İQTİSADİYYAT
Azərbaycan nümayəndə heyəti Rumıniyada görüşlər keçirmişdir VİDEO
Buxarest, 14 aprel (AZƏRTAC). Aprelin 14-də energetika naziri Natiq Əliyevin və Azərbaycan Respublikası Dövlət Neft Şirkətinin (ARDNŞ) prezidenti Rövnəq Abdullayevin başçılıq etdikləri nümayəndə heyətinin üzvləri Rumıniya İqtisadiyyat Nazirliyinin dəvəti ilə bu ölkədə səfərdə olmuşlar.
Nümayəndə heyətinə ARDNŞ-in vitse-prezidenti Elşad Nəsirov, şirkətin prezidentinin müşaviri Murad Heydərov, vitse-prezidentin müavini, AGRİ layihəsinin idarə heyətinin üzvü Vitali Bəylərbəyov, Energetika Nazirliyinin idarə rəisi Rauf Həsənov daxil olmuşlar.
Azərbaycan nümayəndə heyəti səfər çərçivəsində Buxarestdə yerləşən Tey Parkı - Heydər Əliyev xiyabanında Ümummilli Liderin abidəsinin önünə güllər qoymuş, xatirəsini ehtiramla yad etmişdir.
Daha sonra Azərbaycan nümayəndə heyətinin yeni təyin olunmuş iqtisadiyyat naziri Konstantin Nitsa ilə görüşü keçirilmişdir.
Görüşdə İqtisadiyyat Nazirliyinin dövlət katibləri, müşavirləri, Rumıniyada neft və qaz sahəsində çalışan şirkətlərin prezidentləri, Azərbaycan Respublikasının Rumıniyadakı səfirliyinin, ARDNŞ-in Rumıniya Nümayəndəliyinin rəhbər və işçi heyəti iştirak etmişlər.
İqtisadiyyat naziri Konstantin Nitsa Azərbaycan nümayəndə heyətini salamlayaraq ölkələrimiz arasında mövcud olan siyasi əlaqələrdən, strateji tərəfdaşlıq münasibətlərdən danışmış, iqtisadi sahədə uğurları qeyd etmişdir.
Azərbaycan Respublikası Dövlət Neft Şirkətinin Rumıniyadakı səmərəli fəaliyyətini, xüsusilə şirkətin Rumıniya Nümayəndəliyinin direktoru Həmzə Kərimovun yüksək peşəkarlığını qeyd edən nazir, ARDNŞ-in Rumıniyada yanacaq doldurma məntəqələrinin tikintisi ilə yanaşı, gələcəkdə digər sahələrə, o cümlədən, qazma, neft emalı, termoenerji kimi sahələrinə maraq göstərəcəyinə ümid etdiyini bildirmişdir. O, Rumıniya ilə Azərbaycan arasında ticarət dövriyyəsinin az olması və bunun artırılmasına ehtiyacın duyulmasını diqqətə çatdırmışdır.
K.Nitsa xüsusilə “Oltchim” kimya kombinatının “Arpechim” neft emalı zavodu ilə bir yerdə özəlləşdirilməsi və mayın 16-da keçiriləcək yeni tenderdə Azərbaycan tərəfinin iştirakının vacibliyini vurğulamışdır. AGRİ layihəsinə toxunan nazir tezliklə məlum olacaq texniki-iqtisadi əsaslanmanın nəticələrinə əsasən, layihə ilə bağlı qərarın qəbul ediləcəyinə ümid etdiyini bildirmişdir.
Nazir Rumıniya hökumətinin bütün sahələrdə Azərbaycan tərəfi ilə əməkdaşlığa hazır olduğunu vurğulamışdır.
Azərbaycan Respublikasının energetika naziri Natiq Əliyev rumın tərəfinə dəvətə görə təşəkkürünü bildirmişdir. Nazir Azərbaycan nümayəndə heyətini təqdim edərək, Rumıniya ilə Azərbaycan arasında mövcud olan dostluq, strateji tərəfdaşlıq əlaqələrinin tarixindən, iki ölkə prezidentlərinin görüşlərindən, Baş nazir Viktor Pontanın bu yaxınlarda Azərbaycana rəsmi səfərindən və bu səfər çərçivəsində aparılan müzakirələrdən danışmışdır.
N.Əliyev Rumıniyanın Azərbaycanın ədalətli mövqeyini daim beynəlxalq təşkilatlarda dəstəklədiyinə görə Rumıniya Prezidentinə və hökumətinə minnətdarlığını bildirmişdir. O, Azərbaycanın ərazi bütövlüyünün toxunulmazlığı prinsiplərinə Rumıniyanın göstərdiyi dəstəyi xüsusilə vurğulamış, iki ölkə arasında energetika sahəsində əməkdaşlığın xüsusi yer tutduğunu diqqətə çatdırmışdır.
Nazir ARDNŞ-in Rumıniyada fəaliyyətini genişləndirməsi üçün böyük potensialın olduğunu nəzərə çatdırmışdır. ARDNŞ-in Rumıniyada yanacaq doldurma məntəqəsinin fəaliyyət göstərdiyini, Rumıniyada inşaat olunacaq yeni magistral yollarında bu məntəqələrin şəbəkəsinin artırılmasında maraqlı olduğunu bildirmişdir. O, şirkətin Türkiyədəki “Petkim” neft-kimya kompleksi və Rumıniyanın “Oltchim” kimya kombinatı ilə birgə layihələri reallaşdırmağın mümkünlüyündən bəhs etmişdir.
AGRİ layihəsindən danışan Natiq Əliyev texniki-iqtisadi əsaslanmanın nəticələrinə uyğun olaraq qərarın qəbul ediləcəyini bildirmişdir. O, rumın tərəfinin verdiyi təklifləri Rumıniya-Azərbaycan ticari-iqtisadi əlaqələr və elmi texniki əməkdaşlıq üzrə Hökumətlərarası Birgə Komissiya daxilində müzakirə ediləcəyini demişdir. Rumıniya və Azərbaycan maşınqayırma zavodları arasında əlaqələrin yaradılmasının mühüm əhəmiyyət kəsb etdiyi diqqətə çatdırılmışdır.
Görüş iştirakçılarını salamlayan ARDNŞ-in prezidenti Rövnəq Abdullayev Rumıniya ilə Azərbaycan arasında ticarət dövriyyəsinin hazırkı vəziyyətinə toxunmuşdur. Bildirmişdir ki, artıq Rumıniyanın yüksək oktanlı benzini Azərbaycanda satışdadır. O, ARDNŞ-in Rumıniyada dövriyyəsinin 270 milyon avro təşkil etdiyini və yeni yanacaq doldurma məntəqələrinin açılması üçün investisiyaların davam etdirilməsinin planlaşdırıldığını diqqətə çatdırmışdır.
R.Abdullayev sıxılmış təbii qazın (CNG) satışında Gürcüstan və Azərbaycanda yüksək nəticələr əldə olunmasını bildirmiş və bu qazın gələcəkdə ARDNŞ-in Rumıniyada fəaliyyət göstərən yanacaq doldurma məntəqələrində tətbiq edilməsinin mümkünlüyünü nəzərə çatdırmışdır. Bildirmişdir ki, ARDNŞ-in emal üzrə vitse-prezidenti Davud Məmmədov və şirkətin “Azərikimya” İstehsalat Birliyi Müşahidə Şurasının sədri Muxtar Babayev ötən ilin dekabrında Rumıniyaya səfərləri çərçivəsində “Oltchim” müəssisəsi ilə yaxından tanış olmuşlar. O, “Oltchim” , “Petkim” və “Azərikimya” kombinatlarının əməkdaşlığının mümkün olduğunu və üç müəssisə arasında sinergetika potensialının zəruriliyini vurğulamışdır.
AGRİ layihəsi barədə danışan R.Abdullayev layihənin texniki-iqtisadi əsaslanmanın nəticələrindən asılı olaraq gələcək fəaliyyətinin müəyyən olunacağını demişdir.
Həmin gün Azərbaycan nümayəndə heyətinin Rumıniyanın Baş naziri Viktor Ponta ilə görüşü olmuşdur.
Görüşdə iki dövlət arasında strateji tərəfdaşlıq əlaqələrinin yüksək səviyyədə olduğu bildirilmiş, investisiya layihələri ətrafında müzakirələr aparılmış, “Oltchim” kimya kombinatı, AGRİ layihəsi, rumın şirkətlərinin Azərbaycanda, Azərbaycan şirkətlərinin Rumıniyada investisiya layihələrində iştirak etmələrinin mümkünlüyü bildirilmişdir.
Baş nazir ARDNŞ-in Rumıniyadakı fəaliyyətini yüksək qiymətləndirərək ölkəsinin əməkdaşlıq üçün tam açıq olduğunu diqqətə çatdırmışdır. V.Ponta Rumıniyanın Avropa İttifaqının üzvü kimi Azərbaycanın Türkiyə ilə birgə regionda həyata keçirmək istədiyi bütün enerji layihələrinə və ölkəmizin Rumıniyada bütün yatırımlarına dəstək verməyə hazır olduğunu diqqətə çatdırmışdır.
Azərbaycan tərəfi Baş nazirə xoş sözlərə görə təşəkkür edərək, əməkdaşlığın bütün istiqamətləri üzrə fəaliyyətini davam etdirəcəyini bildirmişdir.
Görüşdən sonra nümayəndə heyəti ARDNŞ-in Rumıniya Nümayəndəliyinin qərargahına gələrək ofislə və Buxarestdə “SOCAR” brendi altında fəaliyyət göstərən yanacaqdoldurma məntəqəsi ilə tanış olmuşlar.
Səfər Rumıniyanın KİV-lərində geniş işıqlandırılmışdır.
İqbal Hacıyev
AZƏRTAC-ın xüsusi müxbiri
Buxarest