CƏMİYYƏT


Azərbaycan Tibb Universiteti və Litvanın Sağlamlıq Elmləri Universiteti arasında əməkdaşlıq memorandumu imzalanıb

Bakı, 19 may, AZƏRTAC

Azərbaycan Tibb Universitetinin (ATU) rektoru, professor Gəray Gəraybəyli ilə Litvanın Sağlamlıq Elmləri Universitetinin rektoru, professor Rimantas Benetisin görüşü olub. Görüş zamanı tərəflər arasında əməkdaşlıq memorandumu da imzalanıb.

Bu barədə AZƏRTAC-a universitetin mətbuat xidmətindən məlumat verilib.

Bildirilib ki, görüş zamanı Gəray Gəraybəyli Azərbaycan Tibb Universitetinin tarixi haqqında məlumat verməklə yanaşı, bir əsrə yaxın yaşı olan qocaman ali məktəbin hazırkı fəaliyyətindən də bəhs edib. Hazırda zəngin maddi-texniki bazası, tədris korpusları, tələbə yataqxanaları olan ATU-nun klinika və elmi-tədqiqat laboratoriyaları müasir cihaz və avadanlıqla təchiz edilib. Bu da elmi axtarışların əhəmiyyətinin artırılmasına, tibb sahəsində kifayət qədər kadrların yetişdirilməsinə imkan yaradır.

ATU-nun bu il beynəlxalq akkreditasiyadan keçdiyini vurğulayan rektor universitetdə 39 ölkədən tələbələrin təhsil aldığını da diqqətə çatdırıb. Tibb Universitetində həyata keçirilən rezidentura təhsili haqqında məlumatları bölüşən professor Litva Sağlamlıq Elmləri Universiteti ilə əməkdaşlığın istiqamətləri barədə də fikirlərini açıqlayıb.

Litvanın Sağlamlıq Elmləri Universitetinin rektoru, professor Rimantas Benetis təmsil etdiyi tibbi müəssisəsi haqqında məlumat verərək bildirib ki, mövcud 8 min tələbənin 25 faizini əcnəbilər təşkil edir. Qeyd edilib ki, Litva Sağlamlıq Elmləri Universitetinin nəzdində güclü maddi-texniki bazası olan klinikalar və hətta apteklər də var. Səfər çərçivəsində Azərbaycanın Səhiyyə və Təhsil nazirliklərində görüşlər keçirdiyini bildirən qonaq səfərin məhsuldar olmasından məmnunluğunu ifadə edib. O, ölkəmiz ilə səhiyyə sahəsində əməkdaşlığın inkişaf etdirilməsi işində maraqlı olduğunu deyib.

Sonra Azərbaycan Tibb Universiteti və Litvanın Sağlamlıq Elmləri Universitetinin rektorları əməkdaşlığa dair memorandumu imzalayıblar.

Görüşdə Litva Respublikası Prezidentinin elm, təhsil və mədəniyyət məsələləri üzrə müşaviri Paulius Baltokas və universitetin beynəlxalq əlaqələr üzrə dekanı, professor xanım İngrida Yanuleviçene, ATU-nun tərbiyə işləri üzrə prorektoru, dosent Zülfüqar Musabəyov, elmi işlər üzrə prorektoru, dosent Rauf Bəylərov, ictimai səhiyyə fakültəsinin dekanı, professor Anar Ağayev, beynəlxalq əlaqələr şöbəsinin müdiri Müşfiq Orucov iştirak ediblər.

 

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.