İQTİSADİYYAT


Azərbaycan Tbilisidə keçiriləcək üçüncü İpək Yolu Beynəlxalq Forumuna dəvət olunub

Tbilisi, 24 sentyabr, AZƏRTAC

Sentyabrın 28-29-da Tbilisidə üçüncü İpək Yolu Beynəlxalq Forumu keçiriləcək.

Gürcüstanın Sənaye-Ticarət Palatasından AZƏRTAC-a bildiriblər ki, Azərbaycan da bu foruma dəvət olunub və ölkəmiz tədbirdə rəsmi nümayəndə heyəti ilə iştirak edəcək.

Məlumata görə, forumda ticarətin asanlaşdırılması, elektron kommersiyanın inkişafı, rəqəmsal rabitə, nəqliyyat infrastrukturu və enerji sektorunun inkişafı və modernləşdirilməsi və s. aktual məsələlər müzakirə olunacaq.

Sentyabrın 28-də rəsmi açılışdan sonra forum işini panel iclaslarda davam etdirəcək. İkinci gün-sentyabrın 29-da isə Gürcüstanın investisiya imkanları, potensial investorların cəlb olunması məsələləri müzakirə olunacaq, ikitərəfli görüşlər keçiriləcək.

Bildirilib ki, 2015-ci ildə keçirilən birinci forumda 34 ölkədən rəsmi dövlət və hökumət nümayəndə heyəti və 50 ölkədən iş adamları, 2016-cı ildə keçirilən ikinci forumda 30 ölkənin, eləcə də 20 beynəlxalq maliyyə və donor təşkilatının yüksək vəzifəli şəxsləri də daxil olmaqla 1000-ə yaxın qonaq iştirak edib.

Üçüncü forumda isə 1000-dən çox nümayəndənin iştirakı gözlənilir.

Xətayi Əzizov

AZƏRTAC-ın xüsusi müxbiri

Tbilisi

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.