Bakı, 14 fevral, P.İmanova, AZƏRTAC

Fevralın 14-də Azərbaycan Milli Elmlər Akademiyası (AMEA) Rəyasət Heyətinin növbəti iclası keçirilib.

AZƏRTAC xəbər verir ki, iclasda AMEA-nın Naxçıvan Bölməsi ilə telekörpü yaradılıb.

AMEA-nın prezidenti, akademik Akif Əlizadə gündəlikdəki məsələləri diqqətə çatdırıb.

Sonra AMEA-nın İctimai Elmlər Bölməsinin akademik-katibi, akademik Nərgiz Axundova bölmənin 2017-ci ildəki elmi və elmi-təşkilati fəaliyyəti haqqında məruzə ilə çıxış edib. Bildirilib ki, hesabat ilində bölmənin elmi müəssisələrində səkkiz elmi istiqamətdə 33 problemi əhatə edən 129 mövzuda 277 mərhələdə 297 iş üzrə tədqiqatlar aparılıb, 57 mövzu üzrə 225 mərhələdə 228 iş tamamlanıb, səkkiz elmi nəticə tətbiq olunub. Bölmənin elmi müəssisələri tərəfindən üçü xaricdə olmaqla 67 kitab, altısı xaricdə olmaqla yüz monoqrafiya, 325-i xaricdə olmaqla 1.251 məqalə, 71-i xaricdə olmaqla 417 tezis nəşr edilib. Əməkdaşların impakt faktorlu jurnallarda 39 məqaləsi çapdan çıxıb, elmi işçilərin əsərlərinə istinadların sayı isə 850-dir. Həmçinin bölmə tərəfindən 19 respublika və 16 beynəlxalq əhəmiyyətli tədbir keçirilib.

Kadr hazırlığından danışan bölmənin rəhbəri bildirib ki, hesabat ilində fəlsəfə doktorluğu üzrə 22, elmlər doktorluğu üzrə bir dissertasiya işi müdafiə edilib. Hazırda bölmədə 32 əyani, 38 qiyabi doktorant və 174 dissertantın təhsil aldığını qeyd edən akademik deyib ki, magistratura üzrə iki nəfər təhsilini davam etdirir.

Məruzə dinlənildikdən və müzakirə olunduqdan sonra Rəyasət Heyəti hesabatın təsdiqi və AMEA-nın illik hesabatına salınmasına dair qərar qəbul edib. Ölkə başçısının “1918-ci il azərbaycanlıların soyqırımının 100 illiyi haqqında” və “Azərbaycan Xalq Cümhuriyyətinin 100 illik yubileyi haqqında” sərəncamlarının icrası ilə əlaqədar birgə tədbirlər, elmi tədqiqat əsərlərinin hazırlanması və ictimaiyyətə təqdim olunması, həmçinin bölmə əməkdaşlarının “Thomson Reuters” və digər elmi bazalardan istifadə imkanlarının genişləndirilməsi, ictimai elmlər sahəsində magistratura və doktorantura təhsilində elmin müasir tələblərinə cavab verən ixtisasların müəyyənləşdirilməsi ilə yanaşı, numizimatika, epiqrafiya, antropologiya, etnososiologiya, kultrologiya kimi nadir ixtisaslara gənc kadrların cəlb olunması işinə nəzarətin gücləndirilməsi və digər məsələlərlə bağlı tapşırıqlar verilib.

Daha sonra AMEA-nın Naxçıvan Bölməsinin sədri, akademik İsmayıl Hacıyev bölmənin 2017-ci ildəki elmi və elmi-təşkilati fəaliyyətinə dair hesabatla çıxış edib. Bildirilib ki, AMEA Rəyasət Heyəti tərəfindən təsdiqlənən plana uyğun olaraq tədqiqat işlərinə yeni elmi tələblərlə yanaşılıb, Naxçıvanın tarixi, mədəniyyəti, ədəbiyyatı, folkloru, incəsənəti, təbii sərvətləri, flora və faunası, torpaq örtüyü sistemli şəkildə öyrənilib. Akademik vurğulayıb ki, hesabat ilində bölmədə ölkə başçısının 11 fərman və sərəncamı, Azərbaycan Respublikası Nazirlər Kabinetinin 16 qərar və sərəncamı, Naxçıvan Muxtar Respublikasının Ali Məclisi və Nazirlər Kabinetinin 23 fərman, sərəncam və qərarı, AMEA-nın altı sərəncam və qərarı icra edilib. Bildirilib ki, bölmə üzrə altı elmi istiqamətdə altı problemi əhatə edən yeddi mövzuda 34 iş 79 mərhələdə yerinə yetirilib. 2017-ci ildə bölmə əməkdaşlarının 33 monoqrafiyası, 17 kitabı, iki atlası, iki dərsliyi, bir kitabçası, bir metodik vəsaiti nəşr edilib. Həmçinin 515 elmi məqalə, 190 konfrans materialı və 6 tezis olmaqla 767 elmi əsər çapdan çıxıb. Əsərlərdən biri monoqrafiya, biri kitab, 90-ı elmi məqalə, 72-si konfrans materialı, biri tezis olmaqla 165 elmi əsər xaricdə işıq üzü görüb. İmpakt faktorlu jurnallarda dərc olunan elmi məqalələrin sayı isə 45-dir.

Məruzə dinlənildikdən sonra müzakirələr aparılıb, suallar cavablandırılıb. Rəyasət Heyəti hesabatın təsdiqi və AMEA-nın illik hesabatına salınmasına dair qərar qəbul edib.

İclasda elmin populyarlaşdırılması sahəsində səmərəli fəaliyyətə görə AMEA Rəyasət Heyətinin mükafatı haqqında məsələ də müzakirə olunub. AMEA-nın ictimaiyyətlə əlaqələr və elmin populyarlaşdırılması idarəsinin rəisi Zülfüqar Fərzəliyev müsabiqəyə ayrı-ayrı şəxslərin və kollektivlərin namizədliyini əhatə edən ümumilikdə 22 işin təqdim edildiyini və yekun qiymətləndirmənin başa çatdığını bildirib. İclasda qəbul olunan qərara əsasən, Riyaziyyat və Mexanika İnstitutunun direktoru, AMEA-nın müxbir üzvü Misir Mərdanov və həmin institutun elmi-texniki informasiya şöbəsinin müdiri, professor Ramiz Aslanov Rəyasət Heyətinin mükafatına layiq görülüblər.

İclasda bir sıra elmi-təşkilati məsələlərə də baxılıb.