Berlin, 20 noyabr, AZƏRTAC

Avropa Parlamentinin deputatları və Avropa İttifaqına (Aİ) üzv ölkələrin nümayəndələri Aİ-nin gələn il üçün nəzərdə tutulan büdcəsi ilə bağlı ortaq məxrəcə gələ bilməyiblər.

AZƏRTAC xəbər verir ki, tərəflər nəzərdə tutulan müddətədək hamını qane edəcək razılıq əldə edə bilməyib və bu məsələ ilə bağlı Brüsseldəki danışıqlar dayandırılmış hesab edilib.

Avropa Komissiyası 165,6 milyard avro həcmində büdcənin qəbul edilməsini təklif edib. Lakin danışıqlar başlanandan dərhal sonra Aİ-yə üzv ölkələrin nümayəndələri əvvəlcədən planlaşdırılmış həcmi 1,5 milyard avro azaltmağı, Avropa parlamentinin deputatları isə, əksinə, 770 milyon avro artırmağı tələb ediblər. Avropa Komissiyasının təklif etdiyi büdcə layihəsi indiki səviyyədən 3 faiz çoxdur.

Qeyd olunur ki, artıq bir neçə gün ərzində büdcə üzrə yeni təkliflər hazırlanmalıdır. Ehtimal var ki, cari ilin sonunadək razılaşma əldə ediləcək.

Aİ-nin büdcə üzrə komissarı Günter Ottinger bildirib ki, danışıqlarda konsensus olmayacağı təqdirdə maliyyələşdirmə aybaay həyata keçiriləcək. O zaman 2019-cu ildə artırılması planlanlaşdırılan büdcəyə deyil, hazırda mövcud olan büdcə həcminə əsaslanmaq lazım gələcək.

Vüqar Seyidov

AZƏRTAC-ın xüsusi müxbiri

Berlin