Bakı, 25 aprel, AZƏRTAC

Prezident İlham Əliyevin siyasəti xalqa söykənir və ölkədə sabitliyin, rifahın, əmin-amanlığın qorunub saxlanılmasına, iqtisadi yüksəlişin təmin edilməsinə xidmət edir. Prezident İlham Əliyev əsası ulu öndər Heydər Əliyev tərəfindən qoyulmuş siyasi kursu artıq 15 ildir uğurla davam etdirir.

Ölkədə aparılan uğurlu islahatlar nəticəsində bu ilin birinci rübündə əhalinin gəlirləri təxminən 10 faiz artıb, inflyasiya isə cəmi 4 faiz təşkil edib. Azərbaycanın qarşısında heç bir iqtisadi və maliyyə çətinliyi yoxdur. Ölkəmizdə güclü iqtisadiyyat yaranıb, eyni zamanda, sosial problemlərin həllində müəyyən addımlar atılır. Respublikamızın iqtisadi imkanları olmasaydı, ölkədə pensiyaları, maaşları qaldırmaq, irihəcmli investisiya yatırmaq, infrastruktur layihələri həyata keçirmək mümkün olmazdı. Son dövrdə Azərbaycan iqtisadiyyatının rəqabətqabiliyyətliliyi istiqamətində görülmüş işlər diqqəti cəlb edir. Dünya İqtisadi Forumunun hesablamalarında rəqabətqabiliyyətliliyə görə Azərbaycan 35-ci yerə yüksəlib. Bu gün Azərbaycan dünyanın 35 ən rəqabətqabiliyyətli ölkəsindən biri hesab edilir.

Bu fikirləri Azərbaycan Dövlət İqtisad Universitetinin ticarət və gömrük işinin təşkili kafedrasının müdiri, Əməkdar Elm Xadimi, iqtisad elmlər doktoru, professor Arif Şəkərəliyev AZƏRTAC-a müsahibəsində deyib.

Sahibkarlığın inkişafından danışan iqtisadçı alim bildirib ki, 2018-ci ildə sahibkarlara dövlət tərəfindən güzəştli şərtlərlə 170 milyon manat vəsait ayrılır. Bu vəsait vaxtilə verilmiş və qaytarılan kreditlər hesabına ayrılır. Belə ki, bu bir daha İlham Əliyev siyasətinin uğurlu olduğunu göstərir. Hələ respublikamızda vaxtilə verilmiş iki milyard manatdan çox kreditlər indi qayıdır və yeni kreditlərin verilməsinə xidmət göstərir. Dövlətin dəstəyi ilə yaradılan müəssisələr həm iş yerlərinin açılmasına xidmət edir, həm yerli istehsalı gücləndirir.

Azərbaycanda 2017-ci ildə qeyri-neft sektorunun inkişafında müsbət nəticələr əldə edilib. Birinci rübün yekunları, sosial-iqtisadi göstəriciləri böyük uğurları təsdiqləyir. Belə ki, birinci rübdə Azərbaycan iqtisadiyyatı 2,3 faiz artıb. Bu, dünya miqyasında mövcud olan artımdan daha yüksək göstəriş hesab edilir. Qeyri-neft sektorumuz isə təxminən üç faiz artıb. Bu isə Azərbaycanda iqtisadiyyatının şaxələndirilməsi istiqamətində aparılan siyasətin nəticəsidir.

Azərbaycanda son illər aparılan sənayeləşmə siyasətinin nəticəsi olaraq qeyri-neft sənayesi 10 faiz artıb. Ölkə iqtisadiyyatının əsas sahələrindən hesab edilən kənd təsərrüfatı 4,2 faiz artıb.

Prezident İlham Əliyevin məqsədyönlü siyasəti nəticəsində ölkə iqtisadiyyatına 3,5 milyard dollar sərmayə qoyulub və bunun böyük hissəsi xarici sərmayədir. Bu, isə onu göstərir ki, respublikamız xarici investorlar üçün çox cəlbedici ölkədir.

Ölkəmizin valyuta ehtiyatları 2,2 milyard dollar artıb və hazırda 44,2 milyard dollara bərabərdir. Ölkədə aparılan uğurlu neft siyasəti nəticəsində keçən il imzalanmış “Azəri-Çıraq-Günəşli” yatağının istismar müddətinin uzadılması ilə bağlı kontraktdan irəli gələn 450 milyon dollar vəsait bonus formasında ölkəmizə çatıb.

Azərbaycanda xarici ticarət dövriyyəsi 31 faiz, ixrac isə 37 faiz artıb, daha doğrusu, qeyri-neft ixracı çoxalıb. Ümumi ixrac 24 faiz, qeyri-neft ixracı 37 faiz artıb.

Respublikamızda son dövrdə “Şimal-Cənub” və “Şərq-Qərb” nəqliyyat dəhlizlərinin xalqın istifadəsinə verilməsi mühüm hadisədir. Belə ki, mövcud dəmir yol infrastrukturları modernləşdirilir, ölkə daxilində insanların rahatlığı üçün çox önəmli olan metro tikintisi həyata keçirilir. Əhalinin gündəlik rastlaşdığı sosial problemlərdən olan təhsil, səhiyyə sahəsində böyük işlər həyata keçirilir. Ölkəmizdə 2018-ci ildə bölgələrdə 137 modul tipli məktəblərin tikintisi, yeni səhiyyə ocaqlarının yaradılması böyük uğurlardan xəbər verir.