə ən çox sevinənlər isə sürücülərdir. Sürücü Ənvər Cəfərov bu yoldan demək olar hər gün istifadə edir: “Yolun yenidən qurulması bizim də işimizi asanlaşdırır. Hər gün bu yoldan istifadə edən şagirdlər də çox əziyyət çəkirdilər. Şükürlər olsun ki, yollarımız təmir olunur, rahat gedib-gəlirik. Maşınlarımız da xarab olmur”.
Dövlət başçısının imzaladığı sərəncama əsasən, Lənkəran-Lerik avtomobil yolunun yenidən qurulması avtomobillərin hərəkətinin təhlükəsizliyinə, nəqliyyat xərclərin azalmasına zəmin yaradacaq, həm də kənd təsərrüfatı və turizmin inkişafına təkan verəcək. Ümumilikdə isə yolboyu yaşayan vətəndaşların sosial rifah halına müsbət təsir göstərərək, sosial-iqtisadi inkişafın sürətlənməsinə şərait yaradacaq.