İDMAN


Azərbaycan Beynəlxalq Ədalətli Oyunlar Hərəkatında yüksək fəaliyyəti ilə seçilir

Bakı, 13 aprel, AZƏRTAC

Bu gün Azərbaycan dünyada idman ölkəsi kimi tanınır. Respublikamızda idmanın qısa müddətdə sürətli inkişafı bilavasitə bu sahənin inkişafına göstərilən dövlət qayğısı ilə bağlıdır. İdmançılarımız dünyanın ən mötəbər yarışlarında yüksək nailiyyətlər qazanırlar. Bu uğurların nəticəsidir ki, son dövrlərdə beynəlxalq qurumlar tərəfindən ölkəmizə yüksək səviyyəli etimad göstərilir, Azərbaycan nümayəndələri beynəlxalq qurumların rəhbər heyətlərində layiqincə təmsil olunurlar. Ötən il Budapeştdə keçirilən Beynəlxalq Ədalətli Oyunlar Komitəsinin (BƏOK) İcraiyyə Komitəsinin iclasında BƏOK Regional Ədalətli Oyunlar İnkişaf Mərkəzinin Bakıda yaradılması qərara alınıb, Milli Olimpiya Komitəsinin vitse-prezidenti, Azərbaycan Ədalətli Oyunlar Komissiyasının sədri Xəzər İsayev mərkəzə prezident təyin olunub. Bu günlərdə Budapeştdə keçirilən BƏOK-un İcraiyyə Komitəsinin iclasında Xəzər İsayev qurumun icraiyyə komitəsinin üzvü seçilib, RƏOİM-un strukturu və Əsasnaməsi təsdiq olunub, loqosunun təqdimat mərasimi keçirilib.

Mərkəzin prezidenti və MOK-un vitse-prezidenti Xəzər İsayev AZƏRTAC-ın müxbirinə RƏOİM-un fəaliyyəti ilə bağlı müsahibə verib. Müsahibəni təqdim edirik.

- Xəzər müəllim, ilk növbədə, sizi BƏOK İcraiyyə Komitəsinə üzv seçilməyiniz münasibətilə təbrik edirəm. Sözsüz ki, beynəlxalq qurum tərəfindən ölkəmizə göstərilən etimad AzƏOK ilə uğurlu əməkdaşlığın nəticəsidir.

- Təbrikə görə çox sağ olun. İlk növbədə qeyd edim ki, AzƏOK son illər uğurlu işlərə imza atır. Bildiyiniz kimi, AzƏOK cənab İlham Əliyevin 1997-ci ildə MOK-un prezidenti seçilməsindən sonra yaradılıb. MOK-un prezidenti cənab İlham Əliyevin təşəbbüsü ilə fəaliyyətə başlayan təşkilat 1998-ci ildə Avropa Ədalətli Oyunlar Hərəkatının (AƏOH) üzvü olub. Həmin vaxt ardıcıl iki il təşkilatın tədbirində ölkəmizi Olimpiya çempionu Rəfiqə Şabanova, sonrakı il Milli Olimpiya Komitəsinin vitse-prezidenti Çingiz Hüseynzadə təmsil etmişdi. 2000-ci ildən Azərbaycan Ədalətli Oyunlar Komissiyasının rəhbəri olaraq ölkəmizi qitə və dünya Ədalətli Oyunlar təşkilatlarının tədbirlərində təmsil edirəm. Biz Avropa və Beynəlxalq Ədalətli Oyunlar təşkilatları ilə sıx əməkdaşlıq edirik. Hər tədbirdə çalışırıq ki, ölkəmizin nüfuzunu, respublikamızda idmana göstərilən diqqət və qayğını təbliğ edək. Avropa və Beynəlxalq Ədalətli Oyunlar təşkilatlarının rəhbərləri dövlətimizin başçısı İlham Əliyevə və ölkəmizin Birinci vitse-prezidenti Mehriban Əliyevaya öz xüsusi mükafatlarını təqdim ediblər. Beynəlxalq qurumların ölkəmizdə tədbirləri yüksək səviyyədə təşkil olunub. Azərbaycan Respublikasının Prezidenti, Milli Olimpiya Komitəsinin prezidenti İlham Əliyev ölkəmizdə Ədalətli Oyunlar Hərəkatının inkişafını həmişə diqqət mərkəzində saxlayır və bu sahənin inkişafına yeni imkanlar açır.

- Bu yaxınlarda BƏOK-un Macarıstanda keçirilən İcraiyyə Komitəsinin iclasında iştirak etmisiniz. Səfəriniz barədə məlumat verməyinizi xahiş edirəm.

- Məlumat üçün bildirim ki, Beynəlxalq Ədalətli Oyunlar Hərəkatı 1963-cü ildə yaradılıb. Bu hərəkat İkinci Dünya müharibəsindən öncə də fəaliyyət göstərib. Ancaq müharibə vaxtı və ondan sonra hərəkat bir müddət fəaliyyətinə ara verib. BƏOK ədalətli oyunlar hərəkatını bütün dünyada təbliğ etməklə yanaşı, 1963-cü ildən indiyədək müxtəlif nominasiyalar üzrə mükafatlar təsis edir. Dörd nominasiya üzrə verilən bu mükafatlar tanınmış idmançılara, idman xadimlərinə, rəsmi şəxslərə, KİV nümayəndələrinə bu sahədə fərqlənən insanlara təqdim olunur. Bunlar “Pyer-de-Kuberten”, “Jak Roqq”, “Con Barotra” və “Villi Daum” mükafatlarıdır. Macarıstanda keçirilən İcraiyyə Komitəsinin iclasında 2018-ci ilin mükafatçılarının seçimi, Bakıda fəaliyyət göstərən Regional Ədalətli Oyunlar İnkişaf Mərkəzinin gələcək fəaliyyəti barədə müzakirələr aparıldı. Mərkəzin strukturu ilə bağlı fikir mübadiləsi aparıldı və qurumun Əsasnaməsi təsdiq olundu.

- Qeyd etdiniz ki, iclasda BƏOK mükafatlarının qalibləri müəyyənləşdi. Azərbaycan bu mükafatlara namizədliyini irəli sürmüşdümü?

- Qeyd edim ki, bu nominasiyalar üzrə mükafatları almaq üçün müxtəlif ölkələrdən 40-dan çox namizəd irəli sürülmüşdü. AzƏOK tərəfindən gənclər və idman naziri Azad Rəhimovun namizədliyi irəli sürülmüşdü. İcraiyyə Komitəsi üzvlərinin qərarına əsasən, gənclər və idman naziri Azad Rəhimova Con Borota mükafatının verilməsi qərara alınıb. Bu, Azərbaycan dövlətinə, ölkə idmanına, Olimpiya və Ədalətli Oyunlar hərəkatlarına verilən diqqətin nümunəsidir. Bütün bunlar Azərbaycanın dünyada idman ölkəsi kimi tanınmasına imkan yaradır. Mən də mərkəz rəhbəri kimi BƏOK İcraiyyə Komitəsinə üzv seçildim. BƏOK-un Əsasnaməsinə düzəliş edildi və üzvlüyə yeni iki nəfər əlavə olundu. Hər bir işin arxasında ədalət dayandığı üçün ölkəmizdə bu prinsiplərə sadiqlik idmanın inkişafına töhfələr verir. Qeyd edim ki, BƏOK tərəfindən mükafatlar öz sahiblərinə sentyabrda keçiriləcək qala-mərasimdə təqdim ediləcək. Qala-mərasimin “Şəhər Oyunları” çərçivəsində Budapeştdə keçirilməsi nəzərdə tutulur.

- BƏOK tərəfindən RƏOİM-in fəaliyyəti ilə bağlı hansı qərarlar qəbul olundu?

- Qeyd etdiyim kimi, artıq Mərkəzin Əsasnaməsi və strukturu təsdiqlənib. BƏOK İcraiyyə Komitəsindən bir mütəxəssisin Mərkəzin vitse-prezidenti təyin olunması barədə qərar qəbul edilib. Biz illik fəaliyyətimiz barədə hər il məruzə təqdim etməliyik. Məruzənin şəffaf və obyektiv olması üçün bu addımı atdıq. Biz Mərkəzə Ədalətli Oyunlar Hərəkatının inkişafına xidmət göstərən insanları toplamaq istəyirik. Türkiyənin Ədalətli Oyunlar Komissiyasının sədri, Avropa Ədalətli Oyunlar Hərəkatının vitse-prezidenti Erdoğan Erpınar və BƏOK-un vitse-prezidenti rusiyalı Nikolay Dalqopolovun Mərkəzə vitse-prezident təyin olunması barədə qərar qəbul etmişik. Digər vitse-prezident isə Azərbaycandan seçiləcək. Qurumun baş katibi latviyalı Bayba Veisa olacaq. Mərkəzin inkişafı üçün xüsusi proqram hazırlanacaq və bu istiqamətdə addımlar atılacaq.

- Bildiyimizə görə, Mərkəzə daha yeni iki ölkə üzv daxil edilib.

- Mərkəzdə 13 ölkə təmsil olunacaq. Bura Azərbaycan, Gürcüstan, Qazaxıstan, Özbəkistan, Qırğızıstan, Küveyt, Birləşmiş Ərəb Əmirlikləri, İran, Türkmənistan, Tacikistan, Monqolustan, Səudiyyə Ərəbistanı və Qətər daxildir. Ötən il BƏOK-un və Beynəlxalq Cüdo Federasiyasının birgə təşkilatçılığı ilə Bakıda qala-gecə təşkil olunmuşdu. Dəvətimiz əsasında Mərkəzə üzv bir neçə ölkədən nümayəndə mötəbər tədbirə qatılmışdı. Mərkəz tam olaraq fəaliyyətə başladıqdan sonra bütün üzv ölkələrin iştirakı ilə hər ilin sentyabr-oktyabr aylarında Bakıda konqres və Baş Assambleyanın təşkili nəzərdə tutulub. Mərkəzə üzv dövlətlərin sayı arta bilər. Bəzi Asiya ölkələri, o cümlədən Koreya Respublikası, Yaponiya və digərləri ilə əlaqə yarada bilməmişik. Əfqanıstanın da üzvlüyü gündəmdədir. Ümumiyyətlə, Mərkəz Avrasiya regionunu əhatə edəcək.

- Maraqlıdır, Mərkəzin təsdiq olunan yeni loqosu özündə nələri əks etdirir?

- Artıq Mərkəzin loqosu hazırlanıb. BƏOK-un loqosunun rəngləri olan narıncı və qırmızı rənglərdən istifadə edilib. Yeni loqo Azərbaycanın milli xalça ornamentlərini və Qobustandakı qayaüstü rəsmlərin ornamentlərini əks etdirir. Xalça kombinasiyasındakı elementlər və UNESCO-nun ümumdünya irs siyahısına daxil edilmiş Qobustan Milli Parkındakı qaya üzərində tarixi təsvirlər ədalət simvolu ilə eleqant şəkildə birləşdirilib. Loqo Azərbaycanın tarixi irsini simvolizə edir və mədəniyyətini özündə birləşdirir. Loqonun müəllifi azərbaycanlı Orxan Qocadır. Həmin şəxs keçən il təqdimatı keçirilən AzƏOK-un yeni loqosunu da tərtib edib.

- Yeni yaradılmış Mərkəz tərəfindən hansı tədbirlərin keçirilməsi nəzərdə tutulub?

- Bir müddət sonra Mərkəzə üzv ölkələrin nümayəndələrinin Azərbaycana dəvəti nəzərdə tutulub. Səfər çərçivəsində onlarla Mərkəzin gələcək fəaliyyəti barədə fikir mübadiləsi aparılacaq. Mərkəz tərəfindən tədbirlərin təşkili ilə yanaşı, bu sahədə fərqlənən şəxslərin mükafatlandırılması da nəzərdə tutulur. Bilirsiniz ki, idman həmişə ədalətli oyunlar prinsipi ilə sıx əlaqədədir. Bura idman tədbirləri və yarışları da daxildir. BƏOK gələcəkdə irimiqyaslı yarışlar zamanı idmançılarla, yanaşı jurnalistlərin də mükafatlandırmasını istəyir və bu istiqamətdə müzakirələr aparılır. Bu prinsip təkcə idmanı deyil, bütün sahələri əhatə etməlidir. Ölkəmizdə təşkil edilən ilk Avropa Oyunları zamanı bir neçə ədalət prinsiplərinə sadiqlik nümunəsinin şahidi olduq. Həmin idmançı və könüllünün yarış ərəfəsində mükafatlandırılmasından son dərəcə məmnunluq duyardıq. Ancaq beynəlxalq qurum həmin belaruslu samboçuya mükafatı sonradan təqdim etdi. Ədalət prinsipinə sadiq insanların təkcə idmanda deyil, həyatda və təhsildə də fərqləndirilməsi nəzərdə tutulur.

- AzƏOK bu il hansı tədbirləri təşkil etməyi planlaşdırır?

- Azərbaycan Ədalətli Oyunlar Komissiyası Beynəlxalq və Avropa Ədalətli Oyunlar hərəkatları ilə sıx əməkdaşlıq edir. İki təşkilatın ölkəmizdə dörd dəfə mötəbər tədbiri yüksək səviyyədə təşkil olunub. Azərbaycan beynəlxalq Ədalətli Oyunlar Hərəkatında yüksək fəaliyyəti ilə seçilir. Bundan sonra birgə tədbirlərimizin sayı daha çox olacaq. AzƏOK-un yeni proqramı hazırlanır. Bu prinsiplərin təbliği istiqamətdə regionlarda görüşlər təşkil olunacaq. Biz bu dəyərləri adi insanlara, məktəblilərə və gənclərə çatdırmaq istəyirik.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.